រាជធានីភ្នំពេញ ៖ នៅរសៀលម៉ោង២ថ្ងៃទី២៨ តុលា ស្អែកនេះ ប្រដាល់អន្តរជាតិរបស់ទូរទស្សន៍អាស៊ីអាគ្នេយ៍ នឹងដល់កំណត់ត្រូវប្រកួតដណ្ដើមពិន្ទុអន្តរជាតិទៀតហើយ ដោយប្រកាសបើករេញឲ្យកីឡាករកម្ពុជា២រូប និងថៃ២រូបប៉ះគ្នា ។…
រាជធានីភ្នំពេញ ៖ នៅរសៀលម៉ោង២ថ្ងៃទី២៨ តុលា ស្អែកនេះ ប្រដាល់អន្តរជាតិរបស់ទូរទស្សន៍អាស៊ីអាគ្នេយ៍ នឹងដល់កំណត់ត្រូវប្រកួតដណ្ដើមពិន្ទុអន្តរជាតិទៀតហើយ ដោយប្រកាសបើករេញឲ្យកីឡាករកម្ពុជា២រូប និងថៃ២រូបប៉ះគ្នា ។ អ្វីដែលគេកត់សម្គាល់គឺការប្រកួតលើកនេះកីឡាករកម្ពុជាល្បីឈ្មោះប៉ះសុទ្ធតែជាមួយកីឡាករជើងចាស់មកពីប្រទេសថៃដែលមិនទាន់ដឹងថាអ្នកណានឹងយកបាន៣ពិន្ទុនៅឡើយទេ។
កីឡាករកម្ពុជា២រូប គឺជើងខ្លាំង ឌុម កែវដា និងសេង ស្រឿន នឹងក្លាយជាគូប្រកួតស៊ី
សាច់ហុតឈាមជាមួយកីឡាករថៃនៅថ្ងៃនោះ។ អ្នករៀបចំការប្រកួតបានអះអាងថា កីឡាករទាំង៤ត្រូវប៉ះគ្នាក្នុងវគ្គសន្សំពិន្ទុ ។ លោក ញាណ សុធី អ្នករៀបចំការប្រកួតប្រចាំនៅទូរទស្សន៍អាស៊ីអាគ្នេយ៍បានថ្លែងប្រាប់ថា ក្នុងចំណោមកីឡាករកម្ពុជា៤រូបដែលមានឈ្មោះដណ្ដើមយកខ្សែក្រវាត់ក្នុងព្រឹត្តិការណ៍ប្រដាល់នោះ កីឡាករ ឌុម កែវដា គឺជាជើងខ្លាំងវ័យក្មេងម្នាក់ដែលលោករំពឹងខ្ពស់ បើទោះជាគេត្រូវប្រឈមនឹងកីឡាករថៃល្អជាគូប្រកួតក្ដី ។ គេត្រូវប៉ះជាមួយកីឡាករថៃឈ្មោះPhat Phayak
ក្នុងនាមជាគូឯកអន្តរជាតិនៅថ្ងៃសៅរ៍ស្អែក។
លោកថា ជំនួបរវាងពួកគេមិនមែនជារឿងសំខាន់ដោយសារអ្នកណាឈ្នះក្រៅពីបានពិន្ទុហើយ គឺត្រូវទទួលបានទំនុកចិត្តពីអ្នកគាំទ្រទៅទៀត ផ្ទុយទៅវិញ បើចាញ់មិនខុសពីបាក់មុខ និងមានការរិះគន់ធ្ងន់ធ្ងរនោះទេ ។ លោកថា កីឡាករ ឌុម កែវដា អាចចាត់ទុកជាជើងខ្លាំងម្នាក់នៅលើសង្វៀនប្រដាល់អន្តរជាតិមួយនេះ ដែលជាព្រឹត្តិការណ៍ចម្រុះតែកីឡាករខ្លាំងៗនៅក្នុងពិភពប្រដាល់ ។ លោកជឿជាក់ថា កីឡាកររូបនេះ នឹងបញ្ចេញសមត្ថភាពល្អដូចជាពូកែគេច និងពូកែវាយសន្ធាប់ដែលគេធ្លាប់បញ្ចេញឡើងនាពេលកន្លងមក