ក្រោយការរិះគន់ សូត្រ ប៊ុនធី ធ្វើបានល្អខ្លាំងក្នុងជំនួបជាមួយកីឡាករថៃ
- ភ្នំពេញ
រាជធានីភ្នំពេញ ៖ ជំនួបប៉ះគ្នាជាលើកទី៣ជាមួយកីឡាករថៃ Lam Teuy កាលពីថ្ងៃទី៥ វិច្ឆិកា នៅលើសង្វៀនទូរទស្សន៍អាស៊ីអាគ្នេយ៍ កីឡាករកម្ពុជា សូត្រ…
រាជធានីភ្នំពេញ ៖ ជំនួបប៉ះគ្នាជាលើកទី៣ជាមួយកីឡាករថៃ Lam Teuy កាលពីថ្ងៃទី៥ វិច្ឆិកា នៅលើសង្វៀនទូរទស្សន៍អាស៊ីអាគ្នេយ៍ កីឡាករកម្ពុជា សូត្រ ប៊ុនធី ត្រូវគេកត់សម្គាល់ថា ធ្វើបានល្អខ្លាំង ដោយសារតែលោកប្រើពេលត្រឹមតែ២ទឹកដំបូងប៉ុណ្ណោះ
ក៏ទទួលបានជោគជ័យហួសពីការស្មាន ដោយអាចផ្ដួលកីឡាករថៃឱ្យសន្លប់លើរេញ ដែលគ្មានអ្នកណានឹកស្មានដល់ឡើយ ។ នេះជាជំនួបលើកទី៣របស់ សូត្រ ប៊ុនធី និងកីឡាករថៃរូបនេះ ហើយក៏ជាជោគជ័យដំបូងមួយចាប់តាំងពីបានប៉ះគ្នាផងដែរ ខណៈលទ្ធផលដែលលោកសម្រេចបាន គឺពិតជាលាងជម្រះទាំងស្រុងនូវភាពអាម៉ាស់ដែលលោកធ្វើមិនបានល្អជាមួយកីឡាករថៃ Lam Teuy រហូតដល់អ្នកទស្សនារិះគន់យ៉ាងខ្លាំងផងដែរ ។
យោងតាមការបញ្ជាក់របស់កីឡាករ សូត្រ ប៊ុនធី បានអះអាងថា នេះជាជ័យជម្នះលើកដំបូងក្នុងជំនួបជាមួយកីឡាករថៃ Lam Teuy ដោយការប្រកួតមុនៗគឺស្ថិតនៅក្រៅសង្វៀនទូរទស្សន៍អាស៊ីអាគ្នេយ៍ ដោយលទ្ធផលនាពេលកន្លងមកមិនសូវល្អទាល់តែសោះ ទើបការប្រកួតជាថ្មីលើកនេះ អ្នកទស្សនាហាក់មិនទុកចិត្តលោកប៉ុន្មានទេ សូម្បីតែលោកខ្លួនឯងក៏យល់ឃើញបែបនេះដូចគ្នា បន្ទាប់ពីលោកប៉ះគ្នាជាមួយកីឡាករថៃរូបនេះកាលពី២លើកមុនមិនទទួលជ័យជម្នះ។
នៅក្នុងការប៉ះគ្នាជាថ្មីកាលពីថ្ងៃទី៥ វិច្ឆិកាចាប់ផ្ដើមដំបូងកីឡាករសូត្រ ប៊ុនធី និងគ្រូបង្វឹករំពឹងត្រឹមឈ្នះពិន្ទុប៉ុណ្ណោះ លុះចូលទឹកទីពីរកីឡាករទាំងពីរបានបើកការវាយលុក
