ខេត្តក្រចេះ ៖ អភិបាលរងខេត្តទទួលបន្ទុកមន្ទីរព័ត៌មាន លោកស្រី ប៊ន សុភី បានព្រមាន ថា អ្នកកាសែតដែលធ្វើការមិនគោរពទៅតាមវិជ្ជាជីវៈ ឬក្រមសីលធម៌គឺទៅថ្ងៃខាងមុខអាចប្រឈមការចាត់វិធានការទៅនឹងបទល្មើសព្រហ្មទណ្ឌ។…
ខេត្តក្រចេះ ៖ អភិបាលរងខេត្តទទួលបន្ទុកមន្ទីរព័ត៌មាន លោកស្រី ប៊ន សុភី បានព្រមាន ថា អ្នកកាសែតដែលធ្វើការមិនគោរពទៅតាមវិជ្ជាជីវៈ ឬក្រមសីលធម៌គឺទៅថ្ងៃខាងមុខអាចប្រឈមការចាត់វិធានការទៅនឹងបទល្មើសព្រហ្មទណ្ឌ។ លោកស្រីអភិបាលរងខេត្ត និងជាអតីតអ្នកនាំពាក្យសាលាខេត្តផងដែរនោះ បានប្រាប់ឲ្យអ្នកកាសែតជិត២០០ស្ថាប័ន អង្គភាព ដែលមានវត្តមាននៅខេត្តក្រចេះត្រូវធ្វើការងារគោរពទៅតាមវិជ្ជាជីវៈ និងក្រមសីលធម៌ឲ្យបានខ្ជាប់ខ្ជួនកុំធ្វើអ្វីលើសលួសហួសព្រំដែនដែលច្បាប់បានកំណត់។
ការព្រមាននេះធ្វើឡើងនៅក្នុងជំនួបជាមួយក្រុមអ្នកសារព័ត៌មានមកពីស្ថាប័នអង្គភាពផ្សេងៗគ្នាដូចជា គេហទំព័រ ទូរទស្សន៍អនឡាញ អ្នកសារព័ត៌មានបោះពុម្ព អ្នកថតទូរទស្សន៍នៅព្រឹកថ្ងៃទី៣០ តុលា នៅសាលប្រជុំមន្ទីរព័ត៌មានខេត្ត ក្នុងពិធីជួបជុំដើម្បីពង្រឹងក្រមសីលធម៌វិជ្ជាជីវៈច្បាប់ស្តីពីរបបសារព័ត៌មាន ក៏ដូចជាការរឹតបន្តឹងគុណភាពអ្នកសារព័ត៌មានឲ្យបានល្អប្រសើរឡើង ។
បើតាមមន្ត្រីនៃមន្ទីរព័ត៌មានខេត្តបានឲ្យដឹងថា ខេត្តក្រចេះមានអ្នកសារព័ត៌មានមិនតិចជាង ២០០នាក់មកពីស្ថាប័ន អង្គភាពផ្សេងៗក្នុងនោះមាន១៤៣ស្ថាប័ន អង្គភាពបានមកចុះឈ្មោះនៅមន្ទីរព័ត៌មានខេត្តក្នុងឆ្នាំ២០១៧នេះ។ មន្ត្រីដដែលបានឲ្យដឹងថា កន្លងមកមានអ្នកសារព័ត៌មានក្នុងខេត្តនេះជាច្រើននាក់ បានប្រព្រឹត្តនូវសកម្មភាពខុសពីវិជ្ជជីវៈ ប៉ះពាល់ដល់សណ្តាប់ធ្នាប់សង្គមនិងសន្តិសុខការរស់ នៅរបស់ប្រជាពលរដ្ឋ ហើយសកម្មភាពរបស់ពួកគាត់ខ្លះ អាចប៉ះពាល់ដល់បទល្មើសព្រហ្មទណ្ឌទៀតផង ។
កាលពីពេលថ្មីៗនេះ អាជ្ញាធរស្រុកស្នួលធ្លាប់បានឃាត់ខ្លួនអ្នកកាសែតជាច្រើននាក់នៅស្រុកស្នួលមកធ្វើការអប់រំណែនាំក្រោយពីពួកគាត់បាន ធ្វើសកម្មភាពប្រមូលផ្តុំ ដែលអាជ្ញាធរអះអាងថា ជាសកម្មភាពខុសច្បាប់ ។ដោយសារតែទង្វើរបស់អ្នកសារព័ត៌មានមួយចំនួននោះបានប្រព្រឹត្តទៅដោយទង្វើមិនគប្បីប៉ះពាល់ដល់សង្គម ទើបអាជ្ញាធរខេត្តបានកោះហៅពួកគាត់ដែលមានវត្តមានក្នុងបញ្ជីរបស់មន្ទីរព័ត៌មានឲ្យមានការជួបជុំ និងជំរុញឲ្យពួកគាត់ធ្វើកិច្ចការងារគោរពតាមវិជ្ជាជីវៈ ។
អភិបាលរងខេត្ត លោកស្រីប៊ន សុភី បានលើកឡើងទៀតថា ការជួបជុំនេះគឺនឹងត្រូវធ្វើឡើងជារៀងរាល់១ឆ្នាំម្តងរវាងមន្ទីរព័ត៌មានជាមួយនឹងអ្នកសារព័ត៌មានទាំងអស់ដែលមានវត្តមាននៅទឹកដីខេត្តក្រចេះ។ លោកស្រីអភិបាលរងខេត្តបានបញ្ជាក់ថា ការមកជួបជុំរវាងអាជ្ញាធរ និងអ្នកសារព័ត៌មាននេះ គឺធ្វើឡើងក្នុងគោលបំណងធ្វើយ៉ាងណាឲ្យអ្នកសារព័ត៌មានទាំងអស់នេះធ្វើការងារគោរពតាមវិជ្ជាជីវៈ ពង្រឹងក្រមសីលធម៌ វិជ្ជាជីវៈច្បាប់ស្តីពី របបសារព័ត៌មាន ក៏ដូចជាការរឹតបន្តឹងគុណភាពអ្នកសារព័ត៌មានឲ្យមានភាពល្អប្រសើរឡើង ៕
ចែករំលែកព័តមាននេះ