រាជធានីភ្នំពេញ ៖ កោះសន្តិភាពបានទទួលលិខិត១ច្បាប់ពីនិវត្តជនមួយរូបដែលគាត់បានដាក់ចំណងជើងថា «និវត្តជនមានចម្ងល់» ។ ដោយមិនធ្វើការបរិយាយបន្ថែម យើងខ្ញុំសូមចំលងតាមច្បាប់ដើមទាំងស្រុងនៃលិខិតនេះ ដើម្បីឱ្យស្ថាប័នជំនាញពាក់ព័ន្ធបង្កើនស្មារតីយកចិត្តទុកដាក់ និងកែលំអរាល់អ្វីដែលត្រូវបានលាតត្រដាងខាងក្រោមនេះ ៖
កាលណាគេឮពាក្យ «និវត្តជន» ឬអ្នកខ្លះប្រើពាក្យកំចីថា «អ្នករ៉ឺត្រែត» គេពិតជាយល់យ៉ាងច្បាស់ថា គឺ មនុស្សដែលមានអាយុចាប់ពី៦០ឆ្នាំឡើង ដែលគេហៅថា «មនុស្សចាស់» បើធ្វើដំណើរទៅទីណាគេហៅថា «តាៗ ឬ
យាយៗ» ។ និវត្តជន ឬអ្នករ៉ឺត្រែតទាំងអស់សុទ្ធតែជាអ្នកធ្លាប់បានបំរើការងារជួយស្តារប្រទេសជាតិតាំងពីឆ្នាំ១៩៧៩ មក ។ ក្នុងនោះមានអ្នកខ្លះសកម្មការងារអាចចាត់ជាគំរូ ដោយទទួលបានប័ណ្ណសរសើររៀងរាល់ឆ្នាំស្ទើររកជញ្ជាំងព្យួរមិនបាន ។ កំពុងតែមោទនៈក្នុងស្នាដៃដែលទទួលបានជាជនគំរូឈានមុខ ស្រាប់តែមានប្រកាសចេញមកថា ត្រូវចូលនិវត្តន៍ ពេលនោះទើបដឹងកំសត់ខ្លួនមែនទែន ។
កំសត់ទី១ គឺ ប្រាក់ធ្លាប់បើករាល់ខែបានឆាប់ហើយច្រើន ដល់ចូលនិវត្តន៍ប្រាក់ខែនៅសល់តិច ព្រោះប្រាក់បំណាច់ផ្សេងៗរដ្ឋកាត់យកវិញអស់ ហើយបើកមិនទៀងពេលទៀត ។ ប្រាក់ខែកាលនៅធ្វើការចាយគ្រប់រៀងរាល់ខែ ឥឡូវចាយបាន១០ថ្ងៃទាល់តែសំចៃខ្លាំង ។
កំសត់ទី២ គឺ វ័យកាន់តែចាស់ ក្រពះកាន់តែឃ្លាន ប្រាក់កាន់តែអត់ ឃើញគេអង្គុយតៀមកាហ្វេ នឹកឃើញកាលនៅធ្វើការចង់ចូលតៀមណាក៏បាន ចង់ហូបអីក៏អត់បញ្ហា ឥឡូវបានត្រឹមឃើញ ហើយឃ្លានតែប៉ុណ្ណោះ ។ មែន! អ្នកអត់លុយ ម៉េចក៏ឃ្លានម៉្លេះ?
