ព្រះមហាក្សត្រត្រាស់បង្គាប់លើកលែងទោសលោក ហុង សុខហួរ
- ភ្នំពេញ
រាជធានីភ្នំពេញ ៖ ព្រះមហាក្សត្រសម្តេចព្រះបរមនាថ នរោត្តម សីហមុនី បានត្រាស់បង្គាប់លើកលែងទោសលោក ហុង សុខហួរ ដែលជាសមាជិកសភាមកពីគណបក្សសម រង្ស៊ី…
រាជធានីភ្នំពេញ ៖ ព្រះមហាក្សត្រសម្តេចព្រះបរមនាថ នរោត្តម សីហមុនី បានត្រាស់បង្គាប់លើកលែងទោសលោក ហុង សុខហួរ ដែលជាសមាជិកសភាមកពីគណបក្សសម រង្ស៊ី ។ នេះបើយោងតាមព្រះរាជក្រឹត្យចុះថ្ងៃទី២៥ តុលា និងឡាយព្រះហស្តដោយព្រះមហាក្សត្រ ។
លោក ហុង សុខហួរ អាយុ៥៩ឆ្នាំ ត្រូវបានតុលាការសម្រេចផ្តន្ទាទោសដាក់ពន្ធនាគារពីបទ «ក្លែងបន្លំឯកសារសាធារណៈ ប្រើប្រាស់ឯកសារសាធារណៈក្លែងក្លាយ និងញុះញ៉ង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម» តាមអំណាចសាលដីកាចុះថ្ងៃទី២៩ ខែមិថុនា ឆ្នាំ២០១៧ ។
ព្រះរាជក្រឹត្យក៏បានចែងផងដែរថា សម្តេចតេជោ ហ៊ុន សែន ត្រូវទទួលបន្ទុកអនុវត្តព្រះរាជក្រឹត្យនេះចាប់ពីថ្ងៃឡាយព្រះហស្តលេខាតទៅ ។
សូមបញ្ជាក់ថា លោក ហុង សុខហួរ ត្រូវសមត្ថកិច្ចឃាត់ខ្លួនកាលពីខែសីហា ឆ្នាំ២០១៥ សម្រាប់បទល្មើសជាក់ស្តែង និងក្រោយពីមានប្រតិកម្មរបស់សម្តេចតេជោដែលបានចោទលោក ហុង សុខហួរ ពីបទ «ក្បត់ជាតិ»។
ព្រះមហាក្សត្របានត្រាស់បង្គាបលលើកលែងទោសលោក ហុង សុខហួរ បន្ទាប់ពីលោក ហុង សុខហួរ បានសរសេរលិខិតជូនសម្តេចតេជោ ហ៊ុន សែន កាលពីថ្ងៃទី ៨ ខែកញ្ញា សំណូមពរសម្តេចនាយករដ្ឋមន្ត្រី មេត្តាពិចារណាដោយក្តីយោគយល់ ដើម្បីស្នើសុំព្រះមហាក្សត្រប្រោសព្រះរាជទាន លើកលែងទោសរូបលោកឲ្យមានសេរីភាពជួបជុំគ្រួសារ និងបានចេញទៅព្យាបាលជំងឺប្រចាំកាយនៅប្រទេសបារាំងដោយក្តីអនុគ្រោះ។
ក្នុងលិខិតនោះផងដែរ លោក ហុង សុខហួរ បានបង្ហាញនូវការសោកស្តាយដោយបានប្រព្រឹត្តមិនត្រឹមត្រូវចំពោះនយោបាយរបស់សម្តេចតេជោ ក្នុងដំណើរការបោះបង្គោលព្រំដែន ដូចជាយកឯកសារមិនត្រឹមត្រូវមកប្រើប្រាស់ក្នុងបញ្ហាព្រំដែន ជាហេតុនាំឲ្យមានការភ័ន្តច្រឡំក្នុងមតិសាធារណៈ លើគោលនយោបាយ និងការអនុវត្តកន្លងមករបស់រាជរដ្ឋាភិបាល ។
លោក ហុង សុខហួរ សរសេរបន្តថា៖ «ចាប់ពីថ្ងៃនេះតទៅ ខ្ញុំនឹងប្រុងប្រយ័ត្នមិនឱ្យបញ្ហាបែបនេះកើតឡើងទៀតឡើយ» ។
ចែករំលែកព័តមាននេះ