ខេត្តក្រចេះ ៖ ក្រុមសមត្ថកិច្ចបានឲ្យដឹងថា មានឈើសុក្រំមុខកាត់ធំៗប្រវែងជាង២មែត្រយ៉ាងហោចចំនួនជាង២រយកំណាត់ដែលលាក់នៅខាងក្រោយភូមិក្នុងឃុំក្បាលដំរី ស្រុកសំបូរ ត្រូវបានសមត្ថកិច្ចធ្វើការរុករក និងចាប់បង្ក្រាប។
ការបង្ក្រាបដែលបានធ្វើឡើងពីកងកម្លាំងកងរាជអាវុធហត្ថខេត្តក្រោមការសម្របសម្រួលពីស្ថាប័នអយ្យការខេត្ត នៅថ្ងៃទី២៧ តុលា នេះ គឺបានធ្វើឡើងបន្ទាប់ពីមានការរាយការណ៍ថា មានការដឹកជញ្ជូនឈើរបស់ឈ្មួញមកលាក់ទុកនៅព្រៃខាងក្រោយភូមិជាង២គីឡូមែត្រ តែជំនាញរដ្ឋបាលព្រៃឈើក្រចេះ មិនមានការយកចិត្តទុកដាក់លើចំណាត់ការ។
សេចក្តីរាយការបានឱ្យដឹងថា ឈើលេខ១រាប់រយកំណាត់ ដែលក្រុមឈ្មួញដឹកចេញ ពីតំបន់ផ្សេងៗ ពិសេសតាមព្រៃពីខេត្តមណ្ឌលគិរី យកមកគរទុកនៅខាងក្រោយភូមិស្រែត្រែង ឃុំក្បាលដំរី ស្រុកសំបូរ គឺត្រៀមលើកស្ទូចដាក់រថយន្តយីឌុប រួចបន្តសម្រុកដឹកនាំចេញ។
ប្រភពដដែលនោះបានឲ្យដឹងថា ការដឹកជញ្ជូនរបស់ឈ្មួញភាគច្រើន គឺធ្វើឡើងនៅពេលយប់ ដោយការដឹក និងត្រូវធ្វើទៅតាមគ្រប់រូបភាព ដូចជាការដឹកបង្កប់ក្នុងឧស ឬក៏ដំឡូង និងស្រូវជាដើម។
នាយសង្កាត់រដ្ឋបាលព្រៃឈើសណ្តាន់ លោក ប៉ាល់ សុខកែវ បានប្រាប់អ្នកកាសែតថា ជាមួយនឹងការបង្ក្រាបឈើពីសំណាក់កម្លាំងជំនាញរដ្ឋបាលព្រៃឈើ និងកម្លាំងអាវុធហត្ថខេត្ត គឺសមត្ថកិច្ចពុំបានចាប់ឃាត់ខ្លួនជនណាម្នាក់ដែលជាប់ពាក់ព័ន្ធនឹងករណីជំនួញឈើខុសច្បាប់នេះទេ ។ ជាមួយនឹងការបង្ក្រាបនេះ សមត្ថកិច្ចបានរកឃើញឈើឈើចំនួន២៤០កំណាត់ធំៗ ដែលសុទ្ធសឹងជាឈើលេខ១សុក្រំ និងបានដឹកយកមករក្សាទុកនៅសង្កាត់រដ្ឋបាលព្រៃឈើដើម្បីបន្តវិធានការ ។
សមត្ថកិច្ចបានអះអាងថា ក្រោយពីការចាប់ និងប្រមូលយកនាំទៅរក្សាទុករួចមកនោះ សមត្ថកិច្ច និងបន្តនីតិវិធីស្រាវជ្រាវរកម្ចាស់ ក៏ដូចជាអ្នកនៅពីក្រោយបទល្មើសដឹកជញ្ជូនឈើខុសច្បាប់ជាលក្ខណៈទ្រង់ទ្រាយធំមួយនេះបន្តទៀត៕
ចែករំលែកព័តមាននេះ