ដាក់គ្នាទៅវិញទៅមកធ្វើឱ្យមានការចាប់អារម្មណ៍យ៉ាងខ្លាំងពីអ្នកគាំទ្រទាំងសងខាង និងបានទស្សន៍ទាយថានឹងចេញលទ្ធផលបែបនេះបែបនោះតាមការយល់ឃើញរៀងខ្លួនផងដែរ។ សម្រាប់ការប្រកួតក្នុងទឹកទី២នេះស្រាប់តែលេចចេញលទ្ធផលតែមួយប៉ប្រិចភ្នែកប៉ុណ្ណោះ បន្ទាប់ពីសូត្រ ប៊ុនធី មានឱកាសវាយត្រូវសៀតផ្កា គូប្រកួតពេញទំហឹងបណ្ដាលឱ្យដួលសន្លប់បាត់មាត់ឈឹងធ្វើឱ្យម្នាក់ៗស្រឡាំងកាំង ទោះបីអាជ្ញាកណ្ដាលរាប់ដល់១០ទៅហើយ នៅតែមិនអាចក្រោកប្រកួតបន្តទៀតបាន។
កីឡាករ សូត្រ ប៊ុនធី ញញឹមបិទមាត់មិនជិតនោះទេ ក្រោយពីត្រូវបានប្រកាសថា ឈ្នះកីឡាករថៃ Lam Teuy ក្នុងទឹកទី២ហើយទទួលបានទឹកប្រាក់លើកទឹកចិត្តពីលើតម្លៃខ្លួនចំនួន១លានរៀលផងដែរ ទើបធ្វើឱ្យអ្នកណាក៏សប្បាយចិត្តជំនួសកីឡាកររូបនេះដែរ ។ ចំណែកកីឡាករថៃបានអះអាងថា ហេតុផលដែលសូត្រ ប៊ុនធី ទទួលលទ្ធផលល្អដល់ម្លុឹងមិនមែនដោយសារតែសមត្ថភាពទាំងស្រុងនោះទេ គឺវាពាក់ព័ន្ធនឹងសំណាងនៅក្នុងនោះផងដែរ។
លោក ញាណ សុធី អ្នករៀបចំកម្មវិធីប្រដាល់ប្រចាំស្ថានីយទូរទស្សន៍អាស៊ីអាគ្នេយ៍ បានអះអាងថា កីឡាករ សូត្រ ប៊ុនធី ប្រកួតជាមួយកីឡាករថៃកន្លងមកមិនសូវរស់រវើកតាមការចង់បានប៉ុន្មានទេ ឃើញតែស្ទុះឱបគ្នា និងត្រូវអាជ្ញាកណ្ដាលចាប់បំបែករហូត ។ ការប្រកួតនៅក្នុងពេលនោះ ដ្បិតថាមិនសូវទាក់ទាញ ប៉ុន្តែមិនមានន័យថា លទ្ធផលដែលកំណត់ឱ្យសូត្រ ប៊ុនធី ចាញ់ពិន្ទុដោយសារតែចង់បំបាក់រឿងគេប្រកួតមិនបានល្អនោះក៏ទេដែរ ។ លោកថាលទ្ធផលដែលបានស្ដែងឡើងគឺ សូត្រ ប៊ុនធី អត់ពេញចិត្ត ប៉ុន្តែផ្អែកតាមការប្រកួតពេញ៥ទឹក គឺកម្រិតវាយប្រកួតរបស់គេមិនសូវល្អ និងចាញ់ប្រៀបកីឡាករថៃតែម្ដង ទើបក្រោយបញ្ចប់ការប្រកួតទាំង៥ទឹកក៏ត្រូវកំណត់ឱ្យចាញ់តែម្ដង ។
ងាកទៅកាន់ការប្រកួតលើកចុងក្រោយ សូត្រ ប៊ុនធី ប្រកួតរឹតតែមិនល្អ ដោយក្នុងទឹកទី១ គេចំណាយកម្លាំងចោលទទេ ដោយមិនប្រឹងសម្ញែងសមត្ថភាពឱ្យរស់រវើកដើម្បីបំពេញចិត្តអ្នកទស្សនានោះទេ ។ ប៉ុន្តែចូលដល់ទឹកទី២ កីឡាករ សូត្រ ប៊ុនធី ធ្វើបានល្អហួសពីការស្មានដោយបើកការវាយសម្រុកមិនដកដៃរហូតអាចផ្ដួលកីឡាករថៃឱ្យសន្លប់តាមការចង់បានធ្វើឱ្យលោករំពឹងថា ការប្រកួតលើកក្រោយគេនឹងធ្វើបានល្អទៀតមិនខាន ៕
ចែករំលែកព័តមាននេះ