រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានពន្យល់ជាសាធារណៈកាលពីថ្ងៃទី៤ វិច្ឆិកាថា គណបក្សប្រជាជនកម្ពុជានឹងយកអាសន្នះទាំងអស់របស់គណបក្សសង្គ្រោះជាតិ សម្រាប់ឃុំ-សង្កាត់ណាដែលមានតែពីរគណបក្សឈរឈ្មោះ ។…
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានពន្យល់ជាសាធារណៈកាលពីថ្ងៃទី៤ វិច្ឆិកាថា គណបក្សប្រជាជនកម្ពុជានឹងយកអាសន្នះទាំងអស់របស់គណបក្សសង្គ្រោះជាតិ សម្រាប់ឃុំ-សង្កាត់ណាដែលមានតែពីរគណបក្សឈរឈ្មោះ ។
ថ្លែងក្នុងវីដេអូឃ្លីប បង្ហោះបន្តផ្ទាល់ក្នុងហ្វេសប៊ុកផ្លូវការរបស់សម្តេចនាយករដ្ឋមន្ត្រីនាថ្ងៃទី ៤ វិច្ឆិកា សម្តេចបានមានប្រសាសន៍ថា សម្តេចផ្តល់ឱកាសដល់បងប្អូនមកពីគណបក្សប្រឆាំងបានបន្តអាជីពនយោបាយជាមួយគណបក្សប្រជាជនកម្ពុជា ក្រោយពេលដែលគណបក្សសង្គ្រោះជាតិត្រូវរំលាយនៅពេលដ៏ខ្លីខាងមុខ។
សម្តេចតេជោនាយករដ្ឋមន្ត្រីបានបញ្ជាក់ថា៖ «នេះជាបំណងល្អពិតប្រាកដដែលខ្ញុំចង់ឲ្យបងប្អូនដែលជាអ្នកខិតខំនៅក្នុងការទទួលបាននូវការគាំទ្រពីសំណាក់ពីប្រជាពលរដ្ឋហើយដែលមិនបានដឹងរឿងដ៏កខ្វក់អាក្រក់ជូរជាតិរបស់មេក្បត់ជាតិ ដែលដឹកនាំគណបក្សនេះជាប់ពាក់ព័ន្ធ ដោយខ្លួនមិនបានប្រព្រឹត្ត រួមចំណែកនៃការខុសឆ្គងនោះទេ »។ សម្តេចបានបន្តថា ប្រសិនបើគណបក្សសង្គ្រោះជាតិមិនត្រូវបានរំលាយទេនោះ តើមានការចាំបាច់ ដើម្បីឲ្យសម្តេចអំពាវនាវសម្រាប់បងប្អូនមកចូលរួមបន្ត ដើម្បីបំរើប្រជាពលរដ្ឋឬអត់? ច្បាស់ណាស់ថា ដោយយោងទៅលើការគិតគូរថា បងប្អូននៅផ្នែកខាងក្រោមមិនបានដឹង ហើយក៏មិនបានយល់អំពីអំពើក្បត់ជាតិរបស់មេដឹកនាំមួយចំនួនដែលដឹកនាំបក្សបំផ្លាញជាតិ បំផ្លាញប្រជាជននោះដែរ ។
សម្តេចតេជោបានបញ្ជាក់ថា៖ «ត្រង់ន័យដូច្នេះហើយ បានជាខ្ញុំចង់ផ្តល់ឱកាសដើម្បីឲ្យបងប្អូនទាំងនោះ បងប្អូនដែលជាប់ជាសមាជិក ក្រុមប្រឹក្សាឃុំ-សង្កាត់ ឬក៏ជាចៅសង្កាត់ឬជាមេឃុំ ឬជាសមាជិកក្រុមប្រឹក្សាស្រុក ក្រុម ប្រឹក្សាខេត្ត អាចចាកចេញពីគណបក្សមុនពេលដែលគណបក្សនេះត្រូវបានរំលាយ ។ ហើយបងប្អូនច្បាស់ណាស់ថា នៅពេលដែលចូលរួមធ្វើការបោះឆ្នោតឃុំ-សង្កាត់ ឬក៏ឈរឈ្មោះជាសមាជិកក្រុមប្រឹក្សាខេត្តស្រុក បងប្អូនសុទ្ធតែចង់ធ្វើការបំរើប្រជាពលរដ្ឋ។
សម្តេចបានបញ្ជាក់ថា៖ «ឥឡូវនេះ គណបក្សប្រជាជនដែលមានខ្ញុំជាប្រធាន ហើយក្នុងតួនាទីជានាយករដ្ឋមន្ត្រី ខ្ញុំផ្តល់ឱកាសសម្រាប់បងប្អូនក្នុងការចាកចេញពីគណបក្សសង្គ្រោះជាតិមុនពេលដែលគណបក្សនេះរំលាយ ។ ហើយតាមរយៈការរំលាយគណបក្សសង្គ្រោះជាតិហើយនោះ សន្លឹកឆ្នោតត្រូវបានរៀបចំឡើងវិញបែងចែកឡើងវិញ ទៅឲ្យបណ្តាបក្សនយោបាយដែលបានឈរឈ្មោះនៅក្នុងឃុំ-សង្កាត់ជាមួយគ្នា»។
