រាជធានីភ្នំពេញ ៖ អ្នកចិញ្ចឹមជ្រូកក្នុងស្រុក នឹងគ្មានថ្ងៃមើលឃើញតម្លៃងើបឡើងឡើយ បើទោះបីជាខំស្រែកយ៉ាងណាក៏ដោយ ព្រោះថា ការនាំចូលពីប្រទេសជិតខាងសព្វថ្ងៃកាន់តែខ្លាំងឡើងៗ ពិសេសគឺជ្រូកពីប្រទេសវៀតណាម ហើយម្នាក់ៗចេះតែឆ្ងល់ថា បើជ្រូកវៀតណាមនាំចូលមក ហើយលក់ថោកជាងជ្រូកខ្មែរបែបនេះ តើចំណេញឬទេ ?
ម្ចាស់កសិដ្ឋាន ក៏ដូចជាអ្នកពាក់ព័ន្ធនានាបានបកស្រាយថា នៅតែចំណេញ បើទោះបីជាតម្លៃលក់ទាបជាងជ្រូកខ្មែរក៏ដោយ ព្រោះការចំណាយលើការចិញ្ចឹមអស់តិច។
លោក នាង ចន្ថា ម្ចាស់កសិដ្ឋានដ៏ធំមួយនៅក្រុងបាវិត ខេត្តស្វាយរៀង បានឱ្យដឹងថា ជ្រូកនាំចូលពីវៀតណាម ហើយលក់ក្នុងតម្លៃទាបបែបនេះ គឺនៅតែអាចចំណេញ ព្រោះការចំណាយលើការចិញ្ចឹមរបស់គេអស់តិចជាងកម្ពុជា ។ លោកថា ៖« ភ្លើងនៅវៀតណាម តម្លៃទាបជាងនៅខ្មែរយើងជាង១០ដងឯណោះ ហើយបើភ្លើងថោក អ្វីៗក៏ថោកដែរ ដូចជា ការចំណាយលើការផលិតចំណីជ្រូកជាដើម ធ្វើឲ្យតម្លៃចំណីជ្រូកក៏ទាបជាងនៅកម្ពុជាដែរ ។ ដូចនេះ បើគេលក់ជ្រូកថោកជាងកម្ពុជា ក៏គេនៅតែចំណេញដែរ ។ កត្តានេះហើយជាការព្រួយបារម្ភ និងសម្លាប់កសិករចិញ្ចឹមជ្រូកខ្មែរយើង ហើយបើនៅតែបណ្ដែតបណ្ដោយឲ្យជ្រូកវៀតណាមហូរចូលបែបនេះទៀតនោះ កុំសង្ឃឹមថា តម្លៃនឹងប្រសើរឡើង » ។
យ៉ាងណាក៏ដោយ លោកគិតថា បើសិនជារាជរដ្ឋាភិបាលកំណត់ចំនួននាំចូល ហើយអនុវត្តបានត្រឹមត្រូវ បូករួមនឹងមន្ត្រីគយតាមព្រំដែនរឹតបន្តឹងផងនោះ តម្លៃជ្រូកខ្មែរអាចនឹងងើបឡើងវិញ ។ ប៉ុន្តែកសិករលែងមានជំនឿទៅហើយ ព្រោះសព្វថ្ងៃ ឈ្មួញសម្រុកដឹកចូលទាំងរថយន្ដ និងម៉ូតូយ៉ាងមមាញឹក បើទោះបីជារាជរដ្ឋាភិបាលកម្ពុជា ដែលមានក្រសួងកសិកម្ម រុក្ខាប្រមាញ់ និងនេសាទ បានកំណត់ឲ្យនាំចូលតែ១.២៥០ក្បាលក្នុង១ថ្ងៃក៏ដោយ ។
