រាជធានីភ្នំពេញ៖ ទំហំពាណិជ្ជកម្មរបស់ប្រទេសកម្ពុជាជាមួយបណ្តាប្រទេសនានាមានការកើនឡើងគួរឱ្យកត់សម្គាល់ តួយ៉ាងទំហំពាណិជ្ជកម្មរវាងប្រទេសកម្ពុជា និងឥណ្ឌូនេស៊ី គឺកើនឡើងជាបន្តបន្ទាប់ ដែលបច្ចុប្បន្ននេះមានទំហំប្រមាណ៤៥០លានដុល្លារ ។ នេះបើតាមលោក Pitono Purnomo ឯកអគ្គរដ្ឋទូតឥណ្ឌូនេស៊ី ជម្រាបជូនសម្តេចតេជោ នាឱកាសដែលសម្តេចនាយករដ្ឋមន្ត្រីអនុញ្ញាតិឱ្យចូលជួបសម្តែងការគួរសម ពិភាក្សាការងារ និងជំរាបលាមុនបញ្ចប់បេសកកម្មនៅកម្ពុជានាថ្ងៃទី៦ វិច្ឆិកានេះ ។
ក្នុងជំនួបនេះលោក Pitono Purnomo បានកោតសរសើរចំពោះភាពរីកចម្រើនរបស់ប្រទេសកម្ពុជា ជាពិសេសកំណើនសេដ្ឋកិច្ច ស្ថេរភាព និងសន្តិភាពក្នុងប្រទេស ព្រមទាំងជីវភាពរស់នៅរបស់ប្រជាពលរដ្ឋ មានភាពល្អប្រសើរ ក្រោមការដឹកនាំរបស់សម្តេចតេជោ ហ៊ុន សែន។ លោក Pitono Purnomo បង្ហាញពីការរីករាយចំពោះវិស័យការពារជាតិដែលប្រទេសទាំងពីរមានកិច្ចសហប្រតិបត្តិការគ្នាយ៉ាងជិតស្និទ ដែលកន្លងមកមានការបណ្តុះបណ្តាលជួយលើកកម្ពស់សមត្ថភាពកងទ័ពជាដើម។ ជាមួយគ្នានេះដែរ ឥណ្ឌូនេស៊ី ក៏បានជួយបណ្តុះបណ្តាលនិស្សិតកម្ពុជាជាង៦០០នាក់ នៅប្រទេសឥណ្ឌូនេស៊ីផងដែរ។
សម្តេចតេជោ បានអរគុណចំពោះលោកឯកអគ្គរដ្ឋទូតដែលបានឃើញច្បាស់អំពីការរីកចម្រើនរបស់កម្ពុជា ទន្ទឹមនឹងនោះដែរ សម្តេចតេជោបានសំណូមពរឱ្យខិតខំជំរុញការងារពាណិជ្ជកម្មវិនិយោគរវាងប្រទេសទាំងពីរនេះឱ្យមានសន្ទុះកើនឡើងថែមទៀត។ នៅក្នុងតំបន់អាស៊ាន ឥណ្ឌូនេស៊ី គឺជាប្រទេសដែលមានប្រជាជនប្រមាណជាង២៦០លាននាក់ ហើយក៏ជាទីផ្សារធំជាងគេនៅក្នុងតំបន់អាស៊ាន និងជាទីផ្សារដ៏ធំរបស់កម្ពុជាផងដែរ។ បច្ចុប្បន្ននេះ វិនិយោគិនឥណ្ឌូនេស៊ី ក៏បានមកវិនិយោគនៅកម្ពុជាផងដែរ ដូចជាវិស័យសុខាភិបាលជាដើម។
សម្តេចតេជោនាយករដ្ឋមន្ត្រី ហ៊ុន សែន បានអរគុណឥណ្ឌូនេស៊ីដែលកន្លងមកនេះបានជួយពលករខ្មែរដែលរងគ្រោះនៅតាមទូកនេសាទខុសច្បាប់ ដោយអំពើបង្ខិតបង្ខំធ្វើបាបឱ្យធ្វើការហួសកម្លាំង ហើយបានបញ្ជូនមកកម្ពុជាវិញដោយសុវត្ថិភាព។ ដោយសារកំណើនភ្ញៀវទេសចរមកកម្ពុជាកាន់តែកើនឡើង ពីមួយឆ្នាំទៅមួយឆ្នាំ សម្តេចតេជោ បានជំរុញឱ្យមានកិច្ចសហប្រតិបត្តិការឱ្យបានខ្លាំងថែមទៀត លើវិស័យទេសចរណ៍នៃប្រទេសទាំងពីរ៕
ចែករំលែកព័តមាននេះ