រាជធានីភ្នំពេញ ៖ ការបំពាក់ស្លាកលេខរថយន្ដ និងម៉ូតូដែលមាន QR Code ពិតជាបានផ្ដល់អត្ថប្រយោជន៍ដល់ម្ចាស់យានយន្ដ និងងាយស្រួលដល់សមត្ថកិច្ចក្នុងការផ្ទៀងផ្ទាត់នៅពេលមានបញ្ហា ។
លោក ហ៊ាង សុន្ធាយុត្តិ ប្រធាននាយកដ្ឋានព័ត៌មាន និងទំនាក់ទំនងសាធារណៈនៃក្រសួងសាធារណការ និងដឹកជញ្ជូន បានឱ្យដឹងកាលពីថ្ងៃទី១ វិច្ឆិកា ថា បន្ទាប់ពីដាក់ឱ្យប្រើប្រាស់ជាផ្លូវការនូវស្លាកលេខរថយន្ត និងម៉ូតូប្រើ QR Code នៅខែកក្កដាឆ្នាំនេះមក មានរថយន្ត និងម៉ូតូសរុបប្រមាណ១០ម៉ឺនគ្រឿងបានប្រើប្រាស់។
លោកបន្ដថា ស្លាកលេខដែលមាន QR Code នេះ អាចឱ្យម្ចាស់យានយន្តផ្ទៀងផ្ទាត់ភាពត្រឹមត្រូវជាម្ចាស់កម្មសិទ្ធិ និងជៀសផុតពីការក្លែងបន្លំបាន ។
លោកបន្តថា ៖« ការប្រើប្រាស់បច្ចេកវិទ្យាQR Code នៅលើស្លាកលេខយានយន្តនេះ ផ្តល់ផលប្រយោជន៍ទៅដល់អ្នកប្រើប្រាស់រថយន្ត និងម៉ូតូអាចផ្ទៀងផ្ទាត់ភាពត្រឹមត្រូវទៅលើរថយន្ត និងម៉ូតូ កាត់បន្ថយការភ័យព្រួយរបស់ប្រជាពលរដ្ឋពីការលួចស្លាកលេខ និងផ្តល់ភាពងាយស្រួលដល់មន្ត្រីប៉ូលិសក្នុងការផ្ទៀងផ្ទាត់ពេលមានបញ្ហាអ្វីមួយកើតឡើង ។ តួយ៉ាង ស្លាកលេខម៉ូតូហុងដាឌ្រីម គេលួចទៅដាក់ (ប្រើ) នៅម៉ូតូស្កូបពី ពេលគេស្គេន QR Code ឃើញព័ត៌មានបង្ហាញថា ជាម៉ូតូហុងដាឌ្រីម អីចឹង ប៉ូលិសចាប់បាន ។ ជាងនេះទៀត នឹងជួយឱ្យសមត្ថកិច្ចងាយស្រួលផ្ទៀងផ្ទាត់ ព្រោះអ្នកខ្លះមានម៉ូតូថ្លៃ នាំមកគេចពន្ធ អត់ស្លាកលេខ បែរទៅយកស្លាកលេខម៉ូតូទើបតែចុះបញ្ជី ដែលមានម៉ាកខុសគ្នាមកប្រើប្រាស់ជាដើម » ។
លោកបញ្ជាក់ថា ស្លាកលេខរថយន្ត និងម៉ូតូដែលមាន QR Code ជាង១០ម៉ឺនគ្រឿង ក្នុងនោះ រថយន្តមានប្រមាណ៣,៥ម៉ឺនគ្រឿង និងម៉ូតូមានប្រហែល៧ម៉ឺនគ្រឿង ។ ស្លាកលេខប្រើ QR Code នេះចែកជា២ប្រភេទគឺ QR Code ប្រើនៅលើប័ណ្ណសម្គាល់ និង QR Code ប្រើលើស្លាកលេខរថយន្ត និងម៉ូតូ អាចបញ្ជាក់ភាពត្រឹមត្រូវស្របច្បាប់បានសម្រាប់អ្នកប្រើប្រាស់ ។
និស្សិតឆ្នាំទី១ នៃវិទ្យាស្ថានបច្ចេកវិទ្យាកម្ពុជា លោក ហុន វិចិត្រ បានឱ្យដឹងថា ៖«នៅពេលប្រើប្រាស់ម៉ូតូមានស្លាកលេខ QR Code នេះមានអារម្មណ៍ថា មានសុវត្ថិភាពជាង អ្នកប្រើប្រាស់ស្លាកលេខស៊េរីចាស់ ប្រសិនបើមានបញ្ហាអ្វីមួយវាពិបាកដោះស្រាយ ព្រោះមិនដឹងថា ស្លាកលេខនេះទិញ ឬយកមកពីណាមិនដឹង។ ប៉ុន្តែសម្រាប់ម៉ូតូមានស្លាកលេខ QR Code ពេលមានបញ្ហាអ្វីមួយអាចស្គេន QR Code ដើម្បីបញ្ជាក់ភាពត្រឹមត្រូវជាម្ចាស់កម្មសិទ្ធិបាន » ។
និស្សិតរូបនេះលើកឡើងថា ស្របពេលបច្ចេកវិទ្យាកាន់តែរីកចម្រើន ហើយអ្នកប្រើប្រាស់ម៉ូតូកាន់តែច្រើន ការដាក់ឱ្យមានស្លាកលេខម៉ូតូ ឬយានយន្តមាន QR Code ផ្តល់សុវត្ថិភាពសម្រាប់អ្នកប្រើប្រាស់ ងាយស្រួលក្នុងការគ្រប់គ្រង ។
ប្រធាននាយកដ្ឋានព័ត៌មាន និងទំនាក់ទំនងសាធារណៈនៃក្រសួងសាធារណការ និងដឹកជញ្ជូន មានប្រសាសន៍ថា អ្នកប្រើប្រាស់មានមោទនភាពក្នុងការប្រើប្រាស់ស្លាកលេខនេះ ដែលមានគេទទួលស្គាល់ថា ជារបស់ពិតប្រាកដ ខុសពីពេលមុន មានស្លាកលេខហើយ នៅតែមិនដឹងថាពិត ឬមិនពិត ។ ស្លាកលេខទម្រង់ QR Code ថ្មីនេះ បង្កើនការទុកចិត្តឱ្យអ្នកប្រើប្រាស់ ជួយឱ្យប៉ូលិសងាយស្រួលផ្ទៀងផ្ទាត់ មិនចាំបាច់រកឯកសារវែងឆ្ងាយ ស្គេនតែ QR Code ដឹងបានភ្លាម តាមរយៈប្រព័ន្ធអេឡិចត្រូនិក ដោយស្គេន QR Code លើស្លាកលេខ ឬប័ណ្ណដើម្បីទទួលបាន Link ទៅកាន់ទំព័រផ្ទៀងផ្ទាត់នៅលើគេហទំព័រក្រសួង ៕
ចែករំលែកព័តមាននេះ