រាជធានីភ្នំពេញ ៖ លោក ឃឹម ប៉ុន ចៅក្រមតុលាការកំពូលនៅព្រឹកថ្ងៃទី១ វិច្ឆិកា ឆ្នាំ២០១៧ បានសម្រេចប្រកាសសាលដីកា ដោយតម្កល់សាលដីកាសាលាឧទ្ធរណ៍ទុកជាបានការដដែល ក្នុងសំណុំរឿងក្តីអតីតប្រធានគណបក្សសង្គ្រោះជាតិ លោក សម រង្ស៊ី ពីបទបរិហារកេរ្តិ៍សាធារណៈទៅលើសម្តេចពញាចក្រី ហេង សំរិន ប្រធានរដ្ឋសភា។
គួរបញ្ជាក់ថា កាលពីថ្ងៃទី ២៧ តុលា កន្លងទៅ មេធាវីការពារក្តីរបស់អតីតមេបក្សប្រឆាំងរូបនេះ គឺលោក សំ សុគង់ បានដាក់ពាក្យសុំពន្យារពេលសវនាការដោយសារលោកមានជំងឺគ្រុនក្តៅខ្លាំងមិនអាចចូលរួមសវនាការបាន។ តែតំណាងមហាអយ្យការស្នើឲ្យបន្តនីតិវិធី ពីព្រោះរឿងក្តីនេះជារឿងមជ្ឈឹម ហើយលោកចៅក្រមក៏សម្រេចបន្តសវនាការ។ហើយនៅព្រឹកថ្ងៃទី១ ខែវិច្ឆិកា ឆ្នាំ២០១៧ បានសម្រេចប្រកាសសាដីកាតម្កល់សាដីកាសាលាឧទ្ធរណ៍ទុកជាបានការដដែល។
ជនជាប់ចោទ សម រង្ស៊ី កាលពីថ្ងៃទី២៨ ខែកក្កដា ត្រូវបានសាលាដំបូងរាជធានីភ្នំពេញសម្រេចប្រកាសសាលក្រម ពិន័យជាប្រាក់ចំនួន១០លានរៀលចូលថវិការដ្ឋ និងបង្គាប់ឲ្យសង់ជំងឺចិត្ត១៥០លានរៀលទៅសម្តេចពញាចក្រី ហេង សំរិន ពីបទបទបរិហារកេរ្តិ៍សាធារណៈ។
កាលពីថ្ងៃទី១៧ វិច្ឆិកា ឆ្នាំ២០១៥ លោក សម រង្ស៊ី បានរិះគន់តាមទំព័រហ្វេសប៊ុក (Facebook) របស់ខ្លួន នៃការកកើតថ្ងៃ៧មករា ឆ្នាំ១៩៧៩ ថា របបរដ្ឋកម្ពុជា ដឹកនាំដោយលោក ហេង សំរិន បានបង្គាប់តុលាការឲ្យកាត់ទោសប្រហារជីវិតសម្ដេចព្រះនរោត្តម សីហនុ ដោយចោទព្រះអង្គជាជនក្បត់ជាតិ។ ករណីនេះ ត្រូវបានលោក គី តិច មេធាវីតំណាងលោក ហេង សំរិន ប្ដឹងលោក សម រង្ស៊ី ពីបទបរិហារកេរ្តិ៍សាធារណៈ ដោយចោទថា ការផ្សព្វផ្សាយនេះពុំបានឆ្លុះបញ្ចាំងពីការពិត និងគ្មានឯកសារច្បាស់លាស់៕
ចែករំលែកព័តមាននេះ