រាជធានីភ្នំពេញ ៖ កំណើនភ្ញៀវទេសចរអន្តរជាតិមកកាន់ប្រទេសកម្ពុជា កាន់តែច្រើនឡើងៗពីមួយឆ្នាំទៅមួយឆ្នាំ ។ ក្រសួងទេសចរណ៍បានព្យាករថា នៅឆ្នាំ២០២០ខាងមុខនេះ ភ្ញៀវទេសចរអន្តរជាតិមកដល់ប្រទេសកម្ពុជា នឹងកើនឡើងដល់៧លាននាក់ ក្នុងនោះភ្ញៀវចិន…
រាជធានីភ្នំពេញ ៖ កំណើនភ្ញៀវទេសចរអន្តរជាតិមកកាន់ប្រទេសកម្ពុជា កាន់តែច្រើនឡើងៗពីមួយឆ្នាំទៅមួយឆ្នាំ ។ ក្រសួងទេសចរណ៍បានព្យាករថា នៅឆ្នាំ២០២០ខាងមុខនេះ ភ្ញៀវទេសចរអន្តរជាតិមកដល់ប្រទេសកម្ពុជា នឹងកើនឡើងដល់៧លាននាក់ ក្នុងនោះភ្ញៀវចិន រំពឹងថា នឹងមានកំណើនលើសពី២លាននាក់ ។ កត្តាទាំងនេះហើយដែលកម្ពុជាត្រូវការធនធានមនុស្សលើវិស័យទេសចរណ៍ ដើម្បីឱ្យសេវាកម្មពាក់ព័ន្ធនឹងទេសចរណ៍កាន់តែមានភាពល្អប្រសើរ និងទទួលបានការគាំទ្រពីភ្ញៀវទេសចរអន្តរជាតិ។
ថ្លែងនៅក្នុងវេទិកាថ្នាក់ជាតិ ស្តីពីការពង្រឹងឧស្សាហកម្មទេសចរណ៍កម្ពុជាសម្រាប់ទីផ្សារចិន កាលពីព្រឹកថ្ងៃទី៣១ តុលា នៅសណ្ឋាគារសុខាភ្នំពេញ លោក ថោង ខុន រដ្ឋមន្ត្រីក្រសួងទេសចរណ៍ បានមានប្រសាសន៍ថា ទេសចរណ៍កម្ពុជា ត្រូវបានចាត់ទុកជាវិស័យអាទិភាពមួយ ដើរតួនាទីជាមាសបៃតង រួមចំណែកដល់ការអភិវឌ្ឍសេដ្ឋកិច្ច សង្គម និងការការពារបរិស្ថាន ពោលគឺចូលរួមដល់ការកសាងសេដ្ឋកិច្ចបៃតងនៅកម្ពុជា ដែលជាផ្នែកមួយគាំទ្រការសម្រេចបាននូវគោលដៅអភិវឌ្ឍន៍ប្រកបដោយចីរភាព។
លោកថា ៖« ឆ្នាំ២០១៦ យើងសម្រេចបានកំណើនក្នុងអត្រា៥% ជាមួយនឹងការមកដល់នៃភ្ញៀវទេសចរអន្តរជាតិប្រមាណជាង៥លាននាក់ និងនាំប្រាក់ចំណូលប្រមាណ៣.៤០០លានដុល្លារអាមេរិកចាក់បញ្ចូលក្នុងសេដ្ឋកិច្ចជាតិ រួមចំណែកប្រមាណ១៣% នៃផលិតផលក្នុងស្រុកសរុប និងបង្កើតការងារដោយផ្ទាល់ប្រមាណ៦២ម៉ឺននាក់ » ។
លោកបន្តថា រយៈពេល៨ខែ ឆ្នាំ២០១៧ កម្ពុជាទទួលបានភ្ញៀវអន្តរជាតិចំនួន ៣.៥៣៦.៥៣០នាក់ កើន១១,៨% និងរំពឹងថា នឹងទទួលបាន៥,៦លាននាក់នៅដំណាច់ឆ្នាំ២០១៧ ហើយឆ្នាំ២០២០រំពឹងថា នឹងទទួលបានភ្ញៀវអន្តរជាតិ៧លាននាក់ ដែលអាចនាំចំណូលសរុបប្រមាណ៥ពាន់លានដុល្លារអាមេរិក ព្រមទាំងបង្កើតការងារបាន១លាននាក់។ លោកថា ៖« ស្របតាមកំណើននៃភ្ញៀវទេសចរអន្តរជាតិមកដល់ប្រទេសកម្ពុជាកើនជាបន្តបន្ទាប់ដូចនេះ យើងត្រូវការធនធានមនុស្សលើវិស័យនេះប្រមាណ១លាននាក់នៅឆ្នាំ២០២០ និងប្រមាណ២លាននាក់នៅឆ្នាំ២០៣០ ដែលទាមទារឲ្យធនធានមនុស្សលើវិស័យមួយនេះត្រូវមានជំនាញ និងចំណេះដឹងពាក់ព័ន្ធ ដើម្បីបម្រើសេវាកម្មផ្សេងៗជូនភ្ញៀវទេសចរអន្តរជាតិទាំងនោះ » ។
