ការស្រាវជ្រាវមួយបានរកឃើញថា ទឹកដោះម្តាយមានសារធាតុប្រឆាំងនឹងបាក់តេរីពីធម្មជាតិដែលអាចប្រើនៅក្នុងការប្រយុទ្ធប្រឆាំងនឹងជំងឺដែលស៊ាំនឹងថ្នាំផ្សះ ។
ទឹកដោះរបស់ម្តាយត្រូវបានគេស្គាល់ជាយូរមកហើយថាមានគ្រឿងផ្សំពិសេសជាច្រើនប្រភេទ ព្រមទាំងផ្តល់អាហារូបត្ថម្ភ និងជួយទារកក្នុងការប្រយុទ្ធប្រឆាំងនឹងការឆ្លងមេរោគផ្សេងៗ ។
ខណៈពេលដែលក្រុមអ្នកវិទ្យាសាស្ត្រពីមុនបានផ្តោតលើតើប្រូតេអ៊ីនជាក់លាក់មួយចំនួនដែលមានក្នុងទឹកដោះម្តាយអាចសម្លាប់មេរោគបានដោយរបៀបណា ឥឡូវនេះពួកគេបានរកឃើញថាជាតិស្ករនៅក្នុងទឹកដោះម្តាយក៏មានប្រសិទ្ធភាពប្រឆាំងនឹងបាក់តេរីដែរ ។
ឥឡូវនេះក្រុមអ្នកវិទ្យាសាស្ត្រត្រូវការការសិក្សាបន្ថែមទៀតជាមួយនឹងក្តីសង្ឃឹមនៃការប្រើប្រាស់លក្ខណសម្បត្តិនៃទឹកដោះម្តាយដើម្បីបង្កើតថ្នាំផ្សះថ្មី ។
បាក់តេរីដែលស៊ាំនឹងថ្នាំផ្សះជាច្រើននៅទូទាំងពិភពលោកចម្លង និងសម្លាប់មនុស្សរាប់សែននាក់ជារៀងរាល់ឆ្នាំ នាំឲ្យការស្រាវជ្រាវរកថ្នាំផ្សះថ្មីគឺជាអាទិភាពជាបន្ទាន់ ។
ក្រុមអ្នកស្រាវជ្រាវនៅសាកលវិទ្យាល័យ Vanderbilt សហរដ្ឋអាមេរិកបាននិយាយថាគុណប្រយោជន៍មួយនៃសារជាតិប្រឆាំងនឹងបាក់តេរីដែលមានក្នុងទឹកដោះម្តាយគឺវាមានសុវត្ថិភាពយ៉ាងខ្លាំងក្នុងការទទួលទាន ។
សាស្ត្រាចារ្យជំនួយផ្នែកគីមីវិទ្យាលោក Steven Townsend បាននិយាយអំពីការរកឃើញនេះថា ៖ «នេះគឺជាឧទាហរណ៍ដំបូងនៃសកម្មភាពប្រឆាំងនឹងមេរោគទូទៅនៃជាតិកាបូអ៊ីដ្រាតនៅក្នុងទឹកដោះរបស់មនុស្ស» ។
លក្ខណសម្បត្តិដ៏គួរឱ្យកត់សម្គាល់មួយនៃសមាសធាតុទាំងនេះគឺវាមិនមានជាតិពុលដូចថ្នាំផ្សះដែលយើងប្រើប្រាស់នាពេលបច្ចុប្បន្ននេះទេ ។
លោកសាស្ត្រាចារ្យ Townsend បាននិយាយថាលទ្ធផលរបស់យើងបង្ហាញថាជាតិស្ករទាំងនេះពិតជាមានភាពឆ្លាតវៃណាស់ ។ ដំបូង ពួកវាមានប្រតិកម្មទៅនឹងបាក់តេរីគោលដៅ ហើយបន្ទាប់មកសម្លាប់បាក់តេរីទាំងនោះ ។ ជួនកាលក្រុមជីវវិទូហៅសកម្មភាពនេះថា «ការស្លាប់ដោយការសំយោគ» ហើយមានការជំរុញដ៏សំខាន់មួយក្នុងការអភិវឌ្ឍថ្នាំប្រឆាំងនឹងមេរោគថ្មីៗជាមួយនឹងសមត្ថភាពនេះ ។
ប្រតិកម្មរបស់ជាតិស្ករក្នុងទឹកដោះម្តាយនេះជួយកាត់បន្ថយភាពស៊ាំរបស់បាក់តេរីចំពោះសារធាតុប្រឆាំនឹងបាក់តេរី ៕
ចែករំលែកព័តមាននេះ