មិនមែនត្រឹមតែស្ត្រីទេ ដែលត្រូវមើលថែ និងយកចិត្តទុកដាក់ចំពោះសុខភាពប្រព័ន្ធទឹកនោម តែក្នុងសម័យនេះបុរសក៏ត្រូវងាកមកយកចិត្តទុកដាក់ និងមើលថែសុខភាពប្រព័ន្ធទឹកនោមរបស់ខ្លួនដូចគ្នា ។ ជាពិសេសបុរសទាំងឡាយណាដែលមានការនោមញឹកញាប់ ពិបាកក្នុងការនោម អ្នកទាំងនេះអាចស្ថិតក្នុងការប្រឈមមុខនៃការកើតរោគក្រពេញប្រូស្តាតរីកធំ ។
លោកវេជ្ជបណ្ឌិត Dr. Chawawat Gosrisirikul គ្រូពេទ្យជំនាញវះកាត់ប្រព័ន្ធទឹកនោមនៃមន្ទីរពេទ្យវេជ្ជថានី ឱ្យដឹងថា ការរីកធំនៃក្រពេញប្រូស្តាតគឺបណ្តាលមកពីកត្តាជាច្រើន ៖
-កត្តាទី១៖ អាយុ គឺនៅពេលដែលបុរសមានអាយុលើសពី៤០ឆ្នាំឡើង ក្រពេញប្រូស្តាតនឹងចាប់ផ្តើមរីកធំ បន្តិចម្តងៗ ហើយនៅអាយុ ៥០ឆ្នាំឡើង វានឹងចាប់ផ្តើមមានរោគសញ្ញានៃរោគក្រពេញប្រូស្តាតរីកធំ ។
-កត្តាទី២៖ តំណពូជ
-កត្តាទី៣៖ គឺបណ្តាលមកពីអ៊័រម៉ូនភេទប្រុសដែលហៅថា Dihydrotestosterone។ អ៊័រម៉ូននេះធ្វើឲ្យមានផលប៉ះពាល់លើក្រពេញប្រូស្តាត ព្រោះវាជាអាហារសម្រាប់ក្រពេញប្រូស្តាតដែលជាលទ្ធផលធ្វើឲ្យក្រពេញប្រូស្តាតរីកធំ ។ នៅពេលក្រពេញប្រូស្តាតរីកធំវានឹងទៅសង្កត់បំពង់ទឹកនោមដែលបណ្តាលឱ្យរាន់នោមជាញឹកញាប់ និងធ្វើឱ្យពិបាកក្នុងការនោម ។
លោកវេជ្ជបណ្ឌិតបន្តថា រោគសញ្ញាដែលបង្ហាញថាយើងមានបញ្ហាក្រពេញប្រូស្តាតរីកធំមានដូចជា៖
-នោមខុសពីធម្មតា ឬនោមមិនស្រូល ត្រូវប្រើកម្លាំងច្រើនជាងធម្មតារាល់ពេលនោម ម្តងៗ ។
-នោមមិនអស់ ឬនៅមានទឹកនោមស្រក់ចុះក្រោយពេលនោមរួចដែលនេះជាផ្នែកមួយនៃការស្ទះបំពង់ទឹកនោម ។
-រោគសញ្ញាមួយទៀតដែលហៅថា Irritative Symptoms ដែលជាអាការបណ្តាលមកពីក្រពេញប្រូស្តាតរីកធំធ្វើឲ្យនោមស្ទះ ។ បើសិនយើងទុកយូរទៅ វានឹងធ្វើឲ្យផ្លោកនោមធ្វើការច្របាច់ច្រើនជាងមុន និងធ្វើឲ្យអ្នកជំងឺនោមញឹក ឬពេលខ្លះនោមញឹកហើយមានអាការផ្សា និងនោមញឹកញាប់នៅពេលយប់ ហើយអ្នកខ្លះមិនអាចទប់ទឹកនោមបាន ដូចជាពេលរាន់នោមភ្លាមត្រូវទៅបន្ទប់ទឹក ភ្លាមៗ ។ ទាំងនេះជារោគសញ្ញាដែលអាចបង្ហាញថាអ្នកមានរោគក្រពេញប្រូស្តាតរីកធំ ៕
ចែករំលែកព័តមាននេះ