រាជធានីភ្នំពេញ ៖ យោងតាមសេចក្តីប្រកាសរបស់ WCS កាលពីថ្ងៃទី៣០ ខែតុលា ឆ្នាំ២០១៧ថា ក្រុមអ្នកស្រាវជ្រាវនៃក្រសួងបរិស្ថាន អង្គការសមាគមអភិរក្សសត្វព្រៃ (WCS)…
រាជធានីភ្នំពេញ ៖ យោងតាមសេចក្តីប្រកាសរបស់ WCS កាលពីថ្ងៃទី៣០ ខែតុលា ឆ្នាំ២០១៧ថា ក្រុមអ្នកស្រាវជ្រាវនៃក្រសួងបរិស្ថាន អង្គការសមាគមអភិរក្សសត្វព្រៃ (WCS) និងប្រជាសហគមន៍បានរកឃើញសំបុកពងកូនសត្វត្រដក់តូចដែលជាប្រភេទងាយរងគ្រោះជាសាកលចំនួន១២១សំបុក នៅក្នុងដែនជម្រកសត្វព្រៃគូលែន និងដែនជម្រកព្រៃឆែបនៃតំបន់ខ្ពង់រាបភាគខាងជើងប្រទេសកម្ពុជា សម្រាប់រដូវកាលពងកូនឆ្នាំនេះ ។ តាមរយៈកម្មវិធីការពារសំបុកសត្វស្លាប អង្គការ WCSបានជួលប្រជាសហគមន៍ចំនួន១០ក្រុមឱ្យយាមសំបុកត្រដក់ទាំងអស់នោះ រហូតដល់ពេលកូនវាញាស់ និងហើរចេញពីសំបុក ។ កម្មវិធីនេះធានាថាសំបុកពងកូនសត្វស្លាបប្រភេទរងគ្រោះជាសាកល ត្រូវបានការពារពីអ្នកប្រមាញ់ ការប្រមូលយកពងកូន និងការរំខានជាដើម ។
ត្រដក់តូច គឺជាសត្វស្លាបមានមាឌធំ មានកម្ពស់រហូតដល់១៣០សង្ទីម៉ែត្រ ហើយស្លាបរបស់វាពីម្ខាងទៅម្ខាងទៀតមានប្រវែងជាង២ម៉ែត្រ ។ ទោះបីជាចំនួនរបស់វានៅលើសាកលលោកត្រូវបានគេប៉ាន់ប្រមាណថាមានជាង១ម៉ឺនក្បាល ប៉ុន្តែតួលេខនេះកំពុងតែធ្លាក់ចុះយ៉ាងខ្លាំងនៅតំបន់អាស៊ី ។ ដូច្នេះហើយវាត្រូវបានគេចាត់ជាប្រភេទងាយរងគ្រោះជាសាកលនៅក្នុងបញ្ជីក្រហមរបស់អង្គការ IUCN ។
លោករស់ វ៉ាន់ ប្រធានក្រុមស្រាវជ្រាវសត្វព្រៃប្រចាំដែនជម្រកសត្វព្រៃគូលែន ព្រហ្មទេពនៃក្រសួងបរិស្ថាន និងអង្គការ WCS បាននិយាយថា «អរគុណដល់ម្ចាស់ជំនួយដូចជា មជ្ឈមណ្ឌលសំ វាសនា Margaret A. Cargill Phianthropies និងសហភាពអឺរ៉ុប គិតចាប់ពីដើមខែតុលាមក ក្រុមស្រាវជ្រាវបានរកឃើញសំបុកត្រដក់តូចចំនួន១២១សំបុកនៅក្នុងតំបន់ខ្ពង់រាបភាគខាងជើងប្រទេសកម្ពុជា។ សំបុកត្រដក់តូចចំនួន៦៥មានទីតាំងក្នុងដែនជម្រកសត្វព្រៃឆែប និង៥៦សំបុកស្ថិតក្នុងដែនជម្រកសត្វព្រៃគូលែន ព្រហ្មទេព។
