រាជធានីភ្នំពេញ ៖ អាជីវកម្មដឹកអ្នកដំណើរក្រៅប្រព័ន្ធដូចជា ម៉ូតូឌុប ម៉ូតូកង់បី និងតាក់ស៊ីលក្ខណៈឯកជន កំពុងតែមានបញ្ហាប្រឈមជាមួយក្រុមហ៊ុនបរទេសដែលចូលមកកាន់ និងកំពុងគ្រប់គ្រងទីផ្សារមួយនេះកាន់តែខ្លាំងឡើង ដោយសារការបំពាក់បច្ចេកវិទ្យាទំនើប ។…
រាជធានីភ្នំពេញ ៖ អាជីវកម្មដឹកអ្នកដំណើរក្រៅប្រព័ន្ធដូចជា ម៉ូតូឌុប ម៉ូតូកង់បី និងតាក់ស៊ីលក្ខណៈឯកជន កំពុងតែមានបញ្ហាប្រឈមជាមួយក្រុមហ៊ុនបរទេសដែលចូលមកកាន់ និងកំពុងគ្រប់គ្រងទីផ្សារមួយនេះកាន់តែខ្លាំងឡើង ដោយសារការបំពាក់បច្ចេកវិទ្យាទំនើប ។ តួយ៉ាង ក្រុមហ៊ុនអាមេរិក ដែលមកដល់ស្រុកខ្មែរកាលពីប៉ុន្មានខែមុននោះ គឺក្រុមហ៊ុនអ៊ូប័រ និងការប្រើប្រាស់បច្ចេកវិទ្យាលើទូរស័ព្ទដៃសម្រាប់ស្វែងរកមធ្យោបាយធ្វើដំណើរ ឬហៅថា Apps ។
លោក ឯ សុភាស់ ប្រធានសមាគមរួមគ្នាដើម្បីអភិវឌ្ឍន៍កម្ពុជា ដែលមានសមាជិកជាអ្នករត់ម៉ូតូកង់បី និងអ្នករត់ម៉ូតូឌុប បានឱ្យដឹងថា ផលប៉ះពាល់នៃអាជីវកម្មរត់ម៉ូតូឌុប និងកង់បី ក៏ដូចជាតាក់ស៊ី វាពិតជាមាន ពីព្រោះពួកគាត់ទាំងនោះភាគច្រើននៅតែប្រកបរបរដែលមានលក្ខណៈប្រពៃណី និងទម្លាប់ដដែលៗ ។
លោកនិយាយថា ៖« បើសិនជាអ្នកប្រកបអាជីវកម្មទាំងនោះនៅតែធ្វើទៅតាមលក្ខណៈបុរាណ និងគ្មានការផ្លាស់ប្តូរទេនោះ ថ្ងៃអនាគត វានឹងកាន់តែមានផលប៉ះពាល់ខ្លាំងឡើងៗ រហូតដល់ឈានទៅអត់ប្រាក់ចំណូលជាដើម » ។
លោកបន្តថា ទោះជាយ៉ាងណាក៏ដោយ ក៏មានបងប្អូនដែលប្រកបអាជីវកម្មបែបនេះ បានផ្លាស់ប្តូរមួយចំនួនហើយ ដោយពួកគាត់បានចូលរួមជាមួយក្រុមហ៊ុនបច្ចេកវិទ្យា និងបំពាក់ Apps ក្នុងទូរស័ព្ទ ក៏ប៉ុន្តែចំនួនអ្នកភ្ជាប់បច្ចេកវិទ្យាសម្រាប់ឲ្យអតិថិជនស្វែងរកនៅតិចតួចនៅឡើយ ដោយសារតែអ្នករត់កង់បីភាគច្រើននៅប្រើម៉ូតូធម្មតា ដែលមិនអាចភ្ជាប់បានដូចអ្នកប្រើតាក់ស៊ីកង់បីទើបតែនាំចូលមកថ្មីៗនោះ ព្រោះម៉ូតូធម្មតាពិបាកទុកដាក់ស្មាតហ្វូនរបស់ពួកគាត់ ។
លោកបន្ថែមថា ៖« ដោយសារតែកម្ពុជាជាប្រទេសប្រកាន់យកទីផ្សារសេរី យើងមិនអាចទប់ស្កាត់ការចូលមកនៃក្រុមហ៊ុនដឹកជញ្ជូន ដែលប្រើបច្ចេកវិទ្យាថ្មីៗទេ យើងមានតែអំពាវនាវដល់បងប្អូនប្រជាពលរដ្ឋប្រកបរបរជាអ្នកដឹកជញ្ជូន ចូលរួមទទួលយកនូវអ្វីថ្មីៗដើម្បីរកប្រាក់ចំណូលបន្ថែមទៀត ព្រោះបើនៅតែធ្វើអាជីវកម្មលក្ខណៈបុរាណទៀតនោះ ប្រាក់ចំណូលនឹងកាន់តែថយចុះ ហើយឱកាសនៃការអត់ការងារកាន់តែច្រើន » ។