លោកថា ៖« ខ្ញុំប្រហែលជាបិទរោងកសិដ្ឋានចោលហើយ ព្រោះតម្លៃជ្រូកសព្វថ្ងៃ វាមិនត្រឹមតែមិនចំណេញទេ តែថែមទាំងខាតកាន់តែច្រើនឡើងៗពីមួយថ្ងៃទៅមួយថ្ងៃ ។ រាល់ថ្ងៃនេះ ជ្រូកល្មមត្រូវចាប់ តែគ្មានអ្នកមកចាប់ទេ បើទោះបីជាតម្លៃទាបក៏ដោយ ព្រោះកុងស៊ីកាប់ជ្រូកខ្មែរ គេមិនចង់មកចាប់ជ្រូកខ្មែរទេ គេចាំទទួលជ្រូកវៀតណាមដែលឈ្មួញដឹកដល់កន្លែងតែម្ដង » ។
លោកបន្ថែមថា បើសមត្ថកិច្ចតាមព្រំដែន និងថ្នាក់ដឹកនាំនៅតែមិនខ្វល់ពីការហូរចូលជ្រូករស់ពីប្រទេសជិតខាងទេនោះ ជ្រូកខ្មែរគ្មានថ្ងៃងើបឡើងវិញទេ ហើយម្ចាស់កសិដ្ឋាននៅខេត្តស្វាយរៀង ក៏ដូចជានៅរាជធានីភ្នំពេញ ឬទូទាំងប្រទេស អាចនឹងបោះបង់ចោលរបរនេះ ព្រោះតែមិនអាចទប់ការចំណាយដែលចេះតែខាតរៀងរាល់ខែ ។
សមាគមអ្នកចិញ្ចឹមសត្វកម្ពុជា បានចេញសេចក្តីជូនដំណឹងមួយដល់សមាជិករបស់ខ្លួនថា ជ្រូករស់របស់ខ្មែរបានធ្លាក់ដល់តម្លៃទាបបំផុតមិនធ្លាប់មានពីមុនមក ហើយអ្វីគួរឲ្យកត់សម្គាល់នោះ គឺគ្មានឈ្មួញចុះមកចាប់ជ្រូកពីកសិដ្ឋានខ្មែរទៅទៀត ។ ទាំងនេះហើយជាការព្រួយបារម្ភកាន់តែខ្លាំងទៅលើទីផ្សារជ្រូករស់របស់ខ្មែរ ។
លោក ជេត ភីរម្យ អនុប្រធានសមាគមអ្នកចិញ្ចឹមសត្វកម្ពុជា បានឲ្យដឹងថា បច្ចុប្បន្ន ការនាំចូលជ្រូករស់ពីវៀតណាមដោយស្របច្បាប់មិនសូវច្រើនប៉ុន្មានទេ ប៉ុន្តែសកម្មភាពនាំចូលដោយខុសច្បាប់ពីឈ្មួញខិលខូច ដោយឃុបឃិតជាមួយពេទ្យសត្វក្នុងស្រុក និងមន្ត្រីព្រំដែន មានចំនួនច្រើនក្នុងមួយថ្ងៃៗ ។ ដូចនេះហើយទើបធ្វើឲ្យតម្លៃជ្រូករស់ក្នុងស្រុកមិនអាចងើបឡើងវិញបាន ។
លោកថា ៖« តម្លៃជ្រូកខ្មែរបានធ្លាក់ចុះទាបបំផុត ស្របពេលនឹងរដូវនេះជារដូវសម្បូរត្រីដែរ។ ដូចនេះ ពលរដ្ឋទិញត្រីមកធ្វើម្ហូបអាហារជំនួសសាច់ជ្រូក ហើយគាប់ជួនការនាំចូលខុសច្បាប់កាន់តែច្រើននោះ ទើបធ្វើឲ្យតម្លៃជ្រូកកាន់តែធ្លាក់ចុះ » ។
លោកបន្តថា បច្ចុប្បន្ន ជ្រូករបស់កសិករលក់ក្នុងតម្លៃចន្លោះពី៥.០០០ ទៅ៥.៥០០រៀលក្នុង១គីឡូក្រោម ប៉ុន្តែជ្រូករបស់ក្រុមហ៊ុន ដូចជា ម៉ុងឫទ្ធី និង CP ជាដើម អាចលក់បានក្នុងតម្លៃ៦.០០០រៀលក្នុង១គីឡូក្រាម ៕
ចែករំលែកព័តមាននេះ