ខេត្តស្វាយរៀង ៖ ប្រជាពលរដ្ឋរស់នៅតាមព្រំដែនមានការត្អូញត្អែយ៉ាងខ្លាំងអំពីតម្លៃសត្វគោក្របីធ្លាក់ថ្លៃថោកដោយចោទប្រកាន់ថា មកពីមានក្រុមអ្នកម៉ៅការដើរយកប្រាក់ពីឈ្មួញកណ្តាលគឺក្របីជំទង់១ក្បាល៥ម៉ឺនរៀល ក្របីមេឬក្របីឈ្មោលធំតម្លៃ១ក្បាល១០ម៉ឺនរៀល ទើបធ្វើឲ្យឈ្មួញវៀតណាមទម្លាក់តម្លៃ ។ ប្រជាពលរដ្ឋបានត្អូញត្អែនេះកើតឡើងនៅថ្ងៃទី៣១ ខែតុលា ឆ្នាំ២០១៧…
ខេត្តស្វាយរៀង ៖ ប្រជាពលរដ្ឋរស់នៅតាមព្រំដែនមានការត្អូញត្អែយ៉ាងខ្លាំងអំពីតម្លៃសត្វគោក្របីធ្លាក់ថ្លៃថោកដោយចោទប្រកាន់ថា មកពីមានក្រុមអ្នកម៉ៅការដើរយកប្រាក់ពីឈ្មួញកណ្តាលគឺក្របីជំទង់១ក្បាល៥ម៉ឺនរៀល ក្របីមេឬក្របីឈ្មោលធំតម្លៃ១ក្បាល១០ម៉ឺនរៀល ទើបធ្វើឲ្យឈ្មួញវៀតណាមទម្លាក់តម្លៃ ។ ប្រជាពលរដ្ឋបានត្អូញត្អែនេះកើតឡើងនៅថ្ងៃទី៣១ ខែតុលា ឆ្នាំ២០១៧ នៅភូមិចេក ឃុំសំរោង ស្រុកចន្ទ្រា ។
បើតាមស្ត្រីឈ្មោះ ឆាត ស្រីមុំ អាយុ២៧ឆ្នាំ នៅភូមិចេកបានប្រាប់ឲ្យដឹងថា អំឡុង២ឆ្នាំមកនេះក្របីគោធ្លាក់ចុះតម្លៃដោយឈ្មួញទម្លាក់តម្លៃក្របីជំទង់១ក្បាលតម្លៃ១១លានដុង ក្របីមេធំ១ក្បាលតម្លៃ១៥លានដុង បើប្រៀបធៀបទៅឆ្នាំ២០១៥ ក្របីជម្ទង់ លក់បាន១ក្បាល១៥លានដុង បើក្របីធំ ១ក្បាលតម្លៃ២០លានដុងស្មើ៤លានរៀលឬ១ពាន់ដុល្លារ ក៏ប៉ុន្តែចាប់ពីឆ្នាំ២០១៦-២០១៧ នេះតម្លៃក្របីធ្លាក់ចុះរហូត១ក្បាល១៥លានដុងស្មើ២,៥០០,០០០រៀលប៉ុណ្ណោះ ។ ហើយមកដល់ខែតុលា២០១៧នេះក្របីមេធំឡើងថ្លៃបន្តិចវិញគឺ១ក្បាលតម្លៃ១៧លានដុងស្មើជាង៣លានរៀល ។
ចំណែកគោក៏ចុះថោកដែរគោធំ១ក្បាល១១លានទៅ១៤លានដុងប៉ុណ្ណោះហើយតម្លៃក្របីគោចុះថោកនេះគឺមកពីមានក្រុមអ្នកម៉ៅការភាស៊ី តាមព្រំដែនដើរមកយកប្រាក់ពីឈ្មួញកណ្តាលពេលលក់យកប្រាក់មួយសារហើយពេលដឹកគោក្របីឆ្លងដែនទៅប្រទេសវៀតណាមត្រូវបង់ឲ្យសមត្ថកិច្ចតាមច្រករបៀងមួយក្បាល១០ម៉ឺនរៀលទៀតទើបឈ្មួញហ៊ានទិញឲ្យតម្លៃថោក ។
ប្រជាពលរដ្ឋក៏បានបន្តទៀតថា ប្រជាពលរដ្ឋរស់នៅតាមព្រំដែនក្នុងស្រុកចន្ទ្រាគឺក្រៅពីមុខរបរធ្វើស្រែគឺចិញ្ចឹមសត្វគោក្របី ក្នុងមួយគ្រួសារមាន១០ក្បាលទៅ២០ក្បាល ពួកគាត់ត្រូវការចំណាយប្រាក់ច្រើនទិញចំបើងក្រៅពីដេញទៅឃ្វាល ដូច្នេះប្រជាពលរដ្ឋអ្នកចិញ្ចឹមគោក្របី សូមអំពាវនាវដល់អាជ្ញាធរខេត្តមេត្តា ចុះទៅពិនិត្យដោះស្រាយកុំឲ្យជនឆក់ឱកាស់ដាក់កុងត្រូលទាប្រាក់ពីប្រជាពលរដ្ឋលក់គោក្របីជាពិសេសសមត្ថកិច្ចអ្នកម៉ៅការភាស៊ីនិងសមត្ថកិច្ចឈជើងតាមច្រករបៀងព្រំដែនបង់ប្រាក់ពីប្រជាពលរដ្ឋនិងឈ្មួញកណ្តាលថ្លៃពេកដើម្បីឲ្យប្រជាពលរដ្ឋនៅតាមព្រំដែនមានលទ្ធភាពអាចចិញ្ចឹមគោក្របីផ្គត់ផ្គង់ជីវភាពគ្រួសារកាត់បន្ថយភាពក្រីក្រ ជៀសវាងចំណាកស្រុកទៅរកការងារធ្វើនៅក្រៅខេត្ត។ទាក់ទិនករណីក្របីចុះថោកនេះដែរមិនអាចរកការបំភ្លឺពីអាជ្ញាធរបានទេនិងមិនអាចរកការបំភ្លឺពីក្រុមអ្នកម៉ៅការភាស៊ីនិងសមត្ថកិច្ចតាមច្រករបៀងក្នុងឃុំសំរោងបានដែរមកដល់ល្ងាចថ្ងៃទី៣១ តុលា នេះ ៕
ចែករំលែកព័តមាននេះ