ប្រទេសកូរ៉េខាងជើង ៖ ខណៈដែលកូរ៉េខាងជើងរៀបចំខ្លួនសម្រាប់សង្គ្រាមក្នុងក្រុងមួយកូរ៉េខាងត្បូង បែរជាផ្តោតលើបណ្តាយុទ្ធសាស្ត្រការពារ ។ នេះជាការវាយតម្លៃរបស់លោកអេឡិចសាន់ដ្រ៍ ស៊ីតនីកូវ អ្នកសរសេរអត្ថបទវិភាគនៃកាសែតរុស្ស៊ី SVOBODNAYA GAZETA…
ប្រទេសកូរ៉េខាងជើង ៖ ខណៈដែលកូរ៉េខាងជើងរៀបចំខ្លួនសម្រាប់សង្គ្រាមក្នុងក្រុងមួយកូរ៉េខាងត្បូង បែរជាផ្តោតលើបណ្តាយុទ្ធសាស្ត្រការពារ ។ នេះជាការវាយតម្លៃរបស់លោកអេឡិចសាន់ដ្រ៍ ស៊ីតនីកូវ អ្នកសរសេរអត្ថបទវិភាគនៃកាសែតរុស្ស៊ី SVOBODNAYA GAZETA ដែលនិយាយថា រូបលោកមានការជឿជាក់លើជោគជ័យរបស់ក្រុងព្យុងយ៉ាង ក្នុងករណីមានជម្លោះខាងយោធាជាមួយក្រុងសេអ៊ូល និងក្រុងវ៉ាស៊ីនតោន ។
អ្នកសរសេរអត្ថបទវិភាគរូបនេះតាមរយៈអត្ថបទមួយចេញផ្សាយកាលពីថ្ងៃទី៣០ តុលា ដោយទីភ្នាក់ងារព័ត៌មានរុស្ស៊ី SPUTNIK និយាយទៀតថា ទាំងក្រុងវ៉ាស៊ីនតោនទាំងក្រុងសេអ៊ូល បច្ចុប្បន្នពុំមានព័ត៌មានច្បាស់នានាឡើយលើចំនួនមនុស្សកូរ៉េខាងជើង ដែលត្រៀមចូលប្រឡូកក្នុងជម្លោះដោយអាវុធក្នុងករណីត្រូវការ ។ លោកបន្តថា ព័ត៌មានទាំងឡាយចេញផ្សាយដោយទីភ្នាក់ងារព័ត៌មានកូរ៉េខាងត្បូង YONHAP ស្តីពីវត្តមានទាហានកូរ៉េខាងជើង ប្រមាណជា៦០០.០០០នាក់ ជាព័ត៌មានពុំពិតឡើយ ពីព្រោះគេពុំត្រូវបំភ្លេចទេថា មនុស្សដល់ទៅ៦លាននាក់ឯណោះបានចុះឈ្មោះចូលបម្រើក្នុងកងឆ្មាំក្រហមកម្មករ និងកសិករ ដែលពួកគេចូលរួមដោយទៀងទាត់ ក្នុងសមយុទ្ធយោធានានា ។ ដូច្នេះកូរ៉េខាងជើងមានទាហានដល់ទៅប្រមាណជា៨លាននាក់ ដែលអាចកេណ្ឌប្រមូលដោយឆាប់រហ័សក្នុងករណីមានគ្រោះថ្នាក់ ។ លើសពីនេះទៀត បើតាមលោកស៊ីតនីកូវ ថា ការអះអាងទាំងឡាយដែលថា ក្រុងព្យុងយ៉ាងនឹងផ្តោតលើយុទ្ធសាស្ត្រវាយប្រហារមួយគឺមិនត្រូវទេ ព្រោះកូរ៉េខាងជើងពង្រឹងជំហរការពារវិញទេ ។
លោកបន្តថា ប្រសិនបើកូរ៉េខាងត្បូងគាំទ្រដោយសហរដ្ឋអាមេរិកសាកល្បងធ្វើការវាយលុកមួយលើកូរ៉េខាងជើង នោះនឹងជួបប្រទះកិច្ចការពារដល់ទៅ៤កម្រិត ។ លើសពីនេះទៀត កងកម្លាំងពិសេសខាងកិច្ចការពារមួយសំដៅធានាសន្តិសុខរដ្ឋធានីក្រុងព្យុងយ៉ាង ដែលរួមមានកងពលតូចពិសេសបំពាក់ដោយគ្រាប់បែកត្រូវបានបង្កើតឡើង ។ កងកម្លាំងពិសេសនេះត្រៀមប្រយុទ្ធរហូតដល់នៅសល់ទាហានចុងក្រោយ ។
