រាជធានីភ្នំពេញ ៖ អនុប្រធានគណបក្សសង្គ្រោះជាតិ លោក ប៉ុល ហំម បានថ្លែងប្រាប់អ្នកយកព័ត៌មាននៅវិមានរដ្ឋសភា ចំពោះការគំរាមកំហែងរំលាយចោលគណបក្សប្រឆាំង គឺមិនមានអ្វីប៉ះពាល់ដល់រូបលោកនោះទេ ព្រោះលោកនឹងលាចេញពីឆាកនយោបាយ…
រាជធានីភ្នំពេញ ៖ អនុប្រធានគណបក្សសង្គ្រោះជាតិ លោក ប៉ុល ហំម បានថ្លែងប្រាប់អ្នកយកព័ត៌មាននៅវិមានរដ្ឋសភា ចំពោះការគំរាមកំហែងរំលាយចោលគណបក្សប្រឆាំង គឺមិនមានអ្វីប៉ះពាល់ដល់រូបលោកនោះទេ ព្រោះលោកនឹងលាចេញពីឆាកនយោបាយ ។
លោក ប៉ុល ហំម ដែលមានវត្តមានតែម្នាក់ឯងក្នុងនាមជាសមាជិកគណៈអចិន្ត្រៃយ៍រដ្ឋសភាមកពីគណបក្សសង្គ្រោះជាតិបានអះអាងថា វត្តមានរបស់លោកក្នុងកិច្ចប្រជុំថ្ងៃទី៧ វិច្ឆិកានេះ គឺក្នុងនាមលោកជាសមាជិកសភាធម្មតាមួយរូប ។ លោកបានបន្តថា ថ្នាក់ដឹកនាំគណបក្សនៅមិនទាន់បានប្រជុំជជែកពិភាក្សាគ្នានៅឡើយទេ ពាក់ព័ន្ធនឹងបញ្ហាដែលថា បក្សប្រឆាំងអាចនឹងត្រូវរំលាយនាថ្ងៃទី១៦ វិច្ឆិកា ជាពេលវេលាដែលតុលាការកំពូលគ្រោងប្រកាសសាលដីកាលើបណ្តឹងរបស់ក្រសួងមហាផ្ទៃស្នើឱ្យរំលាយបក្សប្រឆាំងមួយនេះ។
យ៉ាងណាក្តីលោក ប៉ុល ហំម បានអះអាងថា៖ «ខ្ញុំផ្ទាល់ គឺខ្ញុំចាស់ហើយ ដូចខ្ញុំថា មុនអញ្ចឹង រំលាយ ឬមិនរំលាយ វាដល់ពេលចូលនិវត្តន៍ហើយ ជាង៧០ឆ្នាំហើយ ទុកកន្លែងឱ្យគេក្មេងៗគេធ្វើ»។
បើសិនជាគណបក្សប្រឆាំងត្រូវរំលាយមែននោះ ថ្នាក់ដឹកនាំក្នុងជួរសមាជិកគណៈអចិន្ត្រៃយ៍បក្សប្រឆាំងប្រមាណជា ១០០នាក់ នឹងត្រូវហាមឃាត់ក្នុងការធ្វើនយោបាយ៥ឆ្នាំ តែលោក ប៉ុល ហំម លើកឡើងថា ដូចជាគ្មានបញ្ហាសម្រាប់លោកនោះទេ ។
លោក ប៉ុល ហំម បញ្ជាក់ថា៖ «វាមិនប៉ះពាល់អីលើខ្ញុំទេ ពីព្រោះបើមិនទុកឱ្យខ្ញុំធ្វើនយោបាយ ក៏ដល់ពេលដែលខ្ញុំត្រូវឈប់ដែរហើយ ។ បើច្បាប់កំណត់អញ្ចឹង ក៏អញ្ចឹងទៅ ប៉ុន្តែសម្រាប់ខ្ញុំ បើទោះបីជាមិនឱ្យខ្ញុំធ្វើនយោបាយ ក៏ដល់ពេលដែលខ្ញុំ ត្រូវលាឈប់ដែរហើយ គឺត្រូវរ៉ឺត្រែតហើយ ជាង៧០ឆ្នាំហើយ»។
នៅពេលសួរបញ្ជាក់ថា អញ្ចឹងមានន័យថាលោកលាចាកពីជីវភាពនយោបាយ លោក ប៉ុល ហំម បញ្ជាក់ជំហរថា៖ «បើមិនរំលាយក៏បន្តរហូតដល់ដាច់អាណត្តិហើយ»៕
ចែករំលែកព័តមាននេះ