រាជធានីភ្នំពេញ ៖ កាលពីប៉ុន្មានឆ្នាំមុន អ្នករត់ម៉ូតូកង់បី ជាអ្នកដណ្ដើមម៉ូយ និងដណ្ដើមទីផ្សារអ្នករត់ម៉ូតូឌុប ដោយសារតែមើលទៅសុវត្ថិភាពជាង និងមានដំបូលការពារកំដៅថ្ងៃ ឬភ្លៀងជាដើម ពិសេសគឺអាចជិះបានច្រើននាក់…
រាជធានីភ្នំពេញ ៖ កាលពីប៉ុន្មានឆ្នាំមុន អ្នករត់ម៉ូតូកង់បី ជាអ្នកដណ្ដើមម៉ូយ និងដណ្ដើមទីផ្សារអ្នករត់ម៉ូតូឌុប ដោយសារតែមើលទៅសុវត្ថិភាពជាង និងមានដំបូលការពារកំដៅថ្ងៃ ឬភ្លៀងជាដើម ពិសេសគឺអាចជិះបានច្រើននាក់ ឬដឹកអីវ៉ាន់បានច្រើនទៀតផង ប៉ុន្ដែបន្ទាប់ពីមានការនាំចូលតាក់ស៊ីកង់បីពីប្រទេសឥណ្ឌា(Bajaj) ដែលគេនិយមហៅថា កង់បីឥណ្ឌាមក វាបាននិងកំពុងវាយលុកដណ្ដើមម៉ូយពីអ្នករត់ម៉ូតូកង់បីខ្មែរវិញម្ដង ។ មិនត្រឹមតែប៉ុណ្ណោះ ធ្វើឲ្យអ្នករត់ម៉ូតូកង់បីខ្មែរបាត់ចំណូលបន្ដិចម្ដងៗថែមទៀត ។
លោក លាង ហួរ អ្នករត់ម៉ូតូកង់បីនៅរាជធានីភ្នំពេញ បានឱ្យដឹងថា ពេលនេះ ក្រុមអ្នករត់ម៉ូតូកង់បីខ្មែរបានប្រឈមខ្លាំងណាស់ ក្រោយពីរ៉ឺម៉កឥណ្ឌាចូលមក ដោយបាត់បង់ភ្ញៀវជាបន្តបន្ទាប់ ។ លោកថា ៖« រ៉ឺម៉កឥណ្ឌាវាប្រើហ្គាសត្រូវចំណាយតិច ដូច្នេះ គេយកតម្លៃសេវាទាបជាង ហើយបើយើងយកតម្លៃទាបដូច គេនោះ មិនសល់លុយសម្រាប់ផ្គត់ផ្គង់គ្រួសារទេ ព្រោះម៉ូតូយើងប្រើសាំង » ។
លោកបន្តថា កាលពីមុន សម្បូរភ្ញៀវជិះម៉ូតូកង់បីខ្មែរ បើទោះបីជានៅចាំតែមួយកន្លែង ក៏មានភ្ញៀវជិះដែរ តែឥឡូវពិបាកបន្ដិច ក្រោយពេលតាក់ស៊ីកង់បីឥណ្ឌាចូលមក ហើយគេមានដាក់ប្រព័ន្ធបច្ចេកវិទ្យា ដែលអាចឲ្យភ្ញៀវទូរស័ព្ទហៅបានទៀតនោះ ធ្វើឲ្យអ្នករត់ម៉ូតូកង់បីខ្មែរកាន់តែបាត់បង់ភ្ញៀវបន្តិចម្ដងៗ ។
លោកថា ៖« ខ្ញុំចង់ផ្លាស់ប្ដូរទៅប្រើរ៉ឺម៉កឥណ្ឌាដែរ ព្រោះវាមើលទៅស្ដង់ដាជាងរ៉ឺម៉កកង់បីយើង និងមានសុវត្ថិភាពសម្រាប់ភ្ញៀវជាង ពិសេសគឺប្រើហ្គាស ហើយតម្លៃហ្គាសក៏ថោកជាងតម្លៃសាំងដែរ អីចឹង យើងអាចយកតម្លៃពីភ្ញៀវទាប និងដឹកបានច្រើន » ។ លោកថា ៖« បើតាមខ្ញុំដឹង តម្លៃរ៉ឺម៉កឥណ្ឌានេះបានឡើងថ្លៃជាងមុនទៀតហើយ កាលពីមុនជាង២ពាន់ដុល្លារប៉ុណ្ណោះ តែថ្មីៗនេះឮថា ឡើងដល់ជិត៣ពាន់ដុល្លារអាមេរិកទៅហើយ » ។
លោក ឯ សុភាស់ ប្រធានសមាគមរួមគ្នាដើម្បីអភិវឌ្ឍន៍កម្ពុជា បានឱ្យដឹងថា ជាការពិតអ្នកប្រើប្រាស់រ៉ឺម៉កពីឥណ្ឌា អាចរកចំណូលបានច្រើនជាងអ្នកប្រើប្រាស់រ៉ឺម៉កខ្មែរ ។ ជាក់ស្ដែងសមាជិករបស់សមាគមប្រមាណ១០% ដែលមានលទ្ធភាពទិញរ៉ឺម៉កឥណ្ឌាមកធ្វើអាជីវកម្ម អាចរកចំណូលបានច្រើនជាងអ្នករត់កង់បីចាស់ៗពីមុន ។
