រាជធានីភ្នំពេញ ៖ ដោយសារការធ្វើពិពិធកម្មផលិតផលរបស់ខ្លួន បានធ្វើឲ្យការនាំចេញមានកំណើនជាបន្ដបន្ទាប់ ។ ជាក់ស្តែង ការនាំចេញរយៈពេល៩ខែឆ្នាំនេះ មានទំហំទឹកប្រាក់៧.៧០០លានដុល្លារ កើនឡើង១៧% បើធៀបនឹងរយៈពេលដូចគ្នាកាលពីឆ្នាំមុន ។
យោងតាមទិន្នន័យរបស់ក្រសួងពាណិជ្ជកម្ម ដែលកោះសន្តិភាពទើបទទួល បានឲ្យដឹងកាលពីថ្ងៃទី៥ វិច្ឆិកា ថា ទឹកប្រាក់នាំចេញនេះភាគច្រើន គឺបានមកពីវិស័យវាយនភ័ណ្ឌកាត់ដេរ និងស្បែកជើង និងទំនិញផ្សេងៗទៀត ដែលស្ថិតក្រោមប្រព័ន្ធអនុគ្រោះពន្ធ (GSP) និងផែនការប្រទេសអនុគ្រោះខ្លាំងបំផុត (MFN) ដែលបានអនុញ្ញាតឲ្យផលិតផលកម្ពុជាជាច្រើនចូលទីផ្សារ ដោយកាត់បន្ថយពន្ធនាំចូល ឬមិនយកពន្ធ ។
ទិន្នន័យដដែលបានឲ្យដឹងថា ក្នុងចំនួននេះ ការនាំចេញសម្លៀកបំពាក់មានតម្លៃ៤,៩ពាន់លានដុល្លារ កើនឡើង៨,៣%, ការនាំចេញស្បែកជើង មានតម្លៃ៦៣៦,៧៦លានដុល្លារ កើនឡើង៤៣% និងវាយនភ័ណ្ឌមានតម្លៃ៧៦,៨៨លានដុល្លារ ខណៈផលិតផលមិនជាក់លាក់ផ្សេងទៀតមានតម្លៃ៥៦១,៤៥លានដុល្លារ កើនឡើងដល់៤២,៥១% ។
តួលេខបានបង្ហាញតម្លៃនាំចេញអង្ករមានចំនួន២០៦,៩១លានដុល្លារ ធ្លាក់ចុះ៦,៧% ។
ការនាំចេញសរុបទៅសហភាពអឺរ៉ុប ជាទីផ្សារធំជាងគេរបស់ប្រទេសកម្ពុជា បានកើនឡើងដល់៣.០០០លានដុល្លារ កើនឡើង៥,៩៤% បើធៀបនឹងរយៈពេល៩ខែកាលពីឆ្នាំមុន ។ កំណើនដ៏រឹងមាំត្រូវបានកត់ត្រានៅក្នុងការនាំចេញទៅជប៉ុន ដែលមានចំនួន៥៣៤,២៥លានដុល្លារ កើនឡើង២៥,៨៤% ។ រីឯការនាំចេញទៅអាមេរិក ជាទីផ្សារដ៏សំខាន់សម្រាប់ក្រុមហ៊ុនចេញសម្លៀកបំពាក់កម្ពុជា មានចំនួន១,៤៧ពាន់លានដុល្លារ ធ្លាក់ចុះ១% បើធៀបរយៈពេលដូចគ្នាកាលពីឆ្នាំមុន ។
អនុប្រធានសភាពាណិជ្ជកម្មកម្ពុជា លោកឧកញ៉ា លឹម ហេង បានថ្លែងថា ស្ថានភាពនៃការនាំចេញរបស់កម្ពុជានៅតែល្អប្រសើរ ទោះបីស្ថានភាពនយោបាយយើងមានការបារម្ភពីអ្នកខ្លះក្តី ប៉ុន្តែមិនប៉ះពាល់ដល់ការនាំចេញរបស់កម្ពុជាទេ ។ លោកថា ៖« ទំហំនៃការនាំចេញរបស់កម្ពុជា សម្រាប់រយៈពេលវែងនៅតែល្អប្រសើរ ដោយសារសេដ្ឋកិច្ចរបស់យើងនៅតែរក្សាកំណើន ស្ថិរភាពនយោបាយ និងសង្គមនៅតែមានភាពល្អប្រសើរ» ។
លោកឧកញ៉ាបន្តថា ៖« ទោះជាយ៉ាងណា ការនាំចេញរបស់កម្ពុជាភាគច្រើនជាផលិតផលពាក់កណ្តាលសម្រេច និងផលិតផលមិនទាន់កែច្នៃ ដែលមិនអាចទាញយកផលិតផលបន្ថែមបានច្រើន » ។ លោកបន្តថា ៖« បញ្ហាតម្លៃអគ្គិសនី ថ្លៃដឹកជញ្ជូនថ្លៃ និងធនធានមនុស្សជំនាញនៅមានកម្រិត ជាឧបសគ្គរបស់កម្ពុជាក្នុងការទាក់ទាញក្រុមហ៊ុនវិនិយោគថ្មីៗ មកកែច្នៃផលិតផលកសិកម្មកម្ពុជាដើម្បីនាំចេញ » ។
លោកបណ្ឌិត ហុង វណ្ណៈ អ្នកស្រាវជ្រាវសេដ្ឋកិច្ចប្រចាំរាជបណ្ឌិតសភាកម្ពុជា បានថ្លែងថា កម្ពុជាគួរចាប់យកទីផ្សារជាមួយប្រទេសដទៃទៀត ដើម្បីបង្កើនការនាំចេញផលិតផលរបស់ខ្លួនទៅកាន់បរទេស ជាជាងពឹងផ្អែកលើទីផ្សារប្រទេសជិតខាង ។ ធ្វើបែបនេះ នឹងធ្វើឲ្យសេដ្ឋកិច្ចកម្ពុជាកាន់តែល្អប្រសើរ និងអាចពង្រីកទំហំនៃការនាំចេញបាន ៕
ចែករំលែកព័តមាននេះ