រាជធានីភ្នំពេញ ៖ ប្រទេសកម្ពុជាកំពុងតែទាក់ទាញក្រុមហ៊ុនជប៉ុនថ្មីៗជាច្រើនទៀត ដែលបច្ចុប្បន្ននេះ មានក្រុមហ៊ុនជប៉ុនជាច្រើនកំពុងសិក្សាឈ្វេងយល់បន្ថែមពីកម្ពុជា និងគ្រោងចាប់ផ្តើមគម្រោងវិនិយោគរបស់ពួកគេនាពេលខាងមុខទៅលើវិស័យជាច្រើនរួមមាន ឧស្សាហកម្ម កសិកម្ម វេជ្ជសាស្ត្រ សេវាកម្ម…
រាជធានីភ្នំពេញ ៖ ប្រទេសកម្ពុជាកំពុងតែទាក់ទាញក្រុមហ៊ុនជប៉ុនថ្មីៗជាច្រើនទៀត ដែលបច្ចុប្បន្ននេះ មានក្រុមហ៊ុនជប៉ុនជាច្រើនកំពុងសិក្សាឈ្វេងយល់បន្ថែមពីកម្ពុជា និងគ្រោងចាប់ផ្តើមគម្រោងវិនិយោគរបស់ពួកគេនាពេលខាងមុខទៅលើវិស័យជាច្រើនរួមមាន ឧស្សាហកម្ម កសិកម្ម វេជ្ជសាស្ត្រ សេវាកម្ម និងហិរញ្ញវត្ថុ ។
លោក អិុត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ក្នុងជំនួបពិភាក្សាការងារជាមួយលោក យ៉ូស៊ី កុនដូ (Yoshio Kondo) អគ្គនាយកក្រុមហ៊ុនប្រូឃេស អេស៊ា (Procast Asia) របស់ជប៉ុន កាលពីថ្ងៃទី២៤ តុលា ថា វិនិយោគិនជប៉ុនបានបង្ហាញចំណាប់អារម្មណ៍ជាច្រើនក្នុងការវិនិយោគនៅកម្ពុជាក្នុងវិស័យខាងលើ ។ លោកបន្តថា ក្រុមវិនិយោគិនទាំងនេះបានសិក្សារួចហើយនាពេលកន្លងមក តាមរយៈព័ត៌មាន ហើយពេលនេះ ពួកគេមកដើម្បីវិនិយោគលើវិស័យឧស្សាហកម្ម វេជ្ជសាស្ត្រ ហិរញ្ញវត្ថុ និងសេវាកម្ម ។
ប្រធានក្រុមប្រតិភូសមាគមថូកៃហ្សៃ លោកTou Kaizaikai បានលើកឡើងថា ការអញ្ជើញមកដល់កម្ពុជាពេលនេះ គឺសិក្សាឈ្វេងយល់បន្ថែមដើម្បីផ្លាស់ប្តូរព័ត៌មាន ហើយនៅថ្ងៃអនាគត ក្រុមការងាររបស់ជប៉ុននឹងវិនិយោគនៅកម្ពុជា ។ លោកបានបញ្ជាក់ថា មូលហេតុដែលជប៉ុនចង់វិនិយោគនៅកម្ពុជា ដោយសារមើលឃើញថា ប្រទេសកម្ពុជា នាពេលអនាគតរីកចម្រើនខ្លាំង ។
សមាគមថូកៃហ្សៃ មានទីតាំងនៅតំបន់ណាកូយ៉ាក់ ខេត្តអៃជិ ប្រទេសជប៉ុន ជាតំបន់រីកចម្រើនខ្លាំងលើវិស័យឧស្សាហកម្ម ។ សមាគមនេះមានក្រុមហ៊ុនធំៗមានសមាជិកជាង៣០០ក្រុមហ៊ុន ។
សេដ្ឋវិទូ ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ បានថ្លែងថា ជប៉ុនបានវិនិយោគលើមូលដ្ឋានសំខាន់ៗសម្រាប់រយៈពេលវែងនៅកម្ពុជារួចហើយ ដែលបច្ចុប្បន្ននេះ វិនិយោគិនជប៉ុនបានវិនិយោគសាងសង់ខុនដូ សណ្ឋាគារ អាផាតមិន ការិយាល័យ ភោជនីយដ្ឋាន មន្ទីរពេទ្យ ទីលានវាយកូនហ្គោល ក៏ដូចជាសេវាកម្មហិរញ្ញវត្ថុនានា ។ លោកបន្តថា តាមរយៈមូលដ្ឋានទាំងនេះ គឺជាភាពចាំបាច់សម្រាប់ទាក់ទាញវិនិយោគិនជប៉ុនឲ្យមកបណ្ដាក់ទុនរកស៊ីនៅកម្ពុជា នាពេលអនាគតកាន់តែច្រើន ។
លោកបន្តថា ៖« ការបើកជើងហោះហើរត្រង់របស់អាកាសចរណ៍ ANA កាលពីចុងឆ្នាំមុន គឺជាប្រវត្តិសាស្ត្រនៃការភ្ជាប់ទំនាក់ទំនងនយោបាយ និងសេដ្ឋកិច្ចជប៉ុន-កម្ពុជា ឲ្យកាន់តែរឹងមាំថែមទៀត » ។
លោកបណ្ឌិត អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា ភីអិលស៊ី បានថ្លែងថា កម្ពុជាកំពុងក្លាយជាទីតាំងទាក់ទាញវិនិយោគិន ហើយវិនិយោគិនមុននឹងមកវិនិយោគនៅប្រទេសណា ពួកគេមើលទៅលើកត្តាចំនួន៣ដូចជា ស្ថិរភាពនយោបាយនិងសន្តិភាព កំណើនសេដ្ឋកិច្ចដ៏រឹងមាំ និងស្ថិរភាពសង្គមរយៈពេលវែង ។ លោកបន្តថា កម្ពុជាកំពុងសម្រេច និងរក្សាបាននូវស្ថិរភាពទាំង៣ផ្នែកនេះ ដែលជួយឲ្យកម្ពុជាក្លាយជាទីតាំងសម្រាប់វិនិយោគិនមកពីជុំវិញពិភពលោក ។
លោកបន្តថា ៖« រហូតមកទល់ពេលនេះ មានក្រុមហ៊ុនសហគ្រាសជប៉ុនជាង១.០០០ហើយដែលបានវិនិយោគនៅកម្ពុជា ហើយពួកគេបានទូទាត់សាច់ប្រាក់ជាមួយធនាគារអេស៊ីលីដា » ៕
ចែករំលែកព័តមាននេះ