កំសត់ទី៣ គឺ អាយុកាន់តែច្រើន ជរាកាន់តែជិត ជំងឺរួមរឹតជីវិតកាន់តែខើច កំលាំងកាន់តែខ្សោយ ធ្វើអ្វីក៏មិនបានដូចចិត្ត សូម្បីដើរចិត្តចង់លឿន តែលើកជើងមិនរួច។
ខ្ញុំនិយាយនេះសំរាប់តែនិវត្តជនដែលកំសត់ភាគច្រើនប៉ុណ្ណោះ ។ បើចង់ដឹងការពិត សូមអញ្ជើញទៅមើលនៅមន្ទីរសង្គមកិច្ចរាជធានី ក្នុងថ្ងៃបើកប្រាក់ខែចុះ នឹងឃើញតាៗ យាយៗទាំងនោះតស៊ូប្រជៀតគ្នាយ៉ាងណា? សុខភាពគាត់យ៉ាងណាហើយ…។ នៅបណ្តាប្រទេសជឿនលឿន ខ្ញុំឮមិត្តភក្តិគេនិយាយប្រាប់ថា អ្នកធ្វើការគេបន់ឱ្យតែដល់អាយុចូលនិវត្តន៍ឆាប់ៗនឹងបានដេកចាយប្រាក់ឧបត្ថម្ភដែលរដ្ឋគេផ្តល់ឱ្យ ។ ចំណែកប្រទេសយើងដែលជាប្រទេសក្រីក្រ យើងខ្ញុំមិនទាមទារដូចគេទេ គឺសុំត្រឹមបើកឱ្យបានឆាប់ បើមិនបានមុន ក៏សុំស្មើនឹងអ្នកធ្វើការទៅចុះ ព្រោះប្រាក់ដែលបើក គឺចេញពីថវិការដ្ឋដូចគ្នាទេតើ?
មានបញ្ហាមួយទៀតដែលតាៗ និងយាយៗ ជានិវត្តជនកើតជំងឺងឿងឆ្ងល់មិនឈប់នោះ គឺប្រាក់ឧបត្ថម្ភរបស់រាជរដ្ឋាភិបាលចំនួន២០%ថា ហេតុអ្វីមិនបញ្ចូលក្នុងប្រាក់ប្រចាំខែឱ្យហើយ? ឬមួយវាខុសនឹងគណនេយ្យភាព?…ក្រែងប្រាក់នេះ រាជរដ្ឋាភិបាលឧបត្ថម្ភជាផ្លូវការហើយតើ!… ម៉េចក៏ចាំទុកធ្វើប្រាក់រំលឹក? ហើយប្រាក់រំលឹកនេះទៀតសោតមានរយៈពេលជាងមួយឆ្នាំហើយនៅតែមិនទាន់បាន តើមកពីអ្វី?…ទៅសួរម្តងថា ខែ៦ ទៅម្តងទៀតថា ខែ៨ ដល់ខែ៨ទៅសួរថា ខែ១០ ចុងក្រោយថា ដាច់ឆ្នាំ ឥឡូវដាច់ឆ្នាំ២០១០ ចូល២០១១ ជិតដាច់ខែមករាទៀតហើយ តើដោះសាថាម៉េចទៀត? បើមិនជួយសង្គ្រោះចាស់ៗទេ មេត្តាកុំសង្កត់.កគាត់ថែម ទុកឱ្យគាត់មើលឃើញការសប្បាយរបស់ក្មេងៗជំនាន់ក្រោយផង ព្រោះគាត់ក៏បានចូលរួមចំណែកស្តារប្រទេសជាតិពីគំនរផេះផង់ដែរ ។
១-សូមបើកប្រាក់ប្រចាំខែឱ្យឆាប់ស្មើនឹងអ្នកធ្វើការតាមអង្គភាព ។
២-សូមបញ្ចូលប្រាក់ឧបត្ថម្ភក្នុងប្រាក់ខែប្រចាំខែឱ្យហើយ ខែណាបញ្ចូលមិនទាន់ចាំធ្វើរំលឹក ។
៣-សូមបន្ថយកន្លែងពិនិត្យសៀវភៅពី៤មក២កន្លែងបានហើយ នៅមន្ទីរសង្គមកិច្ច គឺអ្នកពិនិត្យដំបូង និងអ្នកបើកប្រាក់ ហើយយកអ្នកពិនិត្យ២ក្រុមទៀត បែងចែកតាមខណ្ឌ ។
៤-សូមដាក់ក្តារខៀនមួយនៅក្រោមមន្ទីរ ដើម្បីសរសេរដំណឹងបើកប្រាក់ខែផង កុំចាំចូលសួរ ឬទូរស័ព្ទសួរ ។
ទំនាស់ខុសយ៉ាងណាសូមមេត្តាអធ្យាស្រ័យ ៕
ពីមិត្តអ្នកអាន
ជានិវត្តជនកំសត់ម្នាក់
ចែករំលែកព័តមាននេះ