រាជធានីភ្នំពេញ ៖ ដោយសារយុទ្ធនាការទិញផលិតផលខ្មែរកាលពីឆ្នាំមុនទទួលបានការគាំទ្រច្រើនពីប្រជាពលរដ្ឋកម្ពុជា ឆ្នាំនេះក្រសួងពាណិជ្ជកម្មក៏បានរៀបចំឡើងម្ដងទៀត ដើម្បីឱ្យពលរដ្ឋកម្ពុជាស្គាល់ផលិតផលរបស់ខ្លួន និងងាកមកប្រើប្រាស់កាន់តែច្រើន ក្នុងគោលបំណងដើម្បីសុវត្ថិភាពផង និងលើកស្ទួយផលិតផលខ្លួនផង ។ យុទ្ធនាការសម្រាប់ឆ្នាំ២០១៧នេះ…
រាជធានីភ្នំពេញ ៖ ដោយសារយុទ្ធនាការទិញផលិតផលខ្មែរកាលពីឆ្នាំមុនទទួលបានការគាំទ្រច្រើនពីប្រជាពលរដ្ឋកម្ពុជា ឆ្នាំនេះក្រសួងពាណិជ្ជកម្មក៏បានរៀបចំឡើងម្ដងទៀត ដើម្បីឱ្យពលរដ្ឋកម្ពុជាស្គាល់ផលិតផលរបស់ខ្លួន និងងាកមកប្រើប្រាស់កាន់តែច្រើន ក្នុងគោលបំណងដើម្បីសុវត្ថិភាពផង និងលើកស្ទួយផលិតផលខ្លួនផង ។ យុទ្ធនាការសម្រាប់ឆ្នាំ២០១៧នេះ បានចាប់ផ្ដើមនៅរាជធានីភ្នំពេញ រយៈពេល៤ថ្ងៃ ពីថ្ងៃទី២៦ ដល់ថ្ងៃទី២៩ តុលា ២០១៧ នៅទល់មុខវិមានសុភមង្គល ស្ទឹងមានជ័យ ។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានមានប្រសាសន៍ថា យុទ្ធនាការទិញផលិតផលខ្មែរ គឺជាសំឡេងជួងពញ្ញាក់ស្មារតីដល់អ្នកប្រើប្រាស់ទាំងឡាយឱ្យងាកមកប្រើប្រាស់ទំនិញក្នុងស្រុក កាត់បន្ថយការហូរចូលទំនិញពីបរទេស ជំរុញការនាំចេញផលិតផលខ្មែរទៅក្រៅប្រទេស រួមចំណែកជួយពង្រឹងសមត្ថភាពផលិត និងបង្កើនការងារក្នុងស្រុក ។
លោកថា ៖« យុទ្ធនាការនេះ ក៏នឹងផ្ដល់ការយល់ដឹងខ្ពស់ដល់អ្នកផលិតក្នុងស្រុក ធ្វើយ៉ាងណា ឱ្យផលិតនូវទំនិញមានគុណភាពខ្ពស់ មានអនាម័យ ធានាសុវត្ថិភាពប្រើប្រាស់ មានសោភ័ណភាពទាក់ទាញ និងមានតម្លៃសមរម្យ អាចប្រកួតប្រជែងជាមួយទំនិញនាំចូល » ។
លោកបន្តថា ការសម្រេចបានជោគជ័យក្នុងការធ្វើយុទ្ធនាការទិញផលិតផលខ្មែរ នឹងជួយកម្ពុជាឱ្យបង្កបាននូវបរិយាកាសអាជីវកម្ម ពាណិជ្ជកម្មក្នុងស្រុកកាន់តែល្អប្រសើរ បង្កើនលទ្ធភាពផលិតកម្មក្នុងស្រុក និងបង្កើនតម្លៃបន្ថែមលើផលិតផលក្នុងស្រុកបានជាអតិបរមា, ផលិតនូវទំនិញថ្មីៗ បម្រើសេចក្ដីត្រូវការក្នុងស្រុក កាត់បន្ថយការនាំចូល និងជំរុញការនាំចេញ, ធ្វើពិពិធកម្មមុខទំនិញថ្មីៗ ដែលមានលទ្ធភាពប្រកួតប្រជែងទាំងលើទីផ្សារក្នុងស្រុក ទីផ្សារក្នុងតំបន់ និងទីផ្សារពិភពលោក ។ បង្កើតបាននូវការងារថ្មីៗថែមទៀត ជួយបង្កើនប្រាក់ចំណូល ជួយទប់ស្កាត់ការធ្វើចំណាកស្រុក និងរួមចំណែកកាត់បន្ថយភាពក្រីក្រ ។
