រាជធានីភ្នំពេញ ៖ ថ្នាក់ដឹកនាំជាន់ខ្ពស់មួយរូបរបស់គណបក្សសង្គ្រោះជាតិ លោក ប៉ុល ហំ នៅព្រឹកថ្ងៃទី៧ វិច្ឆិកានេះ បានចូលរួមជាមួយអ្នកតំណាងរាស្ត្រមកពីគណបក្សប្រជាជនកម្ពុជាសម្រាប់ការប្រជុំគណៈអចិន្ត្រៃយ៍រដ្ឋសភា ដើម្បីពិនិត្យ និងពិភាក្សាលើរបៀបវារៈមួយចំនួន ខណៈអ្នកតំណាងរាស្ត្រមកពីបក្សប្រឆាំងជាច្រើនរូបបានចាកចេញពីប្រទេសកម្ពុជា ។
អចិន្ត្រៃយ៍រដ្ឋសភា បានបើកកិច្ចប្រជុំពិនិត្យ និងពិភាក្សាលើរបៀបវារៈចំនួន៥ ដើម្បីដាក់បញ្ចូលទៅក្នុងសម័យប្រជុំសភាពេញអង្គខាងមុខ ដែលក្នុងនោះរបៀបវារៈចំនួន២សំខាន់ជាងគេ គឺការពិនិត្យសំណើសុំអនុម័តនូវសេចក្តីព្រាងច្បាប់ស្តីពីការទូទាត់ទូទៅរបស់រដ្ឋសម្រាប់ការគ្រប់គ្រងឆ្នាំ ២០១៦ និងរបៀបវារៈស្តីពី ការពិនិត្យសំណើសុំអនុម័តនូវសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០១៨ ។
សូមបញ្ជាក់ថា សម្រាប់សេចក្តីព្រាងច្បាប់ស្តីពីហិរញ្ញវត្ថុ សម្រាប់ការគ្រប់គ្រងឆ្នាំ ២០១៨ រាជរដ្ឋាភិបាលបានគ្រោងនូវចំណាយសរុបថវិការដ្ឋ ឬថវិកាជាតិ ត្រូវបានគ្រោងចំនួន ២៤.៣៧៥.១០២ លានរៀល (ប្រមាណជាង ៦.០០០ លានដុល្លារអាមេរិក) ស្មើនឹង ២៤,៥៩% នៃផ.ស.ស និងមានកំណើន ១៥,២% ធៀបនឹងច្បាប់ឆ្នាំ ២០១៧ ។ សម្រាប់ការចំណាយច្រើនបំផុត គឺលើវិស័យអប់រំដែលមានចំនួនប្រមាណជាង ៨៤៨ លានដុល្លារសហរដ្ឋអាមេរិក ៕
ចែករំលែកព័តមាននេះ