ក្រុមអ្នកស្រាវជ្រាវ នៅតែបន្តស្វែងរកសំបុកត្រដក់តូច និងកំពុងធ្វើការរួមគ្នាជាមួយសមាជិកសហគមន៍ដើម្បីការពារសំបុក និងទីតាំងពងកូនរបស់ពួកវា ។
ត្រដក់តូចចូលចិត្តធ្វើសំបុកពងកូននៅលើដើមឈើខ្ពស់ដែលជាប្រភេទព្រៃល្បោះ ព្រៃពាក់កណ្តាលស្រោង និងព្រៃស្រោង ។ តំបន់ខ្ពង់រាបភាគខាងជើងប្រទេសកម្ពុជាក្នុងខេត្តព្រះវិហារ គឺជាទីជម្រកសំខាន់បំផុតមួយសម្រាប់ហ្វូងសត្វត្រដក់តូច ។
លោកសុង ច័ន្ទសុជាតិ អនុប្រធានមន្ទីរបរិស្ថានខេត្តព្រះសីហនុ បាននិយាយថា «ត្រដក់តូចគឺជាប្រភេទងាយរងគ្រោះជាសាកល ។ ការការពារទីជម្រកពងកូនរបស់ពួកវា ពិតជាចាំបាច់ខ្លាំងណាស់ដើម្បីធានាដល់ការរស់រាននៃប្រភេទសត្វដ៏កម្រមួយនេះ ។ តំបន់ខ្ពង់រាបភាគខាងជើងប្រទេសកម្ពុជាក្នុងខេត្តព្រះវិហារ គឺជាទីជម្រកពងកូនសំខាន់ជាងគេបង្អស់ទី២នៅកម្ពុជា បន្ទាប់ពីតំបន់រ៉ាមសារព្រែកទាល់ ខេត្តបាត់ដំបង ។ សូមចូលរួមការពារសត្វព្រៃនៅកម្ពុជា ដោយបញ្ឈប់ការបរបាញ់ ការបំពុល ឬបរិភោគសាច់សត្វព្រៃជាដើម »។
តាមរយៈកម្មវិធីការពារសំបុកសត្វស្លាបដូចជាសត្វត្រដក់នេះ ប្រជាសហគមន៍ដែលធ្លាប់តែប្រមូលយកពងសត្វមកធ្វើជាចំណីអាហារ ឥឡូវនេះបានងាកមកថែរក្សា និងការពារសត្វស្លាបទាំងអស់នោះវិញ ។
លោកសំ ឃឿន គឺជាសមាជិកសហគមន៍ម្នាក់ក្នុងចំណោមចំនួន២០នាក់ ដែលអង្គការ WCSបានជួលឱ្យយាមសំបុកត្រដក់តូចឆ្នាំនេះ ហើយវាក៏ជាឆ្នាំទី៣ហើយដែលលោកបានការពារសំបុកសត្វត្រដក់តូចនៅក្នុងដែនជម្រកសត្វព្រៃគូលែនព្រហ្មទេព ។
លោកសំ ឃឿន អ្នកយាមសំបុកសត្វត្រដក់តូចម្នាក់ និយាយថា៖«ខ្ញុំរីករាយខ្លាំងណាស់ដែលហ្វូងត្រដក់តូចមកធ្វើសំបុកពងកូននៅទីនេះម្តងទៀត ។ ខ្ញុំនឹងព្យាយាមការពារត្រដក់ទាំងអស់នេះ និងសំបុកពងកូនរបស់ពួកវាឱ្យបានល្អដូច២ឆ្នាំកន្លងទៅ ។ ក្រោយពេលអង្គការWCS បានជួលខ្ញុំ និងកូនឱ្យយាមសំបុកនេះ ខ្ញុំបានផ្លាស់ប្តូរវេនគ្នាយាមជាប្រចាំដើម្បីការពារកុំឱ្យមានអ្នកមករំខាន ឬបរបាញ់ពួកវាជាដើម។ ខ្ញុំនឹងព្យាយាមឱ្យអស់ពីលទ្ធភាពដើម្បីការពាររហូតដល់ពួកវាញាស់ និងហើរចេញពីសំបុក »៕
ចែករំលែកព័តមាននេះ