ខេត្តកែប ៖ បន្ទាប់ពីព្រះរាជពិធីបុណ្យអុំទូកនៅរាជធានីភ្នំពេញទើបតែបញ្ចប់ នៅឯខេត្តកែបវិញ មន្ត្រីរាជការស្ថាប័នរដ្ឋកំពុងតែបន្តការកសាងហេដ្ឋារចនាសម្ព័ន្ធ ដើម្បីផ្ដល់ភាពងាយស្រួលក្នុងការទទួលស្វាគមន៍ពិធីបុណ្យសមុទ្រ ដែលនឹងឈានមកដល់នៅខែក្រោយនេះ ។
លោក ប៉ុក ទាំង អនុប្រធានមន្ទីរទេស ចរណ៍ខេត្ត បានប្រាប់កោះសន្តិភាពនៅថ្ងៃទី៦ វិច្ឆិកាថា ខេត្តកំពុងតែមមាញឹកកសាងហេដ្ឋារចនាសម្ព័ន្ធបន្ថែមទៀតសម្រាប់ទទួលភ្ញៀវជាតិ និងអន្តរជាតិមកទស្សនាក្នុងព្រឹត្តិការណ៍បុណ្យសមុទ្រ ដែលនឹងឈានមកដល់នាខែក្រោយ ។
លោកបន្ដថា ក្នុងពេលនេះ យើងកំពុងតែពង្រីកចាក់ដី និងកន្លែងដើរកម្សាន្ដបន្ថែមទៀតនៅតាមមាត់ឆ្នេរ ដើម្បីងាយស្រួលដល់ភ្ញៀវមកទស្សនាបានសម្រាកលំហែកាយ និងមានកន្លែងចតរថយន្ត ។
លោក សោម ពិសិដ្ឋ អភិបាលរងខេត្ត ធ្លាប់ថ្លែងប្រាប់កោះសន្តិភាពថា ៖« កម្មវិធីបុណ្យសមុទ្រឆ្នាំនេះ គឺរំពឹងថា នឹងមានមនុស្សមកលេងកម្សាន្ដចូលខ្ទង់លាននាក់ ព្រោះនឹងមានកម្មវិធីសម្តែងសិល្បៈ របាំ កីឡាលើខ្សាច់ លើទឹក និងមានល្បែងជាច្រើនប្រភេទទៀត ដូចជា ហត្ថពលកម្មជាដើម ហើយខេត្តពុំទាន់មានសមត្ថភាពផ្គត់ផ្គង់សណ្ឋាគារ និងផ្ទះសំណាក់ឲ្យបានគ្រប់គ្រាន់តាមតម្រូវការនៅឡើយទេ គឺមានតែពឹងផ្អែកលើខេត្តជិតខាងប៉ុណ្ណោះ » ។
ចំណែកក្នុងព្រះរាជពិធីបុណ្យអុំទូករយៈពេល៣ថ្ងៃដែលទើបនឹងបញ្ចប់វិញ ខេត្តកែបបានទទួលស្វាគមន៍ភ្ញៀវជាតិ និងអន្តរជាតិប្រមាណជា១០ម៉ឺននាក់ ។
លោក ប៉ុក ទាំង បានថ្លែងថា ៖« ក្នុងពិធីបុណ្យអុំទូករយៈពេល៣ថ្ងៃកន្លងមកនេះឃើញថា គ្មានបញ្ហាអ្វីកើតឡើងទេ ដោយខេត្តបានទទួលស្វាគមន៍ភ្ញៀវសរុបទាំងអស់ចំនួន៨១.២៤៩នាក់ ក្នុងនោះភ្ញៀវអន្តរជាតិចំនួន១.២២៨នាក់ » ។
កញ្ញា គីម ស្រីពេជ្រ អ្នកលក់ម្ហូបអាហារដល់ភ្ញៀវដែលទៅកម្សាន្ដ បាននិយាយថា រយៈពេលបុណ្យអុំទូកនេះ ឃើញមានភ្ញៀវមកទស្សនាច្រើនដូចរាល់ឆ្នាំដែរ ប៉ុន្តែអ្វីដែលគួរឲ្យកត់សម្គាល់នោះ ម្ហូបអាហារលក់មិនសូវដាច់ដូចពិធីបុណ្យសព្វមួយដងទេ ។ នេះប្រហែលជាពួកគាត់វេចខ្ចប់មកពីផ្ទះស្រាប់ក៏ថាបាន ។
កញ្ញាបញ្ជាក់ថា ៖ « តម្លៃ គឺខ្ញុំមិនឡើងថ្លៃអីណាស់ណាទេ គ្រាន់តែលើសថ្ងៃមិនមែនបុណ្យទាន ប្រហែល១០%ប៉ុណ្ណោះ តែនៅតែលក់មិនដាច់ ។ ខ្ញុំសង្ឃឹមថា បុណ្យសមុទ្រខាងមុខនេះ នឹងមានភ្ញៀវចូលមកទស្សនាខេត្តកែបច្រើនជាងឆ្នាំមុន » ។
គួរបញ្ជាក់ផងដែរថា រាជរដ្ឋាភិបាលកម្ពុជា បានកំណត់យកថ្ងៃទី២២-២៣-២៤ ខែធ្នូ ឆ្នាំ២០១៧ ជាកាលបរិច្ឆេទប្រារព្ធពិធីបុណ្យសមុទ្រលើកទី៦ ជុំទី២ នៅខេត្តកែប ដែលព្រឹត្តិការណ៍ទេសចរណ៍ដ៏ធំនេះ នឹងបើកជាផ្លូវការក្រោមអធិបតីភាពដ៏ខ្ពង់ខ្ពស់របស់សម្ដេចតេជោនាយករដ្ឋមន្ត្រី ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន នាថ្ងៃទី២៣ ធ្នូ នៅមុខសាលាខេត្តកែប ក្រោមប្រធានបទ «ឆ្នេរសមុទ្របៃតង ៖ អនាគត គឺបច្ចុប្បន្ន» និរន្តរភាពទេសចរណ៍ដើម្បីអភិវឌ្ឍន៍ ក្រោមការសម្រេចពីរាជរដ្ឋាភិបាលកម្ពុជា ៕
ចែករំលែកព័តមាននេះ