ខេត្តស្ទឹងត្រែង ៖ ជាខេត្តដែលធ្លាប់តែស្ងាត់ជ្រងំប្រែមកជាខេត្តធ្វើឱ្យមានការភ្ញាក់ផ្អើលដល់មហាជន ខណៈពិធីប្រឡងប្រណាំងទូកងត្រូវបានរៀបចំឡើងជាដំបូងសម្រាប់ខេត្តស្ទឹងត្រែងក្នុងឆ្នាំ២០១៧ ។ គេដឹងថា ខេត្តស្ទឹងត្រែង មានទន្លេរហូតដល់ទៅបួនក្នុងនោះរួមមានទន្លេមេគង្គ ទន្លេសេកុង ទន្លេសេសាន និងទន្លេស្រែពក ទន្លេទាំងបួនបានហូរប្រសព្វ ចូលជាទន្លេមួយគឺទន្លេមេគង្គ ។
ជារៀងរាល់ឆ្នាំក្នុងទីរួមខេត្តស្ទឹងត្រែងមិនធ្លាប់រៀបចំបង្កើតកម្មវិធីបែបនេះស្របនឹងកម្មវិធីបុណ្យប្រពៃណីជាតិនោះឡើយ តែស្ថិតក្នុងឆ្នាំ២០១៧នេះកម្មវិធីជាច្រើនត្រូវបានរៀបចំឱ្យមានភាពទាក់ទាញជាប្រវត្តសាស្ត្រសម្រាប់ខេត្តមួយនេះ ដូចជាកម្មវិធីបុណ្យទន្លេ និងកម្មវិធីប្រឡងប្រណាំងទូកងដែលស្របកម្មវិធីជាតិបុណ្យអ៊ុំទូក អកអំបុក បណ្តែតប្រទីប និងសំពះព្រះខែ និងត្រូវចាប់ផ្តើម ។
លោក ម៉ែន គង់ អ្នកនាំពាក្យសាលាខេត្តស្ទឹងត្រែងឱ្យដឹងថា កម្មវិធីប្រឡងប្រណាំងទូកង ២០១៧សម្រាប់ខេត្តស្ទឹងត្រែងត្រូវបានប្រព្រឹត្តឡើងក្នុងរយៈពេល២ថ្ងៃគឺទី២៩និងថ្ងៃ៣០ ខែតុលា ។ លោក ម៉ែន គង់ បន្តថា ការរៀបចំប្រឡងប្រណាំងទូកងឆ្នាំ២០១៧នេះអាជ្ញាធរខេត្តបានរៀបចំទង់ជ័យលាភីទី១ ទី២ និងទី៣ សម្រាប់ក្រុមកីឡាករដែលទទួលបានជ័យលាភីទី១និងទទួលប្រាក់ឧបត្ថមចំនួន៥០ម៉ឺនរៀល, ជ័យលាភីទី២ទទួលបានប្រាក់ឧបត្ថមចំនួន៤០ម៉ឺន រៀល, ជ័យលាភីទី៣ និងទទួលប្រាក់ឧបត្ថមចំនួន៣០ម៉ឺនរៀល ចំណែកក្រុមកីឡាករដែលមិនបានទទួលជ័យលាភី និងត្រូវទទួលប្រាក់ឧបត្ថមចំនួន២០ម៉ឺនរៀលស្មើៗគ្នា ព្រមទាំងគ្រឿងឧបភោគបរិភោគមួយចំនួនទៀត ដោយមិនបញ្ចូលសប្បុរសជនឧបត្ថមបន្ថែមទៀតនោះឡើយ ។
ស្ថិតក្នុងពិធីប្រឡងប្រណាំងទូកងក៏មានការរៀបចំពិធីតាំងពិពណ៌ផលិតផលភូមិមួយផលិតផលមួយ ការប្រឡងប្រណាំងបដិសណ្ឋារកិច្ចមួយចំនួនទៀតដោយមន្ទីរទេសចរណ៍ខេត្តព្រមទាំងការដាក់ពិពណ៌ផលិតផលថៃយ៉ាងច្រើនកុះករផងដែរ ៕
ចែករំលែកព័តមាននេះ