លោកបន្ថែមថា បច្ចុប្បន្ននេះ ចិនគឺជាទីផ្សារធំសម្រាប់វិស័យទេសចរណ៍របស់កម្ពុជា ហើយថ្ងៃខាងមុខ ចិនក៏នៅតែជាទីផ្សារធំដដែល។ ក្រៅពីនេះ ទេសចរចិនក៏បានទៅទស្សនានៅតាមបណ្ដាប្រទេសជាច្រើនទៀត ទាំងនៅអាស៊ី និងអឺរ៉ុប ហើយពិភពលោកកំណត់យកចិន ជាទីផ្សារទេសចរណ៍សំខាន់មួយ ។ លោកនិយាយថា ៖« បច្ចុប្បន្ន ទីផ្សារលើវិស័យទេសចរណ៍សម្រាប់កម្ពុជា ៧០%ជាទេសចរមកពីអាស៊ី, ១៧%មកពីអឺរ៉ុប និងប្រមាណ១០% ទេសចររបស់អាមេរិក ក្នុងនោះចិនជាប់ចំណាត់ថ្នាក់លេខ១ ។ ដូចនេះ សម្រាប់អនាគតអ្នកចេះភាសាចិន ពិតជាល្អណាស់នៅក្នុងវិស័យទេសចរណ៍ ហើយយើងក៏គួរតែបណ្ដុះបណ្ដាលធនធានមនុស្សសម្រាប់ទីផ្សារចិនផងដែរ » ។
លោក អ៊ូច សំបូរ នាយកសាលាបណ្ដុះបណ្ដាលវិជ្ជាវិជ្ជៈដុនបូស្កូ ខេត្តព្រះសីហនុ ដែលមានបណ្ដុះបណ្ដាលលើជំនាញវិស័យសណ្ឋាគារ និងបដិសណ្ឋារកិច្ចផងនោះ បានឱ្យដឹងថា ក្នុង១ឆ្នាំៗ សិស្សរៀនចប់ពីសាលា មិនមានសិស្សណាម្នាក់អត់ការងារធ្វើ ឬពិបាកស្វែងរកការងារទេ ។ លោកថា ៖« ធម្មតា សិស្សរៀននៅសាលានេះមានរយៈពេល២ឆ្នាំ ហើយនៅពេលសិស្សជិតចប់ តែងតែមានក្រុមហ៊ុន ឬស្ថាប័នផ្សេងៗមកទាក់ទងទៅធ្វើការងារភ្លាម ហើយក៏មានក្រុមហ៊ុន និងស្ថាប័នមួយចំនួនមកសុំឲ្យសិស្សចេញទៅហ្វឹកហាត់មុនបញ្ចប់ការសិក្សាទៅទៀត » ។
តាមការបញ្ជាក់ពីរដ្ឋមន្ត្រីក្រសួងទេសចរណ៍ អនាគតនៃវិស័យទេសចរណ៍កម្ពុជា មិនអាចកាត់ផ្ដាច់ចេញពីការស្រូបទាញកំណើនយ៉ាងគំហុកនៃលំហូរទេសចរចេញក្រៅរបស់ភ្ញៀវទេសចរចិន ក្នុងបរិបទកំណើនទេសចរណ៍ជារួមរបស់តំបន់អាស៊ីប៉ាស៊ីហ្វិក និងសកលលោក ។
លោក ហូ វណ្ឌី ទីប្រឹក្សាសមាគមទេសចរណ៍កម្ពុជា បានឲ្យដឹងថា ទេសចរណ៍ជាឧស្សាហកម្មគ្មានផ្សែង និងអាចរកចំណូលបានច្រើនក្នុង១ឆ្នាំៗពីវិស័យនេះ ។
ជាក់ស្ដែង ប្រទេសរៀបចំបានស្អាតល្អ ទាក់ទាញបានកំណើនទេសចរណ៍ច្រើន ប្រទេសនោះនឹងទទួលបានចំណូលច្រើនពីវិស័យទេសចរណ៍ ។
តាមការព្យាកររបស់ធនាគារពិភពលោក ក៏បានឲ្យដឹងដែរថា កំណើនសេដ្ឋកិច្ចកម្ពុជាមានភាពរឹងមាំ សេវាកម្មទេសចរណ៍មានកំណើន ប៉ុន្តែវិស័យផ្សេងៗហាក់មានកំណើនថមថយបន្តិច ដូចជា វិស័យកាត់ដេរសម្លៀកបំពាក់ជាដើម ៕
ចែករំលែកព័តមាននេះ