រដ្ឋមន្ត្រីអភិវឌ្ឍន៍សេដ្ឋកិច្ចអ៊ីតាលី លោក Paolo Romani ថ្លែងប្រាប់សភាថា ប្រទេសអ៊ីតាលីនឹងផ្អាករយៈពេលមួយឆ្នាំនូវកម្មវិធីនុយក្លេអ៊ែររបស់ខ្លួន ។ លោក Romani ថ្លែងទៀតថា កិច្ចប្រជុំគណៈរដ្ឋមន្ត្រីដែលរៀបចំឡើងនៅថ្ងៃទី២៣ មីនា នឹងសម្រេចឱ្យពន្យារពេលមួយឆ្នាំនូវសេចក្តីសម្រេចចិត្តស្វែងរកទីកន្លែងសម្រាប់ថាមពលនុយក្លេអ៊ែរ ។
ក្រុងរ៉ូមមានផែនការចាប់ផ្តើមសាងសង់មជ្ឈ មណ្ឌលថាមពលនុយក្លេអ៊ែរនៅឆ្នាំ២០១៤ ខាងមុខ ហើយសង្ឃឹមថា មជ្ឈមណ្ឌលនុយក្លេអ៊ែរនេះនឹងផលិត១ភាគ៤នៃថាមពលអគ្គិសនីរបស់ប្រទេសនៅត្រឹមឆ្នាំ២០៣០ ខាងមុខ ។ ប៉ុន្តែដោយសារមានវិបត្តិនុយក្លេអ៊ែរនៅប្រទេសជប៉ុនកើតឡើង ព្រោះការរញ្ជួយដីក្រុងរ៉ូមបានសម្រេចផ្អាកកម្មវិធីនុយក្លេអ៊ែរវិញរយៈពេលមួយឆ្នាំ ។
ដោយឡែកតាមប្រភពព័ត៌មានថា តាំងពីមុនពេលកើេតមានវិបត្តិនុយក្លេអ៊ែររបស់ប្រទេសជប៉ុនមកម៉្លេះ ពលរដ្ឋអ៊ីតាលីក្នុងចំនួនដ៏ច្រើនបានប្រឆាំងការសាងសង់មជ្ឈមណ្ឌលនុយក្លេអ៊ែរនោះ ។ ថាមពលនុយក្លេអ៊ែរជាបំណងប្រាថ្នាសំខាន់មួយរបស់នាយករដ្ឋមន្ត្រីអ៊ីតាលី លោកស៊ីលវីយ៉ូ ប័រលូស្កូនី ដោយលោកប័រលូស្កូនី ថ្លែងថា ថាមពលនុយក្លេអ៊ែរនេះនឹងជួយកាត់បន្ថយការពឹងផ្អែកលើថាមពលផ្សេងៗរបស់អ៊ីតាលី ៕
ចែករំលែកព័តមាននេះ