លោកថា ៖« អត្ថប្រយោជន៍រ៉ឺម៉កឥណ្ឌាចំពោះអ្នកប្រើប្រាស់ វាអាចសន្សំសំចៃថាមពល និងបំពាក់បច្ចេកវិទ្យា ដែលអាចឲ្យភ្ញៀវស្វែងរកតាម Apps បាន » ។ លោកបន្តថា ៖« ជាការកត់សម្គាល់មួយដែរ រ៉ឺម៉កកង់បីខ្មែរដែលឈប់ចាំអ្នកដំណើរមុខសណ្ឋាគារមួយ មិនមានភ្ញៀវហៅជិះ តែបែរជាហៅរ៉ឺម៉កឥណ្ឌាដែលបំពាក់ Apps ពីណាពីណីមកជិះទៅវិញ ព្រោះភ្ញៀវក្នុងសណ្ឋាគារ គេបានស្វែងរករ៉ឺម៉កនោះតាមទូរស័ព្ទដៃស្មាតហ្វូន។ ទាំងនេះហើយដែលជាបញ្ហាប្រឈមកាន់តែខ្លាំងចំពោះប្រាក់ចំណូលសម្រាប់អ្នករត់កង់បី » ។
លោកបានជំរុញឱ្យសមាជិកអ្នកប្រកបអាជីវកម្មដឹកជញ្ជូនខ្នាតតូច និងឯកជន ដូចជា ម៉ូតូឌុប និងម៉ូតូកង់បី ផ្លាស់ប្តូរទៅតាមការវិវត្តជាក់ស្ដែងនៃទីផ្សារបច្ចុប្បន្ន ដោយត្រូវចេះបត់បែនទៅតាមកាលៈទេសៈ ។ បើពេលនេះគេប្រើរ៉ឺម៉កឥណ្ឌា ឬតាក់ស៊ីបំពាក់បច្ចេកវិទ្យារកចំណូលបានច្រើន ពួកគេគួរតែប្តូរមកប្រើរ៉ឺម៉កឥណ្ឌា ឬតាក់ស៊ីវិញ ។ លោកថា ៖« យើងដឹងថា ការផ្លាស់ប្តូរ ឬអភិវឌ្ឍន៍អាជីវកម្មវាត្រូវការដើមទុន តែបើសិនជាខ្វះដើមទុន អាចរកកម្ចីពីមីក្រូហិរញ្ញវត្ថុណាជាដៃគូរបស់សមាគមដែលមានស្រាប់ ។ ជាក់ ស្ដែងថ្មីៗនេះ សមាគមយើងបានសហការជាមួយក្រុមហ៊ុនពីជប៉ុនមួយធានាផ្ដល់កម្ចីដល់អ្នកប្រកបរបររត់តាក់ស៊ី កង់បី អភិវឌ្ឍន៍អាជីវកម្មឲ្យកាន់តែទំនើប ដើម្បីឱ្យប្រាក់ចំណូលកាន់តែច្រើនឡើង » ។
ប្រធានសមាគមរូបនេះបានឱ្យដឹងថា លោកបានត្រៀមរួចជាស្រេចដើម្បីជួយសមាជិក និងអ្នកប្រកបរបរដឹកជញ្ជូនខ្នាតតូចឲ្យមានរបៀបត្រឹមត្រូវ ខណៈវិស័យដឹកជញ្ជូនរបស់រដ្ឋក៏កំពុងពង្រីកជាបន្តបន្ទាប់ ក្នុងនោះដូចជា រថយន្តក្រុងរបស់សាលារាជធានីភ្នំពេញ បានពង្រីកជាច្រើនខ្សែក្នុងរាជធានីភ្នំពេញ ។
លោកថា ៖« ដើម្បីឲ្យអាជីវកម្មពួកគាត់ នៅតែអាចរកចំណូលបាន យើងត្រូវរៀបចំចំណតត្រឹមត្រូវ នៅតាមចំណតរថយន្ដក្រុងរបស់រដ្ឋ និងនៅតាមកន្លែងកម្សាន្តធំៗជាដើម » ។
តំណាងក្រុមហ៊ុន Bajaj Re Cambodia ដែលជាអ្នកនាំចូលរ៉ឺម៉កឥណ្ឌា បានឱ្យដឹងថា បច្ចុប្បន្ន ការលក់បានកើនឡើងជាបន្តបន្ទាប់ ខណៈក្រុមហ៊ុនក៏មានគោលការណ៍បង់រំលស់ជាប្រចាំខែដែរ ដែលធ្វើឲ្យអ្នកប្រកបរបរដឹកជញ្ជូន មានលទ្ធភាពទិញប្រើប្រាស់បាន ។
បច្ចុប្បន្ន រ៉ឺម៉កឥណ្ឌានេះ មានតម្លៃ២.៦៥០ដុល្លារក្នុង១គ្រឿង ខណៈការនាំចូលដំបូងមានតម្លៃត្រឹមតែ២ពាន់ដុល្លារប៉ុណ្ណោះ ៕
ចែករំលែកព័តមាននេះ