ខេត្តប៉ៃលិន ៖ យុវជនម្នាក់ ក្នុងចំណោម៥នាក់ ត្រូវបានគេស្គាល់ថា ជាកូនឧកញ៉ាម្នាក់ នៅភ្នំពេញ ទើបមកលេងខេត្តប៉ៃលិនបានរយ:ពេល១អាទិត្យ លុះទៅជួបជុំផឹកស៊ីជាមួយមិត្តភក្តិ ស្រាប់តែទៅឈរមើលគេឈ្លោះគ្នានៅក្បែរនោះ ក៏ត្រូវនគរបាលស្នងការខេត្ត ចាប់យកទៅវាយសួរចម្លើយនៅក្នុងបន្ទប់ បណ្តាលឱ្យរងរបួសយ៉ាងដំណំ ។
ហេតុការណ៍ឃាត់ខ្លួននេះ កើតឡើងកាលពីវេលាម៉ោង១១ និង៣០នាទីយប់ ថ្ងែទី២៥ តុលា ស្ថិតនៅក្នុងភូមិបឌិននៀវ សង្កាត់ប៉ៃលិន ក្រុងប៉ៃលិន ។ ប្រភពព័ត៌មានបានឱ្យដឹងថា ជនរងគ្រោះ ដែលត្រូវនគរបាលវាយនឹងដំបង ដើម្បីសួរចម្លើយ មានឈ្មោះ ណូ សាបៀន ភេទប្រុស អាយុ២៥ឆ្នាំ រងរបួសជាំ ខ្នង និងក្បាល រស់នៅក្នុងភូមិអង្គកែវ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ បានដោយមកលេងផ្ទះបងប្អូន នៅក្នុងភូមិអូរតា ពុកក្រោម សង្កាត់ទួលល្វា ក្រុងប៉ៃលិន មានឪពុក ឈ្មោះ ប៉ែន នួន អាយុ៤៨ឆ្នាំ ។ ចំណែកក្មេងទំនើង៤នាក់ទៀត ត្រូវគេវាយដូចគ្នាដែរ រស់នៅក្នុងក្រុងប៉ៃលិន ។
ប្រភពពីជនរងគ្រោះ ឈ្មោះណូ សាបៀន បានរៀបរាប់ឱ្យដឹងថា រូបគេមិនធ្លាប់ដើរលេងផឹកស៊ីអ្វីពីមុនមកនោះទេ ហើយក៏មិនធ្លាប់ត្រូវបានឪពុកម្តាយជេរស្តីអ្វី ដោយសារការដើរលេងខុសច្បាប់ដែរ ។ ប៉ុន្តែពេលមកលេងផ្ទះបងប្អូនក្នុងខេត្តប៉ៃលិន អស់រយ:ពេល១អាទិត្យ ជិតដល់ថ្ងៃត្រឡប់ទៅផ្ទះនៅឯភ្នំពេញវិញ ស្រាប់តែមិត្តភក្តិបបួលឱ្យទៅជួបជុំគ្នាផឹកស៊ីនៅក្បែរកន្លែងកើតហេតុ តាំងពីម៉ោង៦ល្ងាច រហុតដល់ម៉ោង១១យប់ ស្រាប់តែមានក្មេងប្រុសៗ ៤ទៅ៥នាក់ បានឈ្លោះទា ស់ទែងគ្នា ហើយរូបគេក៏ចូលទៅ ហាមឃាត់ ។
ប្រភពបន្តថា ស្រាប់តែមួយសន្ទុះក្រោយមក នគរបាលស្នងការខេត្ត បានជិះរថយន្តមកដល់ចាប់ទាំងក្មេងៗទាំងនោះ និងរូបគេតែម្តង ។ ពេលទៅដល់ក្នុងបន្ទប់ មាននគរបាលម្នាក់ ឈ្មោះ កន សារុន បានយកដំបងវាយទៅលើខ្នងរបស់គេចំនួន៣ ទៅ៤ដំបងយ៉ាងខ្លាំងៗ ហើយក្រោយមកក៏វាយទៅលើក្បាលរបស់គេផ្ន្នែកខាងក្រោយចំនួន៥ទៅ៦ដំបងទៀត ស្ទើរតែបែកក្បាល ។ ចំណែកយុវជន៤នាក់ទៀត ក៏ត្រូវនគរបាលធ្វើទារុណកម្មដូចគ្នា ដោយវាយបណ្តើរសួររកបក្សពួកបណ្តើរ ។ លុះក្រោយមកនគរបាលនោះដឹងថា រូបគេជាកូនឧកញ៉ា ក៏ដោះលែងឱ្យត្រឡប់ទៅផ្ទះវិញ ។ តែរូបគេមិនសុខចិត្ត នឹងការវាយធ្វើទារុណកម្មបែបនេះទេ ព្រោះអាចនឹងមានគ្រោះថ្នាក់ដល់អាយុជីវិត ។
ពាក់ព័ន្ធទៅនឹងបញ្ហានេះ លោក ជា ចាន់ឌិន ស្នងការនគរបាលខេត្តប៉ៃលិន បានឱ្យដឹងថា នៅយប់ថ្ងៃកើតហេតុ កម្លាំងនគរបាលព្រហ្មទណ្ឌ បានចុះបង្ក្រាបក្រុមក្មេងទំនើង បង្ហោះម៉ូតូ និងដេញវាយគ្នាតាមដងផ្លូវ នៅត្រង់ចំណុចមុខសាលាចនសាន់ ស្ថិតក្នុងភូមិខាងលើ ។
លោកបន្តថា ការវាយទៅលើក្មេងៗ ខាងលើប្រហែលជា ដោយសារតែពួកគេតដៃនឹងនគរបាល ។ តែតាមច្បាប់ការសួរចម្លើយ មិនអាចវាយទៅលើជនសង្ស័យនោះទេ ព្រោះជាអំពើខុសច្បាប់ ហើយក៏ទទួលបានលទ្ធផលចម្លើយមិនល្អដែរ ៕
ចែករំលែកព័តមាននេះ