ខេត្តប៉ៃលិន ៖ រហូតមកដល់ល្ងាច ថ្ងៃទី០៥ ខែវិច្ឆិកា ឆ្នាំ២០១៧ ទៅហើយយុវជនម្នាក់ដែលបានបាត់ខ្លួនអស់រយ:ពេល១យប់១ថ្ងៃ ដោយសារជម្ងឺសរសៃប្រសាទរើឡើងវិញនៅតែមិនទាន់ទទួលបានដំណឹងណាមួយនោះឡើយនោះទេ ដែលជាហេតុធ្វើឱ្យឪពុកម្តាយមានការព្រួយបារម្ភយ៉ាងខ្លាំងពីសុវត្ថិភាព ខណៈរូបគេបានជិះម៉ូតូ១គ្រឿងដោយអត់មានលុយជាប់នឹងខ្លួនឆ្ពោះទៅទិសខាងកើតបាត់ស្រមោល ។ ហេតុការណ៍យុវជនជម្ងឺសរសៃប្រសាទរើឡើងវិញបាត់ខ្លួននេះ បានកើតឡើងកាលពីវេលាម៉ោង២រសៀល ថ្ងៃទី០៤ ខែវិច្ឆិកា ឆ្នាំ២០១៧ ស្ថិតនៅក្នុងភូមិអូរតាពុកក្រោម សង្កាត់ទួលល្វា ក្រុងប៉ៃលិន ។
ប្រភពព័ត៌មានបានឱ្យដឹងថា យុវជនដែលបាត់ខ្លួនអស់រយ:ពេល១យប់១ថ្ងៃមិនទាន់ទទួលបានដំណឹងឈ្មោះ ហាក់ ជូឡុង អាយុ២២ឆ្នាំ ជាអតីតនិស្សិតឆ្នាំទី២ រៀននៅសកលវិទ្យាល័យមួយក្នុងរាជធានីភ្នំពេញ ជាកូនទី១ក្នុងចំណោមបងប្អូន៣នាក់ រស់នៅភូមិកើតហេតុខាងលើមានឪពុកឈ្មោះ សេង ហាក់ អាយុ៥៥ឆ្នាំ ម្តាយឈ្មោះ ស៊ាង សុធារី អាយុ៤៣ឆ្នាំ ទាំងអស់គ្នារស់នៅក្នុងភូមិកើតហេតុ ។
ប្រភពព័ត៌មានពីឪពុកម្តាយយុវជនដែលបាត់ខ្លួនបានឱ្យដឹងថា កូនប្រុសរបស់គាត់បានប្រឡងជាប់ថ្នាក់ទី១២កាលពីប៉ុន្មានឆ្នាំកន្លងទៅហើយក៏បានទៅរៀនបន្តនៅសាកលវិទ្យាល័យមួយក្នុងរាជធានីភ្នំពេញលុះរៀនរហូតដល់ឆ្នាំទី២ ស្រាប់តែកូនប្រុសរបស់គាត់ក្លាយទៅជាដេកអត់លក់ដើរចុះឡើងៗមានសតិមិនប្រក្រតីដោយឃើញមនុស្សចេះតែមានការភ័យខ្លាចរហូតដល់ខ្លាចឪពុកខ្លួនឯងថែមទៀតផង ។ ក្រោយមកគាត់ក៏ឱ្យផ្អាករៀនសូត្រដោយព្យួរឈ្មោះចោលអស់រយៈពេលជាង១ឆ្នាំកន្លងមកហើយរួចយកត្រឡប់ទៅផ្ទះវិញដើម្បីធ្វើការព្យាបាលជម្ងឺ ។ ប្រភពបន្តទៀតថា ដោយសារការប្រើថ្នាំជម្ងឺផ្លូវចិត្តច្រើនពេក លុះពេលឃើញកូនមានស្មារតីប្រសើរឡើងវិញពួកគាត់ក៏ឱ្យផ្អាកលេបថ្នាំនោះបន្តទៀត ។ ស្រាប់តែនៅរសៀលថ្ងៃកើតហេតុ ខណៈពួកគាត់កំពុងតែជាប់រវល់ធ្វើការងារ ដោយទុកម៉ូតូនៅក្នុងផ្ទះស្រាប់តែយុវជនខាងលើបានទាញយកកូនសោចាក់ជិះឆ្ពោះទៅទិសខាងកើតយ៉ាងលឿន ហើយភ្លាមៗនោះក៏នាំគ្នាជិះម៉ូតូដេញតាមដែរតែមិនឃើញនោះឡើយដោយរូបគេពាក់អាវក្រៅដៃវែង ពណ៌ប្រផេះក្រឡាល្អិត និងពាក់អាវយឺតកីឡាខាងក្នុងពណ៌ខៀវ ជិះម៉ូតូម៉ាកឌ្រីម ពណ៌ខ្មៅ ស៊េរីឆ្នាំ២០១៤ ស្លាកលេខ ប៉ៃលិន ១C-០៥៧៥ ។ ដូច្នេះពួកគាត់ទាំងអស់គ្នាពិតជាមានការព្រួយបារម្ភយ៉ាងខ្លាំងពីសុវត្ថិភាពកូនរបស់ខ្លួនដោយបានដាក់ពាក្យបណ្តឹងទៅប៉ុស្តិ៍នគរបាលសង្កាត់ទួលល្វាឱ្យជួយស្រាវជ្រាវរកកូនរបស់ខ្លួនផងដែរ ៕
ចែករំលែកព័តមាននេះ