ខេត្តតាកែវ ៖ មន្ត្រីយោធាម្នាក់ត្រូវប៉ូលិសចាប់ខ្លួនបញ្ជូនមកអធិការដ្ឋាននគរបាលស្រុកដើម្បីចាត់ការបន្ត ចំណែកជនសង្ស័យម្នាក់ទៀតបានរត់គេចខ្លួនបាត់ ខណៈដែលជនសង្ស័យដែលបានរត់គេចខ្លួនបានឈ្លោះប្រកែកគ្នាជាមួយឪពុករបស់ខ្លួនហើយកូនប្រសារដែលជាមន្ត្រីយោធាបានឃើញ រួចដកកាំភ្លើងខ្លីបាញ់គំរាមចំនួន២គ្រាប់ដើម្បីកុំឱ្យជនសង្ស័យជាប្អូនថ្លៃនោះឈ្លោះគ្នាជាមួយឪពុករបស់ខ្លួន ។ ហេតុការណ៏នេះបានកើតឡើងកាលពីវេលាម៉ោង១១និង៣០នាទីរសៀល ថ្ងៃទី៤ ខែវិច្ឆិកា ឆ្នាំ២០១៧ ភូមិតាស្រែនឃុំខ្វាវ ស្រុកទ្រាំង ខេត្តតាកែវ ។
លោកវរសេនីយ៍ត្រី ប៉ិច វណ្ណា អធិការរងនគរបាលស្រុកទ្រាំងបានឱ្យដឹងថា បន្ទាប់ពីទទួលព័ត៌មានករណីឈ្លោះប្រកែកគ្នារវាងឪពុក និងកូនបង្កើតលោកបានដឹកនាំកំលាំងចុះដោយមានប្រើប្រាស់អាវុធបង្កឡើងដោយជនសង្ស័យឈ្មោះ ឆេង មករា ភេទប្រុស អាយុ២៣ឆ្នាំរស់នៅភូមិ-ឃុំកើតខាងលើមានមុខរបរកសិករប្រដាប់ដោយកាំបិតកែច្នៃបានទៅកាប់បំផ្លាញផ្លែចេករបស់ឈ្មោះ ឆេង ហឿន អាយុ៥៨ឆ្នាំ រស់នៅភូមិ-ឃុំជាមួយគ្នាមានមុខរបរកសិករ(ត្រូវជាឪពុក) ។ លោកបន្តទៀតថា ពេលនោះក៏មានការឈ្លោះប្រកែកគ្នាឈ្មោះ ឆេង មករា បានចោលកាំបិតសំដៅទៅឪពុកតែមិនបានត្រូវទេ ឃើញដូច្នេះជនសង្ស័យឈ្មោះឡោ ប៊ុនភ័ក្ត្រ ភេទប្រុស អាយុ៤២ឆ្នាំ រស់នៅជាមួយឪពុកក្មេក ឆេង ហឿន មានមុខរបរ ជាយោធាដែលមានអត្តលេខ៣៨៦៨ នៅកងពលង៧០ ប្រដាប់ដោយអាវុធខ្លីម៉ាករ៉ូឡូបានបាញ់ចំនួនពីរគ្រាប់ឡើងលើពុំបណ្តាលឱ្យមានអ្នកណារងរបួសស្នាមទេ ។
លោកអធិការស្តីទីបានបន្ថែមទៀតថា ពេលចុះទៅដល់កន្លែងកើតហេតុជំនាញបានធ្វើការឃាត់ខ្លួនជនសង្ស័យឈ្មោះ ឡោ ប៊ុនភ័ក្ត្រ និងដកហូតវត្ថុតាងបានអាវុធខ្លីចំនួន១ដើម គ្រាប់ចំនួន៣គ្រាប់ និងសំបកគ្រាប់ចំនួន២គ្រាប់ កាតសំគាល់ខ្លួនមួយច្បាប់ កាំបិតកែច្នៃ១ ចំណែកឯជនសង្ស័យឈ្មោះ ឆេង មករា បានរត់គេចខ្លួនបាត់ ៕
ចែករំលែកព័តមាននេះ