លោកបន្ថែមថា ក្រៅពីសកម្មភាពដាក់តាំងបង្ហាញផលិតផលខ្មែរ ការរៀបចំសិក្ខាសាលា និងការប្រគំតន្ត្រីក្នុងយុទ្ធនាការទិញផលិតផលខ្មែរ ក្រសួងពាណិជ្ជកម្មបានសហការជាមួយក្រសួងឧស្សាហកម្ម និងសិប្បកម្ម, ក្រសួងទេសចរណ៍, ក្រសួងកសិកម្ម រុក្ខាប្រមាញ់ និងនេសាទ និងក្រសួងវប្បធម៌ និងវិចិត្រសិល្បៈ រៀបចំវេទិកាជំនួបពិគ្រោះយោបល់ចំនួន២លើករួចមកហើយ រវាងអ្នកផលិត អ្នកផ្គត់ផ្គង់ផលិតផលខ្មែរ និងអ្នកបញ្ជាទិញ អ្នកប្រើប្រាស់ ផលិតផលខ្មែរ ដូចជា ផ្សារទំនើប សណ្ឋាគារ និងភោជនីយដ្ឋាន ។
លោកថ្លែងថា ៖« នៅក្នុងជំនួបដ៏កម្រនោះ ភាគីអ្នកផលិត អ្នកផ្គត់ផ្គង់ផលិតផលខ្មែរ និងភាគីអ្នកបញ្ជាទិញ អ្នកប្រើប្រាស់ផលិតផលខ្មែរ មានឱកាសបានលើកឡើងពីចំណុចខ្លាំង ចំណុចខ្សោយ ភាពងាយស្រួល ការលំបាក និងសំណូមពររបស់ខ្លួនជូនរដ្ឋមន្ត្រីទាំង៤ក្រសួងដើម្បីឆ្លើយតប និងដោះស្រាយជូនតាមសមត្ថកិច្ចរៀងៗខ្លួន ។ ក្រសួងទាំង៤បានសន្យាថា នឹងរៀបចំវេទិកាដ៏មានសារសំខាន់បែបនេះបន្តទៀតនាពេលខាងមុខ » ។
លោកឧបនាយករដ្ឋមន្ត្រីប្រចាំការ ប៊ិន ឈិន រដ្ឋមន្ត្រីស្តីទីនៃទីស្តីការគណរដ្ឋមន្ត្រី ក៏បានមានប្រសាសន៍ថា ព្រឹត្តិការណ៍ដ៏មានសារសំខាន់នេះ ត្រូវបានរៀបចំឡើងក្នុងគោលបំណងជំរុញសកម្មភាពពាណិជ្ជកម្ម ពង្រីកទីផ្សារទាំងក្នុង និងក្រៅប្រទេស បង្ហាញពីបរិយាកាសធុរកិច្ច និងសក្តានុពលវិនិយោគ ព្រមទាំងបង្ហាញអំពីគោលនយោបាយគាំពារវិនិយោគ និងធុរកិច្ចនៅកម្ពុជា។ តាមរយៈពិព័រណ៍ពាណិជ្ជកម្មផលិតផលខ្មែរនេះ លោកសង្ឃឹមថា អ្នកប្រើប្រាស់នឹងបានស្គាល់កាន់តែច្បាស់ ព្រមទាំងជួយគាំទ្រទំនិញក្នុងស្រុក ។
លោក កុយ សុវណ្ណ ប្រធានផ្នែកលក់ និងទីផ្សារនៃក្រុមហ៊ុនផលិតទឹកដោះគោ Angkormilk ដែលជាផលិតផលខ្មែរ និងបានដាក់តាំងបង្ហាញក្នុងព្រឹត្តិការណ៍នោះឲ្យដឹងថា ព្រឹត្តិការណ៍យុទ្ធនាការទិញផលិតផលខ្មែរនេះ ពិតជាមានសារសំខាន់ណាស់ ដែលអាចផ្ដល់ឱកាសដល់ម្ចាស់សហគ្រិនកម្ពុជាទាំងឡាយផ្សព្វផ្សាយ និងបង្ហាញផលិតផលខ្លួនទៅកាន់ប្រជាពលរដ្ឋកម្ពុជា ។ លោកថា ៖« បច្ចុប្បន្ននេះ ប្រជាពលរដ្ឋតែងតែព្រួយបារម្ភពីសុវត្ថិភាពចំណីអាហារដែលនាំចូលពីបរទេស ប៉ុន្តែពលរដ្ឋមួយចំនួននៅមិនទាន់ដឹងថា តើផលិតផលណាមួយជារបស់ខ្មែរ និងបង្កើតនៅស្រុកខ្មែរពិតប្រាកដ តែនៅពេលព្រឹត្តិការណ៍រៀបចំធ្វើឡើង ពេលនោះ ពលរដ្ឋកាន់តែស្គាល់ពីផលិតផលក្នុងស្រុក និងអាចងាកមកប្រើផលិតផលក្នុងស្រុកវិញ » ។
លោកបន្តថា ផលិតផលរបស់ក្រុមហ៊ុនលោកអាចផ្គត់ផ្គង់គ្រប់ទីផ្សារកម្ពុជា បើទោះបីគ្មានការចូលពីប្រទេសជិតខាងក៏ដោយ ហើយក្រុមហ៊ុនក៏នឹងគ្រោងពង្រីកសង្វាក់ផលិតផលបន្ថែមទៀតដើម្បីផ្គត់ផ្គង់ឲ្យបានទូលំទូលាយនៅក្នុងប្រទេស ខណៈពលរដ្ឋខ្មែរបានស្គាល់កាន់តែច្រើនឡើង ៕
ចែករំលែកព័តមាននេះ