សម្រាប់ឃុំ-សង្កាត់មួយចំនួនដែលមានតែគណបក្សពីរឈរឈ្មោះ គឺបក្សប្រជាជន និងបក្សប្រឆាំង ដូច្នេះការឈរតែ២គណបក្សនេះ «គណបក្សប្រជាជននឹងទទួលយកទាំងអស់នូវកៅអីនៅក្នុងឃុំ-សង្កាត់ដែលមានតែ២គណបក្ស»។ ឯចំពោះឃុំ-សង្កាត់ដែលមានគណបក្ស៣ ឬ៤ ឬច្រើនជាងនេះឈរឈ្មោះ នឹងត្រូវចែកទៅតាមលំដាប់នោះទាំងអស់ ។ ប៉ុន្តែយ៉ាងណាក៏ដោយ ទោះបី ១បក្ស ២បក្ស ឬក៏ ៣បក្សឈរជាមួយគ្នា គណបក្សប្រជាជននៅតែមានកៅអីច្រើន ភាគច្រើនលើសលប់ដែលនឹងត្រូវទទួលបាន។
អ្នកដែលចូលរួមជាមួយគណបក្សកាន់អំណាចនឹងរក្សាបានតំណែងដដែល គ្រាន់តែមិនមែនជាចេញមកអំពីគណបក្សសង្គ្រោះជាតិនោះទេ តែក្នុងក្របខណ្ឌគណបក្សកាន់អំណាច ។ យ៉ាងណាមិញ បក្សប្រឆាំងអាចនឹងត្រូវរំលាយ នៅពេលដែលមានការកំណត់កាលបរិច្ឆេទនៃការកាត់ដោយតុលាការកំពូលនៅថ្ងៃទី១៦ វិច្ឆិកា ដែលមកដល់ពេលនេះ គឺត្រឹមតែ១២ថ្ងៃប៉ុណ្ណោះ។
សម្តេចបញ្ជាក់ថា មិនមែនគ្រាន់តែរំលាយគណបក្សមួយចប់ត្រឹមប៉ុណ្ណឹងទេ ប្រហែលមានមនុស្សជាង១០០នាក់ នឹងត្រូវបានហាមឃាត់ពីសិទ្ធធ្វើនយោបាយរយៈពេល៥ឆ្នាំ។ មេធាវីរបស់ក្រសួងមហាផ្ទៃបានធ្វើការ គឺទាមទារឲ្យមានការបិទសិទ្ធិនយោបាយចំពោះគណៈអចិន្ត្រៃយ៍ និងគណៈនាយក ។ ដូច្នេះតំណាងរាស្ត្រស្ទើរតែទាំងអស់ស្ថិតនៅក្នុងជាសមាជិកជាគណៈនាយក និងត្រូវកាត់សិទ្ធិនយោបាយរយៈពេល៥ឆ្នាំ។
គណបក្សប្រជាជនប្រកាសរៀបចំថា ខ្លួនមិនទទួលយកអាសន្នះសង្គ្រោះជាតិ៥៥នេះទេ ដូច្នេះគណបក្សហ៊្វុនស៊ីនប៉ិច និងគណបក្សដទៃទៀត និងទទួលបានអាសន្នះ។ ចំណែកគណបក្សនយោបាយ២ ដែលប្រកាសមិនទទួលយកអាសន្នះ។
សម្តេចបានបន្តថា៖ «បើសិនគណបក្ស២នោះមិនទទួលយកអាសន្នះ ពេលនោះគណបក្សប្រជាជននឹងទទួលយកអាសន្នះដែលកណបក្សទាំងពីរនោះបោះបង់ចោល ។ ដូច្នេះកៅអីរបស់អ្នកតំណាងរាស្ត្រគណបក្សសង្គ្រោះជាតិដែលបានមករួមរស់ជាមួយគណបក្សប្រជាជនអ្នកតំណាងរាស្ត្ររូបនោះអាចនឹងវិលត្រឡប់ចូលទៅធ្វើជាតំណាងរាស្ត្រនៃទទួលយកអាសន្នះនោះ តែមិនមែនទៅក្នុងក្របខ័ណ្ឌជាសមាជិកគណបក្សសង្គ្រោះទៀតទេ តែទៅជាសមាជិកនៃគណបក្សប្រជាជន។
សម្តេចបញ្ជាក់ថា ដូច្នេះបញ្ហានេះ គឺអ្នកដែលបានចូលមកមុនក៏ជាអ្នកដែលនឹងត្រូវបានចាកចាញផុតពីការហាមឃាត់សិទ្ធិធ្វើនយោបាយរយៈពេល៥ឆ្នាំ ហើយក៏អាចទទួលបាននូវកៅអីសភាជាបន្តទៀតសម្រាប់ការបន្តបម្រើប្រជាពលរដ្ឋ៕
ចែករំលែកព័តមាននេះ