ខេត្តបាត់ដំបង ៖ បុរសម្នាក់ដែលគេសង្ស័យថា ជាឃាតករសម្លាប់ប្រពន្ធខ្លួនឯង បានដើរចូលទៅសារភាពយ៉ាងស្ងាត់ស្ងៀម នៅទីបញ្ជាការមូលដ្ឋានកងរាជអាវុធហត្ថស្រុកសង្កែ ក្រោយពីសម្លាប់ប្រពន្ធរបស់ខ្លួនចោលនៅក្នុងប្រឡាយទឹកមួយកន្លែង កាលពីវេលាម៉ោង១១ និង៤០នាទីថ្ងៃត្រង់ ថ្ងៃទី២៥…
ខេត្តបាត់ដំបង ៖ បុរសម្នាក់ដែលគេសង្ស័យថា ជាឃាតករសម្លាប់ប្រពន្ធខ្លួនឯង បានដើរចូលទៅសារភាពយ៉ាងស្ងាត់ស្ងៀម នៅទីបញ្ជាការមូលដ្ឋានកងរាជអាវុធហត្ថស្រុកសង្កែ ក្រោយពីសម្លាប់ប្រពន្ធរបស់ខ្លួនចោលនៅក្នុងប្រឡាយទឹកមួយកន្លែង កាលពីវេលាម៉ោង១១ និង៤០នាទីថ្ងៃត្រង់ ថ្ងៃទី២៥ តុលា ស្ថិតក្នុងភូមិវត្តកណ្ដាល ឃុំរាំងកេសី ស្រុកសង្កែ ដែលគេសង្ស័យថា បានកើតឡើងដោយសារភ្លើងប្រចណ្ឌ ឡើងកំដៅដល់កម្រិត។
មន្ត្រីកងរាជអាវុធហត្ថបានប្រាប់ថា ជនសង្ស័យឈ្មោះហើស ហឿង អាយុ៣៧ឆ្នាំ រីឯប្រពន្ធដែលស្លាប់ឈ្មោះនី ស្រីនាង អាយុ៣៣ឆ្នាំ មានកូនប្រុស២នាក់ រស់នៅក្នុងភូមិ ឃុំកើតហេតុខាងលើ ។ មន្ត្រីដដែលបានបន្តថា បុរសជាប្ដីបានតាមទៅសម្លាប់ប្រពន្ធរបស់ខ្លួនដល់វាលស្រែ ដោយសារតែភ្លើងប្រចណ្ឌ។ ប៉ុន្តែក្រោយពីសម្លាប់ប្រពន្ធ ជននេះបានព្យាយាមជិះម៉ូតូគេខ្លួន តែប៉ុន្មានម៉ោងក្រោយមក ជននេះក៏បានដើរចូលទៅសារភាពនៅទីបញ្ជាការមូលដ្ឋានកងរាជអាវុធហត្ថស្រុកសង្កែ ខណៈកម្លាំងសមត្ថកិច្ចព្រោងព្រាតកំពុងតាមស្វែងរកមុខជននេះស្ទើរគ្រប់ទីកន្លែង ពេញវាលស្រែ ដែលទំនងជាគិតថា ខ្លួនមិនអាចគេចផុតពីសំណាញច្បាប់ ទើបចូលសារភាពមុនដូច្នេះ។
ជុំវិញប្ដីសម្លាប់ប្រពន្ធខ្លួនឯងយ៉ាងឃោរឃៅនេះ បើតាមការបំភ្លឺនានាពីសាក្សីថា ប្ដីប្រពន្ធខាងលើនេះ ហាក់រស់នៅមិនចុះសម្រុងនឹងគ្នាទេ មួយរយៈចុងក្រោយនេះ។ ការមិនចុះសម្រុងគ្នានៃគ្រួសារនេះ អ្នកខ្លះនិយាយថា ដោយសារតែបុរសជាប្ដីចេះតែរករឿងប្រពន្ធពេក។ ប៉ុន្តែខ្លះទៀតបាននិយាយថា អាចជារឿងប្ដីប្រចណ្ឌប្រពន្ធច្រើនជាង។
