វេបសាយ « News Detik »របស់ឥណ្ឌូណេស៊ីកាលពីពេលថ្មីៗកន្លងមកផ្សាយថា មហាជនទូទៅសម្តែងការភ្ញាក់ផ្អើលតាមអ៊ីនធើរណេតទៅលើអាពាហ៍ពិពាហ៍ដ៏ចម្លែកមួយ គឺកូនកំលោះម្នាក់ និងកូនក្រមុំដល់ទៅ២នាក់ឯណោះ។ រឿងដ៏កម្រកើតមាននេះមហាជនចាប់អារម្មណ៍ខ្លាំង ហើយបង្ហោះបន្តតាមហ្វេសប៊ុកជាមួយការរិះគន់ថា គឺជាការមើលស្រាលដល់កិត្តិយសរបស់ស្ត្រីភេទ ។ បុរសនោះគួរឈ្វេងយល់ពីការមានប្រពន្ធម្នាក់ជាលើកដំបូងសិន មុននឹងមានប្រពន្ធទី២នៅពេលក្រោយ ។
មហាជនរិះគន់ពីការរៀបអាពាហ៍ពិពាហ៍របស់ពួកគេទាំង៣នាក់ ហើយមានអ្នកខ្លះឆ្ងល់ថា ធៀបការនេះអាចមិនមែនជាការណ៍ពិត តែជារឿងដែលគេប្រឌិតលេង ។ ពិធីរៀបអាពាហ៍ពិពាហ៍នោះនឹងរៀបចំឡើងនៅភូមិ Teluk Kijing ខេត្តស៊ូម៉ាត្រាខាងត្បូង ប្រទេសឥណ្ឌូណេស៊ី ។
កូនកំលោះឈ្មោះCindra នឹងរៀបការជាមួយកូនក្រមុំ២នាក់ ដោយរៀបចំដាច់ដោយឡែកពីគ្នា ប៉ុន្តែប្រើប្រាស់ធៀបការតែមួយ។ លើកដំបូងរៀបចំឡើងនៅថ្ងៃទី៥ វិច្ឆិកា និងលើកទី២នៅថ្ងៃទី៨ វិច្ឆិកា ២០១៧ ក្រោយមកនឹងប្រារព្ធពិធីកាត់ចំណងដៃដ៏ធំមួយទៀត នៅថ្ងៃទី៩ វិច្ឆិកា ២០១៧ ។
កូនក្រមុំម្នាក់ជាអ្នករស់នៅក្នុងភូមិតែមួយ ជាមួយកូនកំលោះ ចំណែកកូនក្រមុំម្នាក់ទៀតនៅភូមិផ្សេង ។ កូនកំលោះបានណែនាំដល់កូនក្រមុំទាំង២នាក់ និងក្រុមគ្រួសាររបស់ពួកនាងរួចរាល់ហើយ ដោយពួកគេម្នាក់ៗសម្តែងការយោគយល់ និងយល់ព្រមឱ្យពិធីរៀបការកើតឡើង ។
ប្រធានភូមិនិយាយថា នេះមិនមែនជាករណីលើកដំបូងទេ កាលពីអតីតកាលក៏ធ្លាប់មានបុរសរៀបការក្នុងកន្លែងតែមួយ ជាមួយកូនក្រមុំចំនួន២នាក់ដែរ ។ ករណីបែបនេះកើតឡើងរួចមកហើយដល់ទៅ៣លើក ៕
ចែករំលែកព័តមាននេះ