រាជធានីភ្នំពេញ ៖ ធ្លាក់ខ្លួនជ្រកកោននៅផ្ទះគេ និងស្ទើរតែរកអង្ករច្រកឆ្នាំងគ្មាន ដូច្នេះបង្ខំចិត្តចុះរាវខ្យង ខ្ចៅ ដកព្រលឹត និងបេះត្រកួន ក្នុងបឹងយកទៅលក់ នេះគឺជាទម្ងន់ទុក្ខលំបាក ដែលសង្កត់សង្កិនលើជីវិតរបស់តារាចម្រៀងអ៊ុំគន្ធា ។
អតីតកាលនាងអ៊ុំ គន្ធា ជាតារាចម្រៀងយេយេរះភ្លឺចិញ្ចាច ប៉ុន្តែបច្ចុប្បន្នរលត់រស្មីសូន្យសុងទៅហើយ ជីវិតត្រូវទ្រាំរស់ទាំងត្រដរត្រដាបត្រដួសជាមួយកូនប្រុសពីរនាក់ បន្ទាប់ពីឪពុកពួកគេចែកផ្លូវគ្នាដើរជាមួយនាងទៅហើយនោះ ។ បច្ចុប្បន្ននាងអ៊ុំ គន្ធា និងកូនៗរស់នៅក្នុងភូមិបាយ៉ាយ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។
ជីវិតជាតារាចម្រៀងមួយដួងធ្លាប់មានកិត្តិយស កេរ្តិ៍ឈ្មោះ ហើយប្រែផ្លាស់ជាធ្លាក់ខ្លួនតោកយ៉ាកបែបនេះ គឺក្រោយពេលនាងអ៊ុំ គន្ធា បែកបាក់ពីគូជីវិតដែលសុខចិត្តរួមរស់ជាមួយគ្នាពុំបានរៀបការ គឺលោកផាន សុផាត ជាតារាចម្រៀងដែរ ។ ការបែកបាក់ចែកផ្លូវគ្នាដើររៀងខ្លួននោះ ទ្រព្យសម្បត្តិដែលរកបានជាច្រើនឆ្នាំដូចជាផ្ទះវីឡា និងដីធ្លីជាដើមត្រូវលក់ចែកគ្នា ។ ប្រាក់ដែលនៅសេសសល់នាងគន្ធា បានយកទៅទិញផ្ទះមួយនៅម្តុំផ្សារមាន់អាំងនៃរាជធានីភ្នំពេញ ដើម្បីស្នាក់នៅ ។ ក្រោយមកភាពអកុសលបានតាមយាយីលើជីវិតតារាចម្រៀងមួយដួងនេះទៀត គឺនាងបានចាញ់បោកបុរសម្នាក់អស់ប្រាក់រាប់ម៉ឺនដុល្លារ ។
ទន្ទឹមនឹងជួបរឿងអាក្រក់ទាំងនោះ ជីវិតកាន់តែចាស់បន្តិច រូបសម្រស់កាន់តែថមថយ ដូច្នេះអាជីពជាអ្នកចម្រៀងលែងកាក់កបដូចមុន ធ្វើឱ្យជីវិតនាងអ៊ុំ គន្ធា ធ្លាក់ក្នុងភពងងឹតឈឹង ។ ខណៈធ្លាក់ខ្លួនស្ទើររកអង្ករច្រកឆ្នាំងគ្មាន និងជ្រកកោនក្នុងផ្ទះគេនេះ នាងអ៊ុំ គន្ធា ស៊ូទ្រាំរស់ជាមួយកូនៗដោយបញ្ចេញកម្លាំងរាវខ្យង ខ្ចៅ ដកព្រលឹត និងបេះត្រកួនយកទៅលក់ជំនួសការប្រើប្រាស់សំឡេង និងបញ្ចេញរូបសម្រស់សោភា ញញឹមប៉ប្រិមនៅលើឆាកតន្ត្រី ។
ក្នុងស្ថានភាពជីវិតបែបនេះ ហើយថែមទាំងធ្លាក់ខ្លួនឈឺទៀតនោះ កាលពីល្ងាចថ្ងៃទី៩ ខែតុលា ឆ្នាំ២០១២ នាង អ៊ុំ គន្ធា បានទទួលអំណោយឧបត្ថម្ភពីសប្បុរសជន ។
លោកស្រីគឹម សេដ្ឋានី ប្រធានសមាគមនារីកម្ពុជាដើម្បីសន្តិភាព និងអភិវឌ្ឍន៍សាលារាជធានីភ្នំពេញ ជាអ្នកនាំអំណោយរបស់សប្បុរសជនទៅប្រគល់ជូននាងអ៊ុំ គន្ធា ដល់លំនៅឋាន ។ អំណោយបានមកពីលោកជំទាវជុំ សាមីន កែប ជុតិមា ប្រធានសមាគមនារីកម្ពុជាដើម្បីសន្តិភាព និងអភិវឌ្ឍន៍រាជធានីភ្នំពេញ ឧបត្ថម្ភថវិកាផ្ទាល់ខ្លួនចំនួន៥០ម៉ឺនរៀល លោកស្រីតិមា វិច្ឆិកាល ចំនួន៥០ម៉ឺនរៀល លោកស្រី មួង សុខសត្យា ប្រធានអនុសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ខណ្ឌសែនសុខ ២០ម៉ឺនរៀល និងអំណោយរបស់សមាគមនារីកម្ពុជាដើម្បីសន្តិភាព និងអភិវឌ្ឍន៍រាជធានីភ្នំពេញ អង្ក២បាវ មី២កេស ទឹកស៊ីអីុវ១យួរ ទឹកត្រី១យួរ ត្រីខ២យួរ ទឹកដោះគោ៥កំប៉ុង ស្ករស២កញ្ចប់ ក្រមា២ សារុង២ និងខោអាវ១សម្រាប់ ។
