បែកធ្លាយសំបុត្រស្នេហារបស់អូបាម៉ា
អាមេរិក ៖ តាមប្រភពព័ត៌មាន BBC បានឲ្យដឹងថា អតីតប្រធានាធិបតីអាមេរិក លោក បារ៉ាក់ អូបាម៉ា ធ្លាប់បានសរសេរសំបុត្រស្នេហាទៅកាន់មិត្តស្រីកាលរៀនថ្នាក់មហាវិទ្យាល័យ…
អាមេរិក ៖ តាមប្រភពព័ត៌មាន BBC បានឲ្យដឹងថា អតីតប្រធានាធិបតីអាមេរិក លោក បារ៉ាក់ អូបាម៉ា ធ្លាប់បានសរសេរសំបុត្រស្នេហាទៅកាន់មិត្តស្រីកាលរៀនថ្នាក់មហាវិទ្យាល័យ មុនពេលជួបគ្នាជាមួយឧត្តមភរិយាសព្វថ្ងៃ៥ឆ្នាំ។
នៅក្នុងសំបុត្រនោះ លោកបានសរសេររៀបរាប់ពីបញ្ហាប្រកាន់ពូជសាសន៍ ឋានៈ និង ទ្រព្យសម្បតិ្ត។ លោកសរសេរសំបុត្រនេះទៅកាន់មិត្តស្រីរបស់គាត់កាលនោះ មានឈ្មោះថា Alexandra McNear ដែលពួកគេបានជួបគ្នាដំបូងនៅអាយុខ្ទង់២០ឆ្នាំ នារដ្ឋកាលីហ្វញ៉ា។
សំបុត្រនេះត្រូវបានរក្សាទុកក្នុងបណ្ណាល័យ Rose នៅសាកលវិទ្យាល័យ Emory តាំងពីឆ្នាំ២០១៤។ ទើបតែពេលនេះទេ បានវាត្រូវបានបង្ហាញជាសាធារណៈ។
សំបុត្រដែលសរសេរនៅកំឡុងឆ្នាំ១៩៨២ ទៅ១៩៨៤ បានរៀបរាប់ថា៖ «ខ្ញុំជឿថា អ្នកដឹងថា ខ្ញុំនឹកអ្នកណាស់។ ការព្រួយបារម្ភរបស់ខ្ញុំចំពោះអ្នក គឺពិតជាធំណាស់ ដូចខ្យល់អាកាសល្វឹងល្វើយ។ ទំនុកចិត្តរបស់ខ្ញុំលើអ្នក ជ្រៅដូចទៅសមុទ្រអីចឹង»។ នៅចុងកន្ទុយសំបុត្រ លោកបានសរសេរថា «Love, Obama» ឬ «ស្រឡាញ់អស់ពីបេះដូង ពីខ្ញុំអូបាម៉ា»។
សេចក្តីស្នេហានេះ មិននៅបានយូរទេ។ អូបាម៉ាបានសរសេរសំបុត្រមួយទៀតប្រាប់ពីអារម្មណ៍នឿយណាយថា៖ «ខ្ញុំគិតពីអ្នកជានិច្ច តែខ្ញុំហាក់បីដូចជាមិនយល់អារម្មណ៍ខ្លួនឯង។ យើងហាក់បីដូចជាចង់បានអ្វីដែលយើងមិនមាន ហើយនេះជាអ្វីដែលនៅបាំងយើងមិនឲ្យលូតលាស់ទៅមុខ»។
ការរក្សាទុកសំបុត្រនេះ គឺពិតជាបានបង្ហាញឲ្យនិស្សិតផ្សេងៗទៀតនៅសម័យនេះយល់ដឹងពីបញ្ហាដែលគេអាចនឹងប្រឈមមុខ ដូចទៅនឹងស្នេហារវាងអតីតប្រធានាធិបតី និងមិត្តស្រីអីចឹងដែរ៕
ចែករំលែកព័តមាននេះ