លោកបញ្ជាក់ថា ដើម្បីឱ្យសមាជិកទាំងនោះ ទទួលបានប្រាក់ចំណូលឡើងវិញ និងកាន់តែច្រើន ក្នុងនាមជាសមាគម លោកនឹងរៀបចំឱ្យពួកគាត់ត្រូវប្តូរឥរិយាបថឱ្យមានរបៀបរបបត្រឹមត្រូវ ព្រោះបច្ចុប្បន្ននេះ សាធារណជនជាច្រើនមើលឃើញថា ក្រុមអ្នករត់ម៉ូតូ និងកង់បី នៅមានភាពរញ៉េរញ៉ៃនៅឡើយទាំងការបើករបរ និងឯកសណ្ឋាន ។ ដូចនេះ ត្រូវហៅពួកគាត់មកអប់រំណែនាំក្នុងការបើកបរ និងមានសម្លៀកបំពាក់ឯកសណ្ឋានមួយស្តង់ដា ។
លោក ផង់ សុគា ប្រធានសមាគមតាក់ស៊ីកម្ពុជា បានឲ្យដឹងថា សម្រាប់អ្នករត់តាក់ស៊ីនៅកម្ពុជាវិញ បញ្ហាប្រឈមរបស់ពួកគាត់ចំពោះមុខនេះ គឺពួកគាត់នៅប្រើប្រាស់រថយន្តចាស់ៗនៅឡើយ ដោយមិនទាន់មានលទ្ធភាពទិញរថយន្តថ្មីទំនើបៗដឹកអ្នកដំណើរទេ ។ ទាំងនេះហើយដែលធ្វើឲ្យក្រុមហ៊ុនធំៗដណ្ដើមយកទីផ្សារអស់មួយចំនួន។
លោកថា ៖« ការប្រើប្រាស់រថយន្តចាស់ៗទាំងនេះ បានធ្វើឱ្យអតិថិជនបាត់បង់ជំនឿជាក់មកលើម្ចាស់រថយន្ត ព្រោះមានអ្នកដំណើរខ្លះ ពេលទូរស័ព្ទមកសួររករថយន្ត សុទ្ធតែសួរបញ្ជាក់ថា តើរថយន្តនោះប្រភេទអី ឬស៊េរីអី ។ ដូចនេះ បើសិនជារថយន្តយើងចាស់ គេអាចប្តូរចិត្តមិនប្រើសេវារបស់យើង » ។
លោកបន្តថា ដោយសារតែការប្រកួតប្រជែងខាងបច្ចេកវិទ្យានេះកាន់តែខ្លាំងនៅក្នុងប្រទេសកម្ពុជា សមាគមអ្នករត់តាក់ស៊ីកម្ពុជា ក៏បានបង្កើត Apps មួយដើម្បីឱ្យអ្នកស្វែងរកមធ្យោបាយដឹកជញ្ជូន ងាយស្រួលរកសមាជិកអ្នករត់តាក់ស៊ីនៅក្នុងសមាគម ។ មិនតែប៉ុណ្ណោះ សមាគមក៏បានបើកទូលាយដល់សមាជិកផ្សេងៗដែលចង់ទៅបំពាក់ Apps ជាមួយក្រុមហ៊ុនដទៃបានផងដែរ ដើម្បីឲ្យអាជីវកម្មពួកគេកាន់តែប្រសើរ និងរកចំណូលបន្ថែមទៀត ។
លោក សាន ស៊ាន អ្នករត់តាក់ស៊ីម៉ែត្រដែលបំពាក់បច្ចេកវិទ្យា PassApp Taxi បានឲ្យដឹងថា ដើម្បីក្លាយជាអ្នករត់តាក់ស៊ីនេះបាន អ្នកបើកបរត្រូវមានប័ណ្ណបើកបរ មានបទពិសោធន៍ និងស្គាល់ភូមិសាស្ត្រច្រើន ។
លោកបន្ដថា ៖« ការជិះតាក់ស៊ីម៉ែត្រនេះ វាងាយស្រួល តម្លៃឃើញនឹងភ្នែក និងមិនបាច់តថ្លៃ ដែលធ្វើឲ្យអ្នកដំណើរមានទំនុកចិត្តខ្ពស់ ។ សេវាកម្មនេះ ពេលឡើងជិះភ្លាម ដឹងតែគិតលុយភ្លាម គឺគិតជាគីឡូម៉ែត្រ ហើយតម្លៃសេវាកម្មក្រុមហ៊ុនខ្ញុំគឺ៣ពាន់រៀលក្នុង១គីឡូម៉ែត្រ » ។
គួរបញ្ជាក់ថា បច្ចេកវិទ្យាកាន់តែទំនើប នឹងធ្វើឱ្យអាជីវកម្មលក្ខណៈប្រពៃណី កាន់តែធ្លាក់ចុះ ក្នុងន័យនេះមិនមែនបច្ចេកវិទ្យាទំនើបធ្វើឲ្យប្រទេសធ្លាក់ចុះទេ ប៉ុន្តែត្រូវទាមទារឲ្យមានការបណ្ដុះបណ្ដាលធនធានមនុស្សលើវិស័យបច្ចេកវិទ្យា ។
សម្ដេចតេជោនាយករដ្ឋមន្ត្រីនៃព្រះរាជាណាចក្រកម្ពុជា ក៏បានជំរុញឲ្យមន្ត្រីគ្រប់ជាន់ថ្នាក់នៅកម្ពុជា ត្រូវចេះប្រើប្រាស់បច្ចេកវិទ្យាដើម្បីឱ្យការងារបានរហ័សផងដែរ ៕
ចែករំលែកព័តមាននេះ