ខេត្តស្ទឹងត្រែង ៖ ជនត្រូវចោទម្នាក់តុលាការសម្រេចចេញដីការឃុំខ្លួន ជាបណ្តោះអាសន្ន នៅពន្ធនាគារកាំងមេម៉ាយ សង្កាត់ព្រះបាទ ក្រោយចាប់ខ្លួនកាលពីរំលងអធ្រាត្រ ឈានចូលថ្ងៃទី២៧ តុលា ស្ថិតត្រង់ចំណុចស្រុកថាឡាបរិវ៉ាត់ ខេត្តស្ទឹងត្រែងពាក់ព័ន្ធបទល្មើសនេសាទខុសច្បាប់ ។ ជនសង្ស័យឈ្មោះ ស្រី រឿន អាយុ៣៧ឆ្នាំ រស់នៅភូមិវាលខ្សាច់ ឃុំថាឡាបរិវ៉ាត់ ស្រុកថាឡាបរិវ៉ាត់ ។
ប្រភពពីមន្ត្រីខណ្ឌរដ្ឋបាលជលផលអោយដឹងថា កាលពីយប់រំលងអាធ្រាត្រឈានចូលថ្ងៃទី២៧ តុលាឆ្នាំ២០១៧នាយរងខណ្ឌរដ្ឋបាលជលផលខេត្តស្ទឹងត្រែង ដឹកនាំមន្ត្រីខណ្ឌរដ្ឋបាលជលផល និងសហគមន៍នេសាទ សហការជាមួយកម្លាំងប៉ុស្តិ៍នគរបាល និងប្រជាការពារ ចុះល្បាតនៅតាមដងទន្លេមេគង្គ នៅឃុំកាំងចាម ស្រុកថាឡាបរិវ៉ាត់ បានប្រទះឃើញជនសង្ស័យ ធ្វើសកម្មភាពដោយប្រើប្រាស់ឧបករណ៍ឆក់នៅចំណុចអូរគៀស ភូមិកំពង់ប៉ាង ឃុំកាំងចាម ស្រុកថាឡាបរិវ៉ាត់ ។
ក្រោយប្រទះឃើញ ក៏បានដេញចាប់ជនសង្ស័យ រហូតដល់ចំណុចភូមិពងទឹក ឃុំអូររៃ ស្រុកថាឡាបរិវ៉ាត់ ប៉ុន្តែជនសង្ស័យមិនព្រមឈប់ឡើយ ក៏សម្រេចចិត្តបុកទូកជនសង្ស័យពន្លិច ទើបចាប់ខ្លួនជនសង្ស័យជាប់រួមជាមួយវត្ថុតាងមានថ្នងដងត្រីភ្ជាប់ជាមួយខ្សែភ្លើង១គ្រឿង ។ ចំណែកឯវត្ថុតាងផ្សេងៗទៀត បានលិចចូលទៅក្នុងទន្លេអស់។
ចែករំលែកព័តមាននេះ