រាជធានីភ្នំពេញ ៖ បឺត សង្ឃឹម មកពីក្លិបរ៉ាហាប់ស្វាយប៉ាក និង វេង សុភ័ក្ដ្រ មកពីក្លិបកងពលតូចពិសេសឆត្រយោង៩១១ត្រូវបានគេផ្គូផ្គងឱ្យជួបប្រកួតជាមួយកីឡាករថៃនៅលើសង្វៀនទូរទស្សន៍ MyTV ក្នុងកម្មវិធី Ganzberg Uber Figthers នៅយប់ថ្ងៃសុក្រ ទី២៧ តុលា នេះ។ អ្នកនិយមតាមដានការប្រកួតភាគច្រើនកំពុងតែទន្ទឹងរង់ចាំមើលថាតើកីឡាករកម្ពុជាទាំង២រូបនេះអាចសម្រេចគោលដៅរបស់ខ្លួនឬយ៉ាងណា? ខណៈកីឡាករថៃដែលពួកគេត្រូវជួបហាក់មានសមត្ថភាពខ្លាំងមិនធម្មតាបែបហ្នឹងនោះ។
បឺត សង្ឃឹម ត្រូវជួបប្រកួតជាមួយកីឡាករថៃឈ្មោះកៅឡាន ប៉េឡេបុរីរ៉ាំ ក្នុងប្រភេទទម្ងន់៥៧គីឡូក្រាម ។ យោងតាមប្រវត្តិ បឺត សង្ឃឹម ធ្លាប់ប្រកួត៥៧ដង ឈ្នះ៤២ដង ចាញ់១៣ដង ស្មើ២ដង និងធ្លាប់ផ្ដួលគូប្រកួតឱ្យសន្លប់១៨ដង ក្នុងពេលកីឡាករថៃធ្លាប់ប្រកួត៦៥ដង ឈ្នះ៤៥ដង ចាញ់១៧ដង ស្មើ៣ដង និងផ្ដួលគូប្រកួតឱ្យសន្លប់បាន១០ដង ។ ចាំមើលបឺត សង្ឃឹម អាចយកឈ្នះកីឡាករថៃរូបនេះដែរឬយ៉ាងណា ។
វេង សុភ័ក្ដ្រ ត្រូវជួបប្រកួតជាមួយកីឡាករថៃឈ្មោះម៉ៃសុទ្ធ ប៉េឡេបុរីរ៉ាំ ក្នុងប្រភេទទម្ងន់៦៣,៥គីឡូក្រាម ។ វេង សុភ័ក្ត្រ ធ្លាប់ប្រកួត៥២ដង ឈ្នះ៤៥ដង ចាញ់៦ដង ស្មើ១ដង និងធ្លាប់ផ្ដួលគូប្រកួតឱ្យសន្លប់បាន១៦ដង ក្នុងពេលកីឡាករថៃជាដៃគូធ្លាប់ប្រកួត៨៣ដងឈ្នះ៦១ដង ចាញ់១៩ដង ស្មើ៣ដង និងធ្លាប់ផ្ដួលគូប្រកួតឱ្យសន្លប់១៣ដង ។ វេង សុភ័ក្ដ្រល្បិចប្រយុទ្ធនៅលើសង្វៀនរបស់គេល្អគួរសមប៉ុន្តែមិនទាន់ដឹងថា អាចទៅរួចជាមួយកីឡាករថៃរូបនេះបានឬអត់នោះទេ ដូច្នេះមានតែរង់ចាំមើលការប្រកួតជាក់ស្ដែងប៉ុណ្ណោះ។
ក្រៅពីគូអន្តរជាតិទាំង២គូនេះទៅ នៅលើសង្វៀនដដែលក៏មានការប្រកួតមិត្តភាពធម្មតារវាងកីឡាករកម្ពុជានិងកម្ពុជាផងដែរដូចជា កីឡាករ ឡុង ចំរើន មកពីក្លិបខ្លារខិនមានរិទ្ធប្រកួតជាមួយកីឡាករ ណាក់ សុខា មកពីក្លិបយុវវាលស្បូវខណ្ឌច្បារអំពៅ និងកីឡាករ សុខ វាសនា មកពីក្លិបឃ្លាំងមឿងកីឡា ប្រកួតជាមួយកីឡាករ ថន វាសនា មកពីក្លិបនាគរាជមានជ័យ ៕
ចែករំលែកព័តមាននេះ