ប្រភពពីក្រុមគ្រួសារបានឲ្យដឹងថា មុនពេលកើតហេតុ ប្ដីបានសរសេរសំបុតមួយច្បាប់ ឲ្យកូនយកទៅឲ្យប្រពន្ធ តែគេមិនដឹងថា មានខ្លិមសារយ៉ាងណាទេ។ គ្រាហ៏នោះបុរសនេះបានសួរកូនថា តើម៉ាក់ឯងទៅណា ? កូនឆ្លើយថា ម៉ាក់ទៅស្រែ..! ។ ក្រោយពីសួរនាំហើយ ឈ្មោះហឿង ក៏បានជិះម៉ូតូទៅស្រែដែលឆ្ងាយពីភូមិប្រហែល៤០០ម៉ែត្រ។ ប៉ុន្តែគ្មាននរណាដឹងថា បុរសនេះទៅតាមសម្លាប់ប្រពន្ធទេ លុះប៉ុន្មានម៉ោងក្រោយទើបមានការភ្ញាក់ផ្អើលដោយសារគេប្រទះឃើញសាកសពប្រពន្ធជននេះស្លាប់ក្នុងទឹកប្រឡាយ។
ជាមួយនឹងការភ្ញាក់ផ្អើលនេះ បើតាមសមត្ថកិច្ចបានប្រាប់ថា ជនដៃដល់ឈ្មោះហើស ហឿង បានជិះម៉ូតូគេចខ្លួនបាត់ ក្រោយពីចាប់ប្រពន្ធច្របាច់ កជ្រមុជសម្លាប់ក្នុងទឹកប្រឡាយ ខណៈសមត្ថកិច្ចព្រោងព្រាតចុះទៅពិនិត្យកន្លែងកើតហេតុ និងតាមរកចាប់ខ្លួន។
បើតាមចម្លើយបឋមរបស់ជនសង្ស័យឈ្មោះហើស ហឿង បានសារភាពថា «ខ្ញុំពិតជាបានសម្លាប់ប្រពន្ធមែន ដោយសារភ្លើងប្រច័ណ្ឌ»។ ជននេះបានរៀបរាប់ថា ពេលខ្លួនជិះម៉ូតូទៅរកប្រពន្ធនៅឯស្រែ ពេលនោះខ្លួនឃើញប្រពន្ធកំពុងនិយាយទូរស័ព្ទ តែមិនដឹងនិយាយជាមួយនរណាទេ។ ពេលនោះខ្លួនបានសុំឆែកមើលលេខទូរស័ព្ទ តែប្រពន្ធខ្លួនបានបដិសេធ ហើយថែមទាំងបោះទូរស័ព្ទចោលក្នុងទឹកទៀត ដែលនាំឲ្យមានការប្រតាយប្រតប់គ្នា។ ម្យ៉ាងដោយសារខឹងប្រពន្ធលួចលាក់មានសាហាយស្មន់ជាមួយប្រុសផ្សេងផង ទើបចាប់ច្របាច់ កប្រពន្ធជ្រមុជទឹកប្រឡាយសម្លាប់តែម្ដងទៅ។
ទោះជាយ៉ាងណា នេះគ្រាន់តែជាការបំភ្លឺរបស់ជនសង្ស័យឈ្មោះហើស ហឿង និងប្រភពខ្លះៗដែលសមត្ថកិច្ចបានដកស្រង់តែប៉ុណ្ណោះ រីឯដំណើររឿងពិតប្រាកដបែបណានោះ មានតែក្រុមគ្រួសារនេះ ឬ ក្រុមសាច់ញាតិតែប៉ុណ្ណោះ ដែលអាចដឹងអំពីរឿងនេះឲ្យស៊ីជម្រៅ។
ចែករំលែកព័តមាននេះ