លោកស្រីគឹម សេដ្ឋានី ឱ្យដឹងថា បន្ទាប់ពីទទួលបានព័ត៌មានពីស្ថានភាពជំងឺ និងជីវភាពទីទ័លក្ររបស់នាងអ៊ុំ គន្ធាមក លោកជំទាវជុំ សាមីន បានណែនាំឱ្យលោកស្រីនាំយកថវិកានិងសម្ភារទៅផ្តល់ជូន និងសួរសុខទុក្ខភ្លាម ។ ដោយក្តីអាណិតអាសូរលោកស្រីគឹម សេដ្ឋានី បានណែនាំនាងអ៊ុំ គន្ធា យកចិត្តទុកដាក់ព្យាបាលជំងឺឱ្យឆាប់ជា ហើយលើកទឹកចិត្តនាងថា ថ្នាក់ដឹកនាំរបស់យើងមិនទុកឱ្យប្រជាពលរដ្ឋណាម្នាក់ស្លាប់ដោយអត់បាយទេ ។
ក្នុងពេលទទួលអំណោយនោះនាងអ៊ុំ គន្ធា ថ្លែងអំណរគុណចំពោះទឹកចិត្តសប្បុរសរបស់លោកជំទាវជុំ សាមីន ព្រមទាំងសប្បុរសជនទាំងអស់ ។ នាងបួងសួងដល់វត្ថុសក្តិសិទ្ធិតាមបីបាច់ថែរក្សា សប្បុរសជនទាំងអស់ឱ្យជួបប្រទះតែសេចក្តីសុខ និងជោគជ័យលើការងារ ។
នាងអ៊ុំ គន្ធា អាយុ៣២ឆ្នាំ ឪពុកឈ្មោះ អ៊ុំ សុផាត អាយុ៧៥ឆ្នាំ ជាមន្ត្រីក្រសួងពាណិជ្ជកម្មចូលនិវត្តន៍ និងម្តាយឈ្មោះ អ៊ុង ស៊ីនួន អាយុ៦៨ឆ្នាំ ។ នាងគន្ធា ជាកូនទី៥ក្នុងចំណោមបងប្អូន៦នាក់ ។ នាងរៀនសូត្របានត្រឹមថ្នាក់ទី៥ក៏ឈប់ រួចចូលច្រៀងក្នុងវង់តន្ត្រីមួយនៅភោជនីយដ្ឋានផ្ការាំទឹករាំដែលកាលនោះនាងទើបតែមានអាយុ១៥ឆ្នាំប៉ុណ្ណោះ ។ នៅឆ្នាំ១៩៩៦នាងគន្ធាដាក់ពាក្យចូលប្រលងចម្រៀងជាមួយបងស្រីភ្លោះ ហើយបានជាប់ចំណាត់ថ្នាក់លេខ១ ។ តាំងពីពេលនោះមកនាងអ៊ុំ គន្ធា ក្លាយជាតារាចម្រៀងយេយេល្បីឈ្មោះ ។
ទន្ទឹមនឹងកេរ្តិ៍ឈ្មោះលេចខ្ពស់ត្រដែតនេះតារាចម្រៀងអ៊ុំ គន្ធាមានទំនាក់ទំនងស្នេហាជាមួយតារាចម្រៀងផាន សុផាត រហូតក្លាយជាប្តីប្រពន្ធដោយមិនបានចូលរោងការទេ ។ នៅឆ្នាំ២០០៦ ចំណងនិស្ស័យស្នេហ៍របស់ពួកគេបានដាច់ដោចទៅវិញ បន្ទាប់ពីសាងភាពផ្អែមល្ហែមជាមួយគ្នាបាន៨ឆ្នាំ និងបន្សល់ទុកកូនប្រុស២នាក់ ។
អំណោយរបស់សប្បុរសជនទាំងនោះអាចជួយឱ្យក្រុមគ្រួសារនាងអ៊ុំ គន្ធា បានធូរស្រាលពីការលំបាកមួយគ្រា រួចនាងត្រូវប្រឈមមុខការលំបាកតទៅមុខទៀត ។
ជីវិតជាតារារះភ្លឺចិញ្ចាចទំនងមិនអាចត្រលប់មករកនាងអ៊ុំ គន្ធាវិញទេ អ្វីដែលសេសសល់សម្រាប់នាងគឺត្រូវទ្រាំរស់ក្នុងភាពលំបាកលំបិន ។ ភាពរុងរឿងសល់តែក្នុងក្តីស្រមៃត្រលប់ទៅអតីតកាលវិញប៉ុណ្ណោះសម្រាប់នាង ៕
ចែករំលែកព័តមាននេះ