រាជធានីភ្នំពេញ ៖ មុខរបរដើរបាញ់សត្វ និងទាក់ចាប់សត្វ ទោះបីប្រើវិធីណាមួយក៏ដោយ ត្រូវច្បាប់ហាមឃាត តែគេនៅតែឃើញព្រានដើរទាក់សត្វគ្រប់ប្រភេទ ទាំងនៅក្នុងព្រៃជ្រៅ ក្នុងភូមិនានា ក៏ដូចជានៅជាយរាជធានីភ្នំពេញ។ សត្វទាំងនោះត្រូវគេយកលក់ធ្វើម្ហូមនៅតាមទីផ្សារនានាទូទាំងប្រទេស និងខ្លះទៀត ដូចជាចាបស្រុកជាដើមត្រូវគេយកមកលក់ដើម្បីឲ្យពុទ្ធបរិស័ទទិញលែងជាការបំពេញនូវកុសល ។
ការទាក់សត្វចាបស្រុកខ្លះបានប្រើវិធី ផ្សេងៗ ដើម្បីចាប់ ដូចជាវាយលប់ជាដើម ។ អ្វីដែលមានការចាប់អារម្មណ៍នៅពេលបច្ចុប្បន្ននេះ មានក្រុមអ្នកប្រមាញ់សត្វទាំងបានប្រើជ័រ ដើម្បីចាប់សត្វចាបស្រុក នៅតាមតំបន់នានានៅជាយរាជធានីភ្នំពេញ ដែលវិធីនេះកំពុងតែពេញនិយមសម្រាប់អ្នករស់នៅខណ្ឌច្បារអំពៅ ដែលបានចេះ តៗគ្នា ពីជនជាតិវៀតណាម ។
ជួបជាមួយអ្នកប្រមាញ់សត្វ២នាក់សូមមិនបញ្ចេញឈ្មោះដែលដើរទាក់ចាប់សត្វចាបស្រុកនៅខាងត្បូងស្នងការដ្ឋាននគរបាលរាជធានីភ្នំពេញក្នុងខណ្ឌឫស្សីកែវ ឱ្យដឹងកាលពីពេលថ្មីៗកន្លងមកថា ជារៀងរាល់ថ្ងៃរូបគេបានជិះម៉ូតូពីតំបន់មួយទៅតំបន់មួយនៅជាយរាជធានីភ្នំពេញដើម្បីទាក់សត្វដែលក្នុងមួយថ្ងៃបានប្រមាណ១០០ក្បាល និងពេលខ្លះរហូតដល់២០០ក្បាល ។ ការយកទៅលក់ សត្វចាបស្រុកមួយ១ក្បាលថ្លៃ១ពាន់រៀល ដោយមានម៉ូយចាំទិញនៅគល់ស្ពានច្បារអំពៅ ភាគខាងកើតជារៀងរាល់ថ្ងៃ ។
តាមអ្នកប្រមាញ់សតម្នាក់បានឲ្យដឹងទៀតថា វិធីចាប់សត្វនេះចេះមកពីជនជាតិវៀតណាម ហើយគេបានទៅទិញជ័រកាវចាប់សត្វនៅច្បារអំពៅ ព្រមទាំងទិញស្ទិកឃ័រមួយក្នុងតម្លៃ៥ម៉ឺនរៀល ដែលមានមេម៉ូរីចាក់សំឡេងចាបស្រុក និងកូនស្រែកចេកចាយយំ ជាហេតុធ្វើឱ្យចាប់ស្រុកទាំងហ្វូង មកទំលើដែកដែលដាក់ជ័របណ្តាលឲ្យស្អិតជាប់ ។
តាមអ្នកប្រមាញ់សត្វរូបនោះឱ្យដឹងទៀតថា នៅវេលាម៉ោងប្រមាណព្រឹកគេចេញដំណើរពីផ្ទះនៅក្នុងខណ្ឌច្បារអំពៅឆ្ពោះទៅខណ្ឌដង្កោ ខណ្ឌពោធិ៍សែនជ័យ ខណ្ឌសែនសុខ និងខណ្ឌឫស្សីកែវដើម្បីដើរទាក់សត្វ ។
ពេលគេចេញពីភូមិមួយទៅភូមិមួយ លុះរកទីតាំងដែលមានសត្វច្រើនហើយ ក៏ដាក់ដែកមានដងដែលបំពាក់ដោយជ័រដាក់កៀនរបង និងបើកស្ទិកឃ័រសំឡេងកូនចាបយំ ។ចាបស្រុកទាំងហ្វូង បានហើរឆ្វេចឆ្វាច និងទំលើដែកមានជ័រ ហើយក្នុងរយៈពេលប្រមាណមិនដល់១០នាទីផងក៏ជាប់សត្វប្រមាណជិត១០ក្បាល និងកន្លែងខ្លះទៀតជាប់ជាង១០ក្បាល ។
តាមព្រានរូបនោះឱ្យដឹងថា សត្វចាបស្រុកនោះពេលទាក់បានស្រួលលក់ណាស់ ដោយមានម៉ូយចាំទិញ ក្នុងចាបមួយ១ពាន់រៀល ហើយគេយកទៅលក់ឱ្យគេលែងនៅតាមវត្ត និងមុខវាំងក្នុងមួយក្បាល២ពាន់រៀល ។ នៅក្នុងមួយថ្ងៃគាត់រកបានចំណូលបានពី១៥ម៉ឺនទៅ២០ម៉ឺនរៀល ៕
ចែករំលែកព័តមាននេះ