ការស្រាវជ្រាវថ្មីមួយបានបង្ហាញថាទារកដែលកើតមុនថ្ងៃកំណត់មានហានិភ័យជាង៥៧%នៃការប្រឈមនឹងជំងឺបេះដូង និងសួតជាងទារកដែលកើតនៅថ្ងៃកំណត់ ។ រៀងរាល់សប្តាហ៍បន្ថែមដែលទារកនៅក្នុងស្បូនមានការទាក់ទងជាមួយនឹងការថយចុះ១៤%នៃហានិភ័យសុខភាពបេះដូង និងទងសួត ។
ការស្រាវជ្រាវនេះតាមដានលើការស្រាវជ្រាវពីមុនដែលបង្ហាញពីផលប៉ះពាល់នៃការកើតមិនគ្រប់ខែលើសុខភាពបេះដូង និងសុខភាពផ្លូវដង្ហើមនៅពេលក្រោយនៃជីវិតរបស់ទារក ។
អ្នកដឹកនាំការស្រាវជ្រាវនេះគឺលោកស្រីវេជ្ជបណ្ឌិត Isabel Ferreira ពីសាកលវិទ្យាល័យ Queensland នៅទីក្រុង Brisbane ប្រទេសអូស្ត្រាលីសង្ឃឹមថាការស្រាវជ្រាវនេះនឹងធ្វើឱ្យស្ត្រីមិនចង់វះកាត់បង្កើតកូនមុនថ្ងៃកើតរបស់កូនពួកគេ ។
វេជ្ជបណ្ឌិតបានដឹងជាយូរមកហើយថាការកើតមិនគ្រប់ខែត្រូវបានផ្សារភ្ជាប់ទៅនឹងឱនភាពសុខភាពក្នុងរយៈពេលវែងមួយចំនួន ប៉ុន្តែការសិក្សានេះគឺជាផ្នែកមួយនៃការស្រាវជ្រាវដែលបង្ហាញថាសូម្បីតែការឆាប់សម្រាលកូនក៏អាចបណ្តាលឱ្យមានបញ្ហាសុខភាពស្រដៀងគ្នាដែរ ។
ការសម្រាលកូនគួរតែកើតឡើងអំឡុងពេលមានផ្ទៃពោះ៣៧ និង៤០សប្តាហ៍ ។ ស្ត្រីខ្លះមិនសម្រាលកូនរហូតដល់ហួសថ្ងៃបង្កើតចន្លោះពី៤១ទៅ៤២សប្តាហ៍នៃការមានផ្ទៃពោះ ។
ការស្រាវជ្រាវដែលត្រូវបានចេញផ្សាយដោយសមាគមបេះដូងអាមេរិកបានសិក្សាទៅលើសុខភាពបេះដូង និងផ្លូវដង្ហើមរបស់មនុស្សជិត៨០០នាក់នៅប្រទេសអៀរឡង់ខាងជើងដែលកើតនៅចន្លោះពី៣៧ទៅ៣៨សប្តាហ៍ ព្រមទាំងវាស់ស្ទង់ពីសុខភាពបេះដូង និងផ្លូវដង្ហើមរបស់ពួកគេនៅអាយុ១២ឆ្នាំ ១៥ឆ្នាំនិង២២ឆ្នាំ ។
យោងតាមការស្រាវជ្រាវ មុខងារបេះដូង និងផ្លូវដង្ហើមមានសារ សំខាន់ចំពោះការរំលាយអាហាររបស់មនុស្សវ័យក្មេង និងសុខភាពសរសៃឈាមបេះដូងទាំងមូល ។
ការស្រាវជ្រាវពីមុនបានបង្ហាញថាបេះដូងរបស់មនុស្សវ័យក្មេងដែលកើតមិនគ្រប់ខែមានរូបរាងខុសពីមនុស្សធម្មតា ហើយច្របាច់ឈាមមិនសូវមានប្រសិទ្ធភាព ។
ថតបេះដូងខាងស្តាំរបស់ពួកគេតូចជាងធម្មតា ប៉ុន្តែមានជញ្ជាំងក្រាស់ ដូច្នេះបេះដូងត្រូវតែធ្វើការកាន់តែខ្លាំងឡើង ជាពិសេសក្នុងពេលហាត់ប្រាណ ។ ដូចគ្នានេះដែរបញ្ហានេះក៏អាចកើតឡើងចំពោះមនុស្សដែលកើតលឿនជាងថ្ងៃសម្រាល ប៉ុន្តែការសិក្សាមិនបានពិនិត្យលើរចនាសម្ព័ន្ធរូបរាងរបស់បេះដូងពួកគេទេ ។
អ្នកដែលមានសុខភាពបេះដូង និងផ្លូវដង្ហើមមិនល្អមានហានិភ័យខ្ពស់ក្នុងការកើតជំងឺខ្សោយបេះដូង និងសម្ពាធឈាមឡើងខ្ពស់នៅពេលក្រោយក្នុងជីវិតពួកគេ ដោយហេតុថាវាពិបាកសម្រាប់ពួកគេក្នុងការរក្សាភាពរឹងមាំខាងផ្នែករាងកាយទាំងមូល ៕
ចែករំលែកព័តមាននេះ