រាជធានីភ្នំពេញ ៖ រថយន្តធន់ធំចំណុះ៤០តោនបើកបរលឿនខ្វះការប្រុងប្រយ័ត្នទើបបើកបុកម៉ូតូពេញទំហឹង បណ្តាលឲ្យអ្នកជិះម៉ូតូដួលបាក់.កស្លាប់គួរឲ្យរន្ធត់ហេតុការណ៍នេះបានកើតឡើងកាលពីវេលាម៉ោង៨និង១៥នាទីយប់ថ្ងៃទី២៦ ខែតុលា ឆ្នាំ២០១៧ តាមបណ្តោយផ្លូវជាតិលេខ៦ នៅចំណុចស្តុបលីយ៉ុងផាត់ ស្ថិតនៅក្នុងភូមិបាក់ខែងលើ សង្កាត់បាក់ខែង ខណ្ឌដូនពេញ ។
ជនរងគ្រោះដែលស្លាប់មានឈ្មោះ ឡុង ជីវ័ន ភេទប្រុស អាយុ២៥ឆ្នាំ មានស្រុកកំណើតនៅភូមិត្រពាំងត្មាត ឃុំស្រម៉រ ស្រុកជើងព្រៃ ខេត្តកំពង់ចាម។
ប្រភពព័ត៌មានបានឲ្យដឹងថា មុនពេលកើតហេតុ បុរសរងគ្រោះជិះម៉ូតូ ពណ៌ស អត់មានស្លាកលេខ បើកតាមបណ្តោយជាតិលេខ៦ ពីជើងទៅត្បូង ខណៈពេលមកដល់ចំណុចកើតហេតុខាងលើភ្លើងខៀវគាត់ក៏បើកល្បឿនរៀងលឿនដើម្បីឆ្លងឲ្យផុត ក៏ស្រាប់តែមានរថយន្តធន់ធំមួយគ្រឿង ចំណុះ៤០តោន ពណ៌ក្រហមបើកបញ្ច្រាស់ទិសដៅគ្នាពីត្បូងទៅជើង ដែលមានភ្លើងក្រហមហើយ គាត់មិនបានឈប់នោះទេ ថែមទាំងបានបត់ឆ្វេងទៅផ្លូវលីយ៉ុងផាត់ធ្វើឲ្យម៉ូតូចាប់ហ្វ្រាំងអត់ទាន់ ក៏ត្រូវរថយន្តបុកចំពេញទំហឹងបណ្តាលឲ្យបាក់.កស្លាប់ភ្លាមៗនៅនឹងកន្លែងកើតហេតុ ។ ចំណែកម៉ូតូវិញមិនមានខូចខាតអីធ្ងន់ធ្ងរនោះទេ គ្រាន់តែដាច់កន្ទុយស្លាកលេខតែប៉ុណ្ណោះ រីឯរថយន្តបង្កវិញមិនបានឈប់ដោះស្រាយគ្នានៅកន្លែងកើតហេតុនោះទេបានបន្ថែមល្បឿនបើករត់គេចខ្លួន តែពេលឆ្លងផុតស្ពានលីយ៉ុងផាត់ត្រូវសមត្ថកិច្ចខណ្ឌព្រែកភ្នៅឃាត់បានតែរថយន្ត ប៉ុណ្ណោះ ចំណែកតៃកុងរថយន្តវិញរត់គេចខ្លួនបាត់ស្រមោល ។
ក្រោយពេលកើតហេតុសមត្ថកិច្ចចរាចរណ៍ក្រុង ក៏បានធ្វើការវាស់វែងយកទៅរក្សាទុកនៅការិយាល័យចរាចរណ៍ផ្លូវ រង់ចាំដោះស្រាយគ្នានៅពេលក្រោយទៀត ចំនែកឯសពជនរងគ្រោះវិញត្រូវបានសាច់ញាតិយកទៅធ្វើបុណ្យតាមប្រពៃណីនៅឯស្រុកកំណើត ៕
ចែករំលែកព័តមាននេះ