រាជធានីភ្នំពេញ ៖ ទន្ទឹមនឹងប្រជាពលរដ្ឋចិនធ្វើដំណើរកម្សាន្តទៅក្រៅប្រទេស ក្នុងមួយឆ្នាំៗមិនតិចជាង១៣០លាននាក់ និងមានទឹកប្រាក់ជាង២៦០ប៊ីលានដុល្លារ តំណាងធនាគារកណ្តាលនៃប្រទេសចិនចង់ឱ្យកម្ពុជាសម្រួលការទូទាត់ជាប្រាក់យន់ក្នុងការផ្តល់សេវានៅរាជធានីភ្នំពេញ និងខេត្តសៀមរាប ដើម្បីជំរុញឱ្យភ្ញៀវទេសចរចិនចំណាយប្រាក់កាន់តែច្រើននៅកម្ពុជា ។ លោក…
រាជធានីភ្នំពេញ ៖ ទន្ទឹមនឹងប្រជាពលរដ្ឋចិនធ្វើដំណើរកម្សាន្តទៅក្រៅប្រទេស ក្នុងមួយឆ្នាំៗមិនតិចជាង១៣០លាននាក់ និងមានទឹកប្រាក់ជាង២៦០ប៊ីលានដុល្លារ តំណាងធនាគារកណ្តាលនៃប្រទេសចិនចង់ឱ្យកម្ពុជាសម្រួលការទូទាត់ជាប្រាក់យន់ក្នុងការផ្តល់សេវានៅរាជធានីភ្នំពេញ និងខេត្តសៀមរាប ដើម្បីជំរុញឱ្យភ្ញៀវទេសចរចិនចំណាយប្រាក់កាន់តែច្រើននៅកម្ពុជា ។
លោក Pan Hong Sheng តំណាងធនាគារកណ្តាលចិន មានប្រសាសន៍ក្នុងសន្និសីទស្តីពី ខ្សែក្រវាត់មួយ ផ្លូវមួយ កាលពីថ្ងៃទី២៤ តុលា ថា ក្នុងមួយឆ្នាំៗ ពលរដ្ឋចិនធ្វើដំណើរកម្សាន្តទៅក្រៅប្រទេសប្រមាណ១៣៥លាននាក់ គិតជាទឹកប្រាក់២៦១ប៊ីលានដុល្លារ ហើយមានកំណើន១២%ជារៀងរាល់ឆ្នាំ មានន័យថា ពលរដ្ឋចិនម្នាក់ៗចំណាយប្រាក់ជិត២ពាន់ដុល្លារ ស្មើនឹង២១% នៃទឹកប្រាក់សរុបក្នុងវិស័យទេសចរណ៍ចិន ។
តំណាងធនាគារកណ្តាលចិនលើកឡើងថា ៖« ប្រសិនបើប្រទេសកម្ពុជាសម្រួលការទូទាត់គិតជាប្រាក់យន់ ពិសេសរវាងអ្នកផ្តល់សេវាក្នុងប្រទេសកម្ពុជា ជាមួយភ្ញៀវទេសចរមកពីប្រទេសចិន ពេលនោះ អាចជំរុញឲ្យភ្ញៀវទេសចរចិនចាយប្រាក់យន់កាន់តែច្រើនសម្រាប់ទីក្រុងភ្នំពេញ និងសៀមរាប បើមានការអនុញ្ញាតទូទាត់ជាប្រាក់យន់ » ។
តំណាងធនាគារជាតិនៃកម្ពុជា បានឱ្យដឹងថា នៅខេត្តសៀមរាប និងរាជធានីភ្នំពេញ តាមហាងលក់វត្ថុអនុស្សាវរីយ៍ធំៗ រាល់ការទិញលក់មានការទូទាត់លុយយន់ ប៉ុន្តែការទូទាត់នៅតាមផ្លូវគ្មានទេ ដោយអាជីវករកម្ពុជាភាគច្រើនមិនទាន់ស្គាល់លុយយន់ និងការប្រែប្រួលនៃអត្រាប្តូរប្រាក់នៅឡើយ ។
លោកបណ្ឌិត ឃូ វុឌ្ឍី តំណាងធនាគារជាតិនៃកម្ពុជា មានប្រសាសន៍ឱ្យដឹងកាលពីថ្ងៃទី៣១ តុលា ថា ៖« ការទូទាត់ប្រាក់យន់សម្រាប់ខេត្តសៀមរាប និងក្រុងភ្នំពេញ មានតែនៅតាមហាងលក់វត្ថុអនុស្សាវរីយ៍ ទិញលក់មានលក្ខណៈធំៗ តែការទូទាត់ប្រាក់យន់នៅតាមផ្លូវសម្រាប់ភ្ញៀវទេសចរចិនមិនទាន់មានទេ ព្រោះអាជីវករក្នុងស្រុកមួយចំនួនធំមិនទាន់ស្គាល់លុយយន់ និងការប្រែប្រួលនៃអត្រាប្តូរប្រាក់យន់ ។ ម្យ៉ាងទៀត ភ្ញៀវទេសចរចិនមកកម្សាន្តភាគច្រើន រាល់ការចំណាយគឺប្រើប្រាស់លុយដុល្លារ » ។
ទោះបីការទូទាត់លុយយន់មិនទាន់មានច្រើន ប៉ុន្តែការសម្រួលការទូទាត់នេះ លោកបណ្ឌិតសង្កត់ធ្ងន់ថា ៖« កម្ពុជាទទួលបានផលចំណេញផ្នែកពាណិជ្ជកម្ម និងការវិនិយោគជាមួយចិន ព្រោះមិនខាតបង់ការដោះដូរអត្រាប្តូរប្រាក់ ។ ដោយឡែក ចំពោះកម្ពុជា វាជួយកាត់បន្ថយការប្រើប្រាស់ដុល្លារ មកប្រើប្រាស់លុយយន់ ហើយនៅពេលបានលុយយន់ យកប្តូរជាលុយរៀលនោះ វានឹងជួយពង្រឹងការប្រើប្រាស់ប្រាក់រៀលបន្ថែម » ។
លោក ហូ វណ្ឌី អគ្គលេខាធិការនៃសម្ព័ន្ធទេសចរណ៍កម្ពុជា មានប្រសាសន៍ថា ៖« កម្ពុជាបើកចំហការទូទាត់រូបិយប័ណ្ណផ្សេងៗនៅលើទីផ្សារកម្ពុជា ស្របទៅតាមគោលនយោបាយរបស់រាជរដ្ឋាភិបាល ។ អីចឹង យើងឃើញការចរាចររូបិយប័ណ្ណនៅកម្ពុជាមានលក្ខណៈទូលំទូលាយ » ។
លោកបន្តថា កម្ពុជាសម្រួលការទូទាត់ប្រាក់យន់ ក្នុងនោះវាមិនត្រឹមតែជួយសម្រួលរូបិយប័ណ្ណរបស់ចិនប៉ុណ្ណោះទេ ថែមទាំងជួយពង្រឹងទំនាក់ទំនងការទូត និងសម្រួលឯកសារផ្សេងៗរបស់រាជរដ្ឋាភិបាលបានច្រើនទៅដល់ភ្ញៀវទេសចរចិនចូលមកកម្ពុជា ឈរនៅលំដាប់ថ្នាក់ទី១ ក្នុងចំណោមភ្ញៀវទេសចរបរទេស ។ ជាងនេះ ធ្វើឲ្យការហោះហើរត្រង់ពីគោលដៅក្នុងស្រុកចិនចូលមកកម្ពុជាច្រើនបន្ថែមទៀត ៕
ចែករំលែកព័តមាននេះ