រាជធានីភ្នំពេញ ៖ អនុរដ្ឋមន្ត្រីការបរទេសជប៉ុន លោក Iwao HORII បានថ្លែងថា គោលបំណងទស្សនកិច្ចនៅកម្ពុជារបស់លោកនៅពេលនេះ គឺដើម្បីបង្ហាញឱ្យឃើញថា ជប៉ុនចាត់ទុកកម្ពុជាគឺជាមិត្តភក្តិពិសេស…
រាជធានីភ្នំពេញ ៖ អនុរដ្ឋមន្ត្រីការបរទេសជប៉ុន លោក Iwao HORII បានថ្លែងថា គោលបំណងទស្សនកិច្ចនៅកម្ពុជារបស់លោកនៅពេលនេះ គឺដើម្បីបង្ហាញឱ្យឃើញថា ជប៉ុនចាត់ទុកកម្ពុជាគឺជាមិត្តភក្តិពិសេស ហើយជំហរនេះនឹងពុំមានការប្រែប្រួលឡើយ។
លោកបានថ្លែងបែបនេះកាលពីព្រឹកថ្ងៃទី២៦ ខែតុលា កន្លងមក ក្នុងឱកាសជួបសន្ទនាជាមួយលោក ប្រាក់ សុខុន ទេសរដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ នៅទីស្ដីការក្រសួង ។
លោកទេសរដ្ឋមន្ត្រី ប្រាក់ សុខុន បានសម្តែងនូវការស្វាគមន៍ចំពោះដំណើរទស្សនកិច្ចរបស់លោក Iwao HORII នៅកម្ពុជា និងបានគូសបញ្ជាក់ថា ដំណើរទស្សនកិច្ចរបស់លោកអនុរដ្ឋមន្ត្រីការបរទេសប៉ុន គឺធ្វើឡើងនៅក្នុងឱកាសខួប៦០ឆ្នាំនៃដំណើរទស្សនកិច្ចនៅកម្ពុជាក្នុងឆ្នាំ១៩៥៧ របស់អតីតនាយករដ្ឋមន្ត្រីជប៉ុន លោក Nobusuke Kishi ហើយក៏ជាខួបលើកទី២៥នៃការចូលរួមរបស់កងកម្លាំងជប៉ុនលើកដំបូង ក្នុងការថែរក្សាសន្តិភាពនៅកម្ពុជា ។ លោកទេសរដ្ឋមន្ត្រីបានវាយតម្លៃថា ដំណើរទស្សនកិច្ចរបស់លោក Iwao HORII ក្នុងពេលនេះ នឹងជួយពង្រឹងពង្រីកបន្ថែមទៀត ភាពជាដៃគូយុទ្ធសាស្ត្ររវាងប្រទេសទាំងពីរ ។
លោកអនុរដ្ឋមន្ត្រីការបរទេសជប៉ុន បានសម្តែងនូវការរីករាយពេញ និងបានជម្រាបជូនលោកទេសរដ្ឋមន្ត្រីថា គោលបំណងទស្សនកិច្ចនៅកម្ពុជារបស់លោកនៅពេលនេះ គឺដើម្បីបង្ហាញឱ្យឃើញថា ជប៉ុនចាត់ទុកកម្ពុជាគឺជាមិត្តភក្តិពិសេស ហើយជំហរនេះនឹងពុំមានការប្រែប្រួលឡើយ ។
លោកក៏បានជម្រាបជូនលោកទេសរដ្ឋមន្ត្រីថា ជប៉ុននឹងបើកស្ថានកុងស៊ុលរបស់ជប៉ុនប្រចាំនៅខេត្តសៀមរាប នៅក្នុងខែមករា ឆ្នាំ២០១៨ ខាងមុខនេះ ហើយនឹងបន្តយក ចិត្តទុកដាក់ពង្រឹងបន្ថែមទៀតនូវភាពជាដៃគូយុទ្ធសាស្ត្ររវាងជប៉ុន-កម្ពុជា ។ លោកអនុរដ្ឋមន្ត្រីការបរទេស បានវាយតម្លៃខ្ពស់ចំពោះទំនាក់ទំនងដ៏ល្អរវាងប្រទេសទាំងពីរ ពិសេសគឺការផ្លាស់ប្តូរការគាំទ្រគ្នាទៅវិញទៅមក នៅលើវេទិកាតំបន់ និងវេទិកាអន្តរជាតិជាច្រើន ។
