ទីក្រុងបាងកក ៖ ប្រភពពីក្រសួងហិរញ្ញវត្ថុថៃបាននិយាយកាលពីថ្ងៃសុក្រថា ការមិនយកពន្ធសម្រាប់ការទិញទំនិញចុងឆ្នាំដើម្បីជំរុញដល់សេដ្ឋកិច្ច អាចនឹងកើតមានឡើងម្តងទៀតក្នុងឆ្នាំនេះ ទៅតាមសំណើរបស់លោកនាយករដ្ឋមន្ត្រី Prayut Chan-o-cha ។
ប្រភពខាងលើនិយាយថា ៖« សំណើនេះនឹងឆ្លងកាត់ក្រុមប្រឹក្សាគណៈរដ្ឋមន្ត្រីក្នុងពេលឆាប់ៗ» ។ វិធានការនេះអាចនឹងប្រកាសនៅខែក្រោយ ។ ការមិនយកពន្ធលើការទិញទំនិញ នឹងកើតមានឡើងក្នុងរយៈពេល២សប្តាហ៍ចុងក្រោយនាខែធ្នូ ។
យោងតាមប្រភពនេះឲ្យដឹងថា នាយកដ្ឋានប្រាក់ចំណូល និងក្រសួងហិរញ្ញវត្ថុបានចរចាពីវិធានការនេះ ហើយពួកគេយល់ស្របថា នឹងអនុម័តវាម្តងទៀតក្នុងឆ្នាំ២០១៧ ។
បុគ្គលម្នាក់ៗអាចនឹងចំណេញមិនបង់ពន្ធដល់ទៅ៤៥០ដុល្លារឯណោះសម្រាប់ទំនិញដែលធ្លាប់តែគិតពន្ធ ។ វាដូចគ្នានឹងអត្រាកាលពីឆ្នាំមុន ។
នៅក្រោមវិធានការនេះ ការទិញត្រូវកើតមានឡើងក្នុងរយៈពេល២សប្តាហ៍ខាងលើ ហើយទំនិញ ឬសេវាកម្មទាំងនោះត្រូវជាទំនិញ និងសេវាកម្មដែលធ្លាប់គិតពន្ធ ។
អ្នកបង់ពន្ធត្រូវបង្កើតវិក្កយបត្រពន្ធសម្រាប់ផលិតផល និងសេវាកម្មដែលបានទិញដើម្បីទទួលបានអត្ថប្រយោជន៍នេះ នៅពេលពួកគេដាក់សំណើសុំពន្ធប្រាក់ចំណូលផ្ទាល់ខ្លួនក្នុងរវាងខែមករា និងខែមីនា ឆ្នាំក្រោយ ។
ប្រភពខាងលើបន្តថា ក្រសួងហិរញ្ញវត្ថុស្ទាក់ស្ទើរក្នុងការអនុម័តវិធានការនេះម្តងទៀត ព្រោះវាអាចនឹងធ្វើឲ្យរដ្ឋាភិបាលបាត់បង់ប្រាក់ចំណូលដល់ទៅ៣០០លានដុល្លារឯណោះ ។
លោកនាយករដ្ឋមន្ត្រីនិយាយថា គោលនយោបាយនេះនឹងជំរុញការចំណាយក្នុងស្រុក និងបង្កើនការលូតលាស់សេដ្ឋកិច្ច ។ លោកបន្តថា រដ្ឋាភិបាលបានប្រើប្រាស់វិធានការនេះក្នុងរយៈពេល២ឆ្នាំជាប់គ្នា ។ វាសំខាន់ណាស់ដើម្បីបង្កើនការចំណាយក្នុងស្រុក ។
លោកកត់សម្គាល់ថា ទស្សនវិស័យម៉ាក្រូសេដ្ឋកិច្ចអាចនឹងរឹងមាំក្នុងឆ្នាំនេះ ដោយសារការនាំចេញ និងការវិនិយោគឯកជននិងសាធារណៈ ។
កាលពីឆ្នាំ២០១៦ ក្រសួងហិរញ្ញវត្ថុបានអនុម័តវិធានការនេះក្នុងអំឡុងពីថ្ងៃទី១៤ ដល់៣១ ខែធ្នូ ខណៈឆ្នាំ២០១៥ ពួកគេអនុម័តវាតែ៧ថ្ងៃប៉ុណ្ណោះ ៕
ចែករំលែកព័តមាននេះ