ទោះបីយ៉ាងណា យោងតាមអ្នកជំនាញការរូបនេះថា ក្រុងសេអ៊ូលពុំមានបំណងណាធ្វើការវាយប្រហារឡើយ ទោះបីជាខ្លួនយល់ថា អាវុធប្រភេទចាស់ៗដែលក្រុងព្យុងយ៉ាងប្រើអាចឱ្យខ្លួនដណ្តើមបានជោគជ័យក្តី ។
ដោយមានអាវុធពុំសូវសម្បូរបែប កូរ៉េខាងត្បូងបានបោះទុនវិនិយោគយ៉ាងច្រើនសន្ធឹកសន្ធាប់លើការផលិតអាវុធថ្មីៗ ហើយពង្រឹងកងទ័ពរបស់ខ្លួន ។
ទោះបីយ៉ាងណា គេពុំត្រូវភ្លេចបណ្តាចំណុចខ្សោយរបស់កូរ៉េខាងត្បូងឡើយ ។ ទាហានកូរ៉េខាងត្បូងមានប្រមាណតែ៤៩០.០០០នាក់ ហើយអាចបូកបន្ថែមទាហានអាមេរិក២៨.០០០នាក់ទៀត ដែលមានវត្តមាននៅឧបទ្វីបកូរ៉េ ព្រមទាំងទាហានអាមេរិក៥០.០០០នាក់ ដាក់ពង្រាយនៅជប៉ុន ។
ដូច្នេះក្នុងករណីមានជម្លោះកូរ៉េខាងត្បូងអាចមានទាហានត្រឹមតែប្រមាណ៥០០.០០០នាក់ ទល់នឹងទាហានរបស់លោកគីម ជុងអ៊ុន ៨លាននាក់ ។ ហើយបើក្រុងសេអ៊ូលមានលទ្ធភាពកេណ្ឌប្រមូលទាហានបម្រុង៤,៥លាននាក់មានអាយុពី១៨ទៅ៣៥ឆ្នាំ បែបនេះក៏គ្មានអីអស្ចារ្យដែរ ព្រោះកងទាហានបម្រុងអាចបម្រើកងទ័ពយ៉ាងយូរត្រឹម២ឆ្នាំ ។
លោកស៊ីតនីកូវ គូសបញ្ជាក់ម្យ៉ាងទៀតថា ក្នុងករណីមានសង្គ្រាមក្រុងសេអ៊ូលនឹងធ្វើរាល់ប្រតិបត្តិការយោធាក្រោមបញ្ជាការរបស់មន្ទីរប៉ង់តាហ្គោន ។ លោកថា បទពិសោធន៍នៃសង្គ្រាមនៅអីុរ៉ាក់ ពិសេសពេលធ្វើប្រតិបត្តិការយោធារំដោះក្រុងម៉ូសស៊ុលបង្ហាញថា ក្នុងបណ្តាទីក្រុងប្រព័ន្ធអាវុធទំនើបៗពុំសូវមានប្រសិទ្ធភាពខ្លាំងឡើយ រហូតដល់គ្មានសោះផង ។
អ្នកវិភាគរូបនេះបន្តថា ការដាក់ពង្រាយប្រព័ន្ធការពារប្រឆាំងមីស៊ីល THAAD អាចបង្ហាញថា នេះជាសញ្ញាដែលថា ក្រុងព្យុងយ៉ាងមានការរីកចម្រើនខ្លាំងក្នុងមហិច្ឆតាបង្កើតអាវុធនុយក្លេអ៊ែរ និងបាលីស្ទិក ។ ទន្ទឹមនឹងនេះ ក្រុងសេអ៊ូលស្ទើរតែគ្មានធ្វើអ្វីសោះ ដើម្បីទប់ទល់នឹងការគំរាមកំហែងនេះ ។
អ្នកជំនាញការរូបនេះធ្វើការសន្និដ្ឋានថា ឆ្លើយតបចំពោះការវាយប្រហារតាមអាកាសរបស់អាមេរិក គេសន្មត់ថា ក្រុងព្យុងយ៉ាងនឹងធ្វើការវាយប្រហារនុយក្លេអ៊ែរមួយសំដៅលើប្រព័ន្ធការពាររបស់កូរ៉េខាងត្បូង ។ បន្ទាប់មកក្រុងព្យុងយ៉ាងវាយលុកចូលក្នុងរដ្ឋធានីសេអ៊ូល ។ ពេលនោះពួកអាមេរិកខ្លាចកូរ៉េខាងជើងអាចបង្កើតសង្គ្រាមក្នុងទីក្រុងមួយដែលប្រសិទ្ធភាពរបស់កងយន្តហោះនឹងត្រូវកាត់បន្ថយយ៉ាងខ្លាំង ។ បន្ទាប់មក ភាពជ្រួលច្របល់របស់បណ្តាជនស៊ីវិលរឹតតែធ្វើឱ្យសភាពការណ៍កាន់តែយ៉ាប់យ៉ឺនខ្លាំងថែមទៀត ៕
ចែករំលែកព័តមាននេះ