លោកអនុរដ្ឋមន្ត្រីការបរទេស ក៏បានវាយតម្លៃខ្ពស់ចំពោះការរីកចម្រើននៅកម្ពុជាបច្ចុប្បន្ន និងបានអះអាងជូនលោកទេសរដ្ឋមន្ត្រីថា រដ្ឋាភិបាលជប៉ុននឹងបន្តផ្តល់ជំនួយឧបត្ថម្ភដល់កម្ពុជា ក្រោមកម្មវិធីកិច្ចសហប្រតិបត្តិការរវាងជប៉ុន និងកម្ពុជា ។ លោកក៏បានជម្រាបជូនអំពីការគិតគូររបស់រដ្ឋាភិបាលជប៉ុន ក្នុងការជួយដល់កម្ពុជាលើការកែទម្រង់គ្រប់វិស័យ ពិសេសការបង្កើនសមត្ថភាពរបស់កំពង់ផែក្រុងព្រះសីហនុ ដើម្បីឆ្លើយតបទៅនឹងការទាក់ទាញក្រុមហ៊ុនរបស់ជប៉ុនឱ្យមកធ្វើវិនិយោគទុននៅកម្ពុជា ហើយនិងការដោះស្រាយបញ្ហាចរាចរណ៍នៅទីក្រុងភ្នំពេញ ។
លោកបានគូសបញ្ជាក់ថា បច្ចុប្បន្នជប៉ុនបានចាប់ផ្តើមធ្វើការសិក្សាអំពីគម្រោងបង្កើតរថភ្លើងធុនស្រាលលើអាកាសនៅទីក្រុងភ្នំពេញ ដើម្បីជួយដោះស្រាយបញ្ហាកកស្ទះចរាចរណ៍ ។
ជាមួយគ្នានេះ លោកអនុរដ្ឋមន្ត្រីការបរទេសជប៉ុន បានសម្តែងនូវការពេញចិត្តចំពោះកិច្ចសហប្រតិបត្តិការលើវិស័យការពារប្រទេសរវាងប្រទេសទាំងពីរ ពិសេសគឺតាមរយៈការអញ្ជើញទៅបំពេញទស្សនកិច្ចរបស់សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីការពារជាតិ នៅប្រទេសជប៉ុនក្នុងខែកញ្ញាកន្លងមកនេះ។ លោកក៏បានវាយតម្លៃខ្ពស់ ចំពោះទំនាក់ទំនងរវាងប្រជាជននិងប្រជាជន ពិសេសគឺយុវជននៃប្រទេសទាំងពីរ ។
លោកទេសរដ្ឋមន្ត្រី ប្រាក់ សុខុន បានគូសបញ្ជាក់ថា ការរីកចម្រើនរបស់កម្ពុជារហូតដល់ពេលនេះ គឺមិនអាចកាត់ផ្តាច់បានពីការជួយឧបត្ថម្ភជាច្រើនរបស់ជប៉ុន ហើយក៏បានសម្តែងនូវអំណរគុណចំពោះការអះអាងរបស់លោកអនុរដ្ឋមន្ត្រីការបរទេសជប៉ុនដែលថា ជប៉ុននឹងបន្តផ្តល់ជំនួយដល់កម្ពុជា និងថាការគាំទ្ររបស់ជប៉ុនចំពោះកម្ពុជានឹងពុំមានការផ្លាស់ប្តូរឡើយ ។
លោកទេសរដ្ឋមន្ត្រី ក៏បានវាយតម្លៃខ្ពស់ចំពោះការកើនឡើងយ៉ាងខ្លាំងនៃការវិនិយោគទុនជប៉ុននៅកម្ពុជា ដែលនៅក្នុងឆ្នាំ២០១៦ កន្លងមក បានកើនឡើងដល់ចំនួនជាង៨០០លានដុល្លារ ។
លើវិស័យទេសចរណ៍ លោកទេសរដ្ឋមន្ត្រី និងលោកអនុរដ្ឋមន្ត្រីការបរទេសជប៉ុន បានសម្តែងការវាយតម្លៃខ្ពស់ចំពោះការកើនឡើងនៃទំនាក់ទំនងផ្នែកទេសចរណ៍ ពិសេសចាប់តាំងពីការបង្កើតឡើងនូវជើងហោះហើរត្រង់រវាងប្រទេសទាំងពីរកាលពីថ្ងៃទី១ ខែកញ្ញា ឆ្នាំ២០១៦ កន្លងមក ៕
ចែករំលែកព័តមាននេះ