ទើបលោកយល់ថា ជំនួបឌុម កែវដា ជាមួយកីឡាករជាដៃគូពិតជាមិនធម្មតាសម្រាប់ការប្រកួតទាំងមូល ។ លោកថា កីឡាករកម្ពុជារូបនេះមានការឈានឡើងសមត្ថភាព ហើយការប្រកួតប៉ុន្មានលើកចុងក្រោយក៏ល្អទើបលោកយល់ថាគេអាចបាន៣ពិន្ទុពីការប្រកួតនៅថ្ងៃស្អែក បើទោះជាមុននេះបន្តិចគេវាយជាមួយថៃល្អខ្លះ និងមិនសូវល្អខ្លះនៅលើសង្វៀនអន្តរជាតិ ។ លោកនិយាយថា ឌុម កែវដា នៅតែចាត់ទុកថាជាជើងខ្លាំងនៅលើសង្វៀន ទើបលោករំពឹងខ្ពស់សម្រាប់ការប្រកួតលើកនេះ ។
កីឡាករថៃដែលត្រូវប្រកួតជាមួយ ឌុម កែវដា ធ្លាប់ប្រកួត៧៦លើក ឈ្នះ៦៥លើក ចាញ់១១លើក និងស្មើ១០លើក ក្នុងពេលដែលកីឡាករកម្ពុជាធ្លាប់ប្រកួតរហូតដល់៨១លើក ឈ្នះ៦៦លើក ចាញ់១៣លើក និងស្មើ២លើក ។
សម្រាប់កីឡាករ សេង ស្រឿន លោកញាណ សុធី បញ្ជាក់ថា គេត្រូវប៉ះជាមួយកីឡាករជើងខ្លាំងមកពីថៃឈ្មោះPhat Chhayden ក្នុងនាមជាគូរងឯកអន្តរជាតិ ។ លោកថា ការប្រកួតរបស់ពួកគេនៅមិនទាន់ដឹងថាអ្នកណាល្អជាងអ្នកណានោះទេ ក្នុងពេលដែលសេង ស្រឿន គឺជាកីឡាករខ្លាំងមិនធម្មតា និងជាធនធានកីឡាករវ័យក្មេងដ៏កម្រនោះផង។ ជាក់ស្ដែងគេឈ្នះជាប្រចាំគ្រប់ពេលគេឡើងប្រកួតជាមួយកីឡាករបរទេសនាពេលកន្លងមក ទើបមានមុខបានឡើងនៅក្នុងព្រឹត្តិការណ៍នេះ។
លោកថា កីឡាករថៃជាដៃគូគេគឺជាកីឡាករវ័យក្មេងល្បីឈ្មោះ តែគេមិនទាន់ប្រាកដថានឹងទទួលបានជ័យជម្នះសម្រាប់ការប្រកួតជាមួយជើងខ្លាំងកម្ពុជានោះទេ ក្នុងពេលដែលលោក និងអ្នកគាំទ្រនៅតែជឿជាក់ចំពោះជើងខ្លាំងកម្ពុជាជាធំ ។ កីឡាករថៃធ្លាប់ប្រកួត៨០លើក ឈ្នះ៦៤លើក ចាញ់១៦លើក និងមិនដែលស្មើ រីឯកីឡាករកម្ពុជាធ្លាប់ប្រកួត៦៥លើក ឈ្នះ៥៥លើក ចាញ់១០លើក និងមិនធ្លាប់ស្មើដូចគ្នា។
នៅក្នុងព្រឹត្តិការណ៍ប្រដាល់ពេលព្រឹកថ្ងៃអាទិត្យនៅលើសង្វៀនទូរទស្សន៍អាស៊ីអាគ្នេយ៍នោះដែរ ក៏មានការប្រកួតអន្តរជាតិបែបនេះមិនខុសគ្នា ខណៈនៅប៉ុស្តិ៍លេខ៥ព្រែកកំពិស មានការប្រកួតជម្រុះ១៦នាក់យក៨នាក់ក្នុងសប្ដាហ៍ទី៩ចាប់ពីម៉ោង៥ល្ងាចតទៅ៕
ចែករំលែកព័តមាននេះ