រាជធានីភ្នំពេញ ៖ បើតាមឯកសារសុខភាព ទឹកក្រូចច្របាច់ជាជម្រើសនៃភេសជ្ជៈដ៏ល្អបំផុតសម្រាប់ទទួលទានជាមួយអាហារពេលព្រឹក ព្រោះរាល់ប្រភេទនៃទឹកក្រូចច្របាច់១កែវ មានផ្ទុកនូវកាឡូរីជាង១០០កាឡូរី ។ ដោយសារតែផ្លែឈើនេះមានប្រយោជន៍ដល់សុខភាព បច្ចុប្បន្នគេសង្កេតឃើញថា របរលក់ផ្លែក្រូចពោធិ៍សាត់…
រាជធានីភ្នំពេញ ៖ បើតាមឯកសារសុខភាព ទឹកក្រូចច្របាច់ជាជម្រើសនៃភេសជ្ជៈដ៏ល្អបំផុតសម្រាប់ទទួលទានជាមួយអាហារពេលព្រឹក ព្រោះរាល់ប្រភេទនៃទឹកក្រូចច្របាច់១កែវ មានផ្ទុកនូវកាឡូរីជាង១០០កាឡូរី ។ ដោយសារតែផ្លែឈើនេះមានប្រយោជន៍ដល់សុខភាព បច្ចុប្បន្នគេសង្កេតឃើញថា របរលក់ផ្លែក្រូចពោធិ៍សាត់ និងទឹកក្រូចច្របាច់ស្រស់ៗ ត្រូវបានលក់នៅតាមផ្លូវ ឬតាមទីសាធារណៈជាច្រើន មិនថានៅរាជធានីភ្នំពេញ សូម្បីតែនៅតាមបណ្តាខេត្តមួយចំនួនក៏មានលក់ដែរ ។
លោក ប៊ិន រ៉េន អ្នកលក់ទឹកក្រូចពោធិ៍សាត់ច្របាច់ នៅក្បែររបងវិទ្យាល័យបឹងកេងកង រៀបរាប់ថា លោកបានប្រកបមុខរបរលក់នេះអស់រយៈពេលជាង៤ឆ្នាំហើយ ដោយក្នុង១ថ្ងៃ លក់អស់រហូតដល់ជាង២០ឡូឯណោះ ។
លោកបន្តថា ៖« ក្រូចពោធិ៍សាត់ទាំងនេះ ខ្ញុំបានយកពីខេត្តបាត់ដំបងមកដាក់លក់ ។ ខ្ញុំលក់ទឹកក្រូចច្របាច់ស្រស់ៗផង និងលក់ផ្លែក្រូចគិតជាឡូផង ។ ទឹកក្រូចគាបច្រកដបចែកជា២ប្រភេទ គឺដបធំតម្លៃ៧ពាន់រៀល និងដបតូចតម្លៃ៥ពាន់រៀល ។ ចំណែកផ្លែក្រូចវិញលក់១ឡូ តម្លៃចាប់ពី១ម៉ឺនទៅ១.២០០០រៀល » ។
លោកបន្ថែមថា ៖« ការលក់ទឹកក្រូចច្របាច់ ឬក៏ផ្លែក្រូចពោធិ៍សាត់នេះដែរ គឺលក់ដាច់យ៉ាងខ្លាំង ដោយមានអតិថិជនគ្រប់វ័យទាំងអស់ មិនថាចាស់ ឬក្មេង បានមកទិញយកទៅពិសាជារៀងរាល់ថ្ងៃ ។ ពួកគាត់និយាយថា គុណសម្បត្តិនៃការពិសាទឹកក្រូចច្របាច់ស្រស់ ឬហូបផ្លែក្រូចពោធិ៍សាត់នេះ វាអាចជួយកាត់ជាតិខ្លាញ់ក្នុងខ្លួន និងទប់ស្កាត់ភាពធាត់បាន » ។
លោក ប៊ិន រ៉េន លើកឡើងថា កាលពីមុន លោកលក់ដាច់យ៉ាងខ្លាំង សឹងតែដកដៃមិនរួច និងត្រូវការមនុស្ស២នាក់មកជួយ ទើបលក់ទាន់ ប៉ុន្តែពេលនេះ អតិថិជនហាក់ថយចុះ ដោយសារតែក្នុងរយៈពេល៣ទៅ៤ខែចុងក្រោយនេះ មានអ្នករកស៊ីរបរដូចគ្នាកាន់តែច្រើនពីមួយថ្ងៃទៅមួយថ្ងៃ ។
លោកថា ៖« កន្លែងរបស់ខ្ញុំធ្លាប់លក់ក្រូចអស់ជាច្រើនឡូក្នុង១ថ្ងៃ ប៉ុន្តែពេលនេះក្នុង១ថ្ងៃ លក់អស់តែជាង១០ឡូប៉ុណ្ណោះ និងមិនចាំបាច់លក់គ្នា២នាក់ទេ »។
យោងតាមឯកសារស្រាវជ្រាវបង្ហាញថា ទឹកក្រូចច្របាច់១កែវមានជាតិស្ករប្រហែល២១ក្រាម, កាបូអ៊ីដ្រាត ១២ក្រាម, ជាតិខ្លាញ់តិចជាង ០,១ក្រាម និង មានជាតិសរសៃប្រហែលជា ០,៥ក្រាម ។ ការផ្ទុកនូវជាតិសរសៃនេះ អាចនឹងកើនឡើង ទៅតាមវត្តមានរបស់សាច់ក្រូចដែលមាននៅក្នុងនោះ។ ទឹកក្រូចច្របាច់ស្រស់ៗ ដែលអ្នកធ្វើដោយខ្លួនឯងនៅផ្ទះ អាចមានផ្ទុកជាតិសរសៃជិតដល់ទៅ៤ក្រាម។ ទឹកក្រូចច្របាច់នេះ ក៏ជាប្រភពដ៏ល្អបំផុតនៃសារធាតុវីតាមីន C ផងដែរ ។
អត្ថប្រយោជន៍ចំពោះសុខភាព
ភាគច្រើននៃគុណសម្បត្តិរបស់ទឹកក្រូចច្របាច់ចំពោះសុខភាព គឺដោយសារតែការផ្ទុកនូវកម្រិតដ៏ខ្ពស់នៃវីតាមីនCរបស់វា ។ វីតាមីននេះ គឺមានទំនួលខុសត្រូវ ចំពោះការបង្កើតឡើងនូវជាតិកូឡាជែន ជាប្រូតេអុីនម្យ៉ាងដែលរាងកាយយើងត្រូវការដើម្បីបង្កើតសរសៃចំណង, សរសៃឈាម, ស្បែក និងសរសៃពួរសាច់ដុំ។ វាក៏ជួយផងដែរ ក្នុងការបង្ការនូវការបំផ្លាញរបស់កោសិកាសេរី ដែលអាចធ្វើឲ្យយើងចាស់មុនអាយុ, ប្រឈមនឹងជំងឺមហារីកជាក់លាក់មួយចំនួន និងការពារនូវជំងឺសរសៃឈាមបេះដូងបានផងដែរ៕
ចែករំលែកព័តមាននេះ