ទីក្រុងតូក្យូ ៖ កាលពីព្រឹកថ្ងៃចន្ទ ក្នុងស្ថានទូតអាមេរិកនៅប្រទេសជប៉ុន លោកប្រធានាធិបតី Donald Trump បានរិះគន់ការធ្វើពាណិជ្ជកម្មរបស់ជប៉ុន ហើយសន្យាថា នឹងស្វែងរកលំនឹងឡើងវិញសម្រាប់ការធ្វើពាណិជ្ជកម្មរវាងប្រទេសទាំងពីរ ។
លោកនិយាយថា ៖« សហរដ្ឋអាមេរិកបានទទួលរងផលប៉ះពាល់ពីឱនភាពពាណិជ្ជកម្មដ៏ធំជាមួយជប៉ុន អស់រយៈពេល៧០ឆ្នាំមកហើយ។ ពួកយើងចង់បានការធ្វើពាណិជ្ជកម្មមួយយុត្តិធម៌ និងបើកទូលាយ ។ ប៉ុន្តែពេលនេះ ការធ្វើពាណិជ្ជកម្មរបស់ពួកយើងជាមួយជប៉ុន គឺមិនយុត្តិធម៌ មិនបើកទូលាយ និងមិនសេរីឡើយ » ។
លោកត្រាំ បញ្ជាក់ច្បាស់ថា លោកនឹងលើកឡើងពីបញ្ហាស្វែងរកលំនឹងនៃការធ្វើពាណិជ្ជកម្មរបស់អាមេរិក និងការគំរាមកំហែងរបស់កូរ៉េខាងជើង មកពិភាក្សាគ្នាក្នុងអំឡុងពេលលោកធ្វើទស្សនកិច្ចទៅកាន់អាស៊ី ដែលចាប់ផ្តើមកាលពីថ្ងៃអាទិត្យ ។ ប៉ុន្តែអតីតមន្ត្រីអាមេរិក និងអ្នកជំនាញក្នុងតំបន់ជាច្រើនព្រមានថា ការលើកឡើងពីការធ្វើពាណិជ្ជកម្មនេះ អាចនឹងប៉ះពាល់ដល់កិច្ចសហប្រតិបត្តិការរវាងសហរដ្ឋអាមេរិក និងដៃគូផ្សេងៗក្នុងតំបន់ ខណៈការគំរាមកំហែងពីកូរ៉េខាងជើងនាពេលអនាគត អាមេរិកអាចនឹងពឹងផ្អែកលើកិច្ចសហប្រតិបត្តិការទាំងនេះ ។
លោកត្រាំ បានបញ្ជាក់ពីសារសំខាន់នៃការចរចាឡើងវិញលើលក្ខខណ្ឌធ្វើពាណិជ្ជកម្ម។ លោកមានសុទិដ្ឋិនិយមថា ការចរចាទាំងនេះនឹងធ្វើឲ្យទំនាក់ទំនងមានលំនឹងផងដែរ។
បន្ទាប់ពីលោកបានចាកចេញពីប្រទេសជប៉ុន និងទៅកាន់កូរ៉េខាងត្បូង លោកមានប្រសាសន៍ថា ការធ្វើពាណិជ្ជកម្មនឹងស្ថិតក្រោមការតាមដានយ៉ាងដិតដល់ ។
លោកក៏បានរិះគន់កិច្ចព្រមព្រៀងពាណិជ្ជកម្មសេរីរវាងអាមេរិក និងកូរ៉េខាងត្បូង ហៅកាត់ថា KORUS ម្តងហើយម្តងទៀត និងគំរាមថា នឹងដកអាមេរិកចេញពីកិច្ចព្រមព្រៀងនេះ។ ទំនាក់ទំនងរវាងលោកត្រាំ ជាមួយលោកនាយករដ្ឋមន្ត្រី Moon Jae-in របស់កូរ៉េខាងត្បូង ក៏មិនល្អដូចគ្នាជាមួយលោក Abe ដែរ ព្រោះការខ្វែងគំនិតគ្នាទាក់ទិននឹងយុទ្ធសាស្ត្របញ្ឈប់កម្មវិធីផលិតអាវុធនុយក្លេអ៊ែររបស់កូរ៉េខាងជើង ៕
ចែករំលែកព័តមាននេះ