រាជធានីភ្នំពេញ ៖ សហព័ន្ធកីឡាបាល់ទាត់កម្ពុជា (FFC) បានចេញសេក្ដីប្រកាសតែងតាំងលោក ប្រាក់ សុវណ្ណារ៉ា ឱ្យធ្វើជាគ្រូបង្វឹកក្រុមជម្រើសជាតិកម្ពុជា សាជាថ្មីក្នុងលក្ខណៈបណ្ដោះអាសន្ន ជំនួសលោក Leonardo Vitorino អតីតគ្រូបង្វឹកចាស់ជនជាតិប្រេស៊ីលដែលទើបត្រូវបានសហព័ន្ធកីឡាបាល់ទាត់កម្ពុជាបញ្ចប់កិច្ចសន្យាកាលពីពេលថ្មីៗកន្លងមកនេះ ។
នៅក្នុងសេចក្ដីប្រកាសព័ត៌មានរបស់សហព័ន្ធកីឡាបាល់ទាត់កម្ពុជា តែងតាំងលោកប្រាក់ សុវណ្ណារ៉ា ជាគ្រូបង្វឹកក្រុមជម្រើសជាតិកម្ពុជាគឺដើម្បីឱ្យលោកដឹកនាំការហ្វឹកហាត់សម្រាប់ចូលរួមការប្រកួតបាល់ទាត់មិត្តភាពអន្តរជាតិ ជាមួយក្រុមជម្រើសជាតិមីយ៉ាន់ម៉ានៅថ្ងៃទី៩ វិច្ឆិកា ឆ្នាំ២០១៧ និងការប្រកួត AFC Asian Cup UAE 2019 ជាមួយក្រុមជម្រើសជាតិហ្ស៊កដានីនៅថ្ងៃទី៤ វិច្ឆិកា ឆ្នាំ២០១៧ ។
នេះជាលើកទី៣ហើយដែលលោក ប្រាក់ សុវណ្ណារ៉ា ត្រូវបានតែងតាំងជាគ្រូបង្វឹកក្រុមជម្រើសជាតិកម្ពុជា ដែលលើកទី១នៅឆ្នាំ២០០៨ និងលើកទី២នៅឆ្នាំ២០១៣ ។ សម្រាប់ការធ្វើជាគ្រូបង្វឹកក្រុមជម្រើសជាតិកម្ពុជានាពេលនេះ គឺលោកដឹកនាំកីឡាករលេងតែ២ប្រកួតប៉ុណ្ណោះថ្ងៃក្រោយតំណែងមួយនេះស្រេចតែលើសហព័ន្ធកីឡាបាល់ទាត់កម្ពុជាជាអ្នកសម្រេចទៅចុះ ។
លោក ប្រាក់ សុវណ្ណារ៉ា ធ្លាប់មានស្នាដៃល្អក្នុងការដឹកនាំក្រុម Cambodia All Star ឱ្យយកឈ្នះលើក្រុមថៃ SCG Muangthong និងBurirum United មុនពេលលោកដឹកនាំក្រុមបឹងកេតអង្គរឱ្យលើកពានលីគកំពូលកាលពីឆ្នាំ២០១៦ ។ ជាមួយគ្នានេះដែរ លោកទទួលបានការទុកចិត្តពីសហព័ន្ធកីឡាបាល់ទាត់កម្ពុជាឱ្យដឹកនាំក្រុមជម្រើសជាតិកម្ពុជា ជាបណ្ដោះអាសន្ននៅពេលនេះ ។ បើទោះជាមានរយៈពេលខ្លីមែនតែគេសង្ឃឹមថា នឹងទទួលបានលទ្ធផលមួយដែលអាចធ្វើឱ្យមានការពេញចិត្តទាំងអស់គ្នា ៕
ចែករំលែកព័តមាននេះ