ខេត្តស្វាយរៀង ៖ លោកយឹមឆៃលី ឧបនាយករដ្ឋមន្ត្រី និងជាប្រធានក្រុមការងារស្តារអភិវឌ្ឍន៍វិស័យកសិកម្ម និងជនបទមានប្រសាសន៍ថា បញ្ហាជីវភាពរបស់ប្រជាពលរដ្ឋនៅមានកង្វះខាត នៅក្នុងដំណើរទស្សនៈកិច្ចជាន់ខ្ពស់ និងកិច្ចប្រជុំឆ្លុះបញ្ចាំងស្តីពីការងារលើកកម្ពស់អនាម័យជនបទនៅសាលប្រជុំខេត្តស្វាយរៀងនាព្រឹកថ្ងៃទី២៥ ខែតុលា ឆ្នាំ២០១៧ មានការអញ្ជើញចូលរួមពីសំណាក់លោកតូច ប៉ូលី អភិបាល ស្តីទីនៃគណៈអភិបាលខេត្តស្វាយរៀង លោកនាយកប្រតិបត្តិអង្គការWSSCC ព្រមទាំងតំណាងក្រសួងអភិវឌ្ឍន៍ជនបទ ក្រសួងអប់រំ ក្រសួងហិរញ្ញវត្ថុ ប្រធានមន្ទីរពាក់ព័ន្ធ អាជ្ញាធរស្រុក អង្គការដៃគូរអភិឌ្ឍន៍ជាតិ និងអន្តរជាតិសរុបជាង១០០នាក់ ។
លោកតូចប៉ូលីវ៉ា អភិបាលរង និងជាអភិបាលស្តីទីខេត្តបានមានប្រសាសន៍ស្វាគមន៍ថា រាជរដ្ឋាភិបាលកម្ពុជា កំណត់ចក្ខុវិស័យគោលដៅអភិវឌ្ឍន៍សហស្សវត្សរ៍ អង្គការសហប្រជាជាតិ និងបានកំណត់ថានៅឆ្នាំ២០២៥ ប្រជាពលរដ្ឋគ្រប់រូបនៅសហគមន៍ជនបទ ត្រូវទទួលសេវាផ្គត់ផ្គង់ទឹកស្អាត និងអនាម័យគ្រប់គ្រាន់ ព្រមទាំងរស់នៅក្នុងបរិស្ថានមានអនាម័យប្រកបដោយនិរន្តរភាព ។ ដោយឡែកខេត្តស្វាយរៀងតាមទិន្នន័យដែលបានមកពី សេដ្ឋកិច្ចសង្គមកិច្ចឆ្នាំ២០១៥ អត្រាប្រើប្រាស់ឧបករណ៍ច្រោះទឹកមាន៣៩% និងទឹកដាំពុះប្រមាណ៤៧% បើប្រៀបធៀបរហូតមកដល់បច្ចុប្បន្ននេះអត្រាប្រើប្រាស់ទឹកមានសុវត្ថិភាព គឺមានការកើនឡើងរហូតដល់៩៦% អនាម័យចំនួន៦៤% ។ លោកតំណាង WSSCCបានថ្លែងថា WSSCC និងGSF បានជួយប្រជាពលរដ្ឋកម្ពុជា ក្នុងការផ្លាស់ប្តូរ វិស័យអនាម័យ ទឹកស្អាតនៅកម្ពុជា ជាដៃគូររាជរដ្ឋាភិបាល រយៈពេល១០ឆ្នាំ ។ លោកយឹម ឆៃលី ឧបនាយករដ្ឋមន្ត្រី បានបញ្ជាក់ថា ក្រសួងបានកំណត់នូវគោលដៅ ប្រជាពលរដ្ឋនៅជនបទទាំងអស់ត្រូវទទួលបានសេវា សុខភាព អនាម័យ ទឹកស្អាត៦០ភាគរយ ពង្រឹងការប្រើប្រាស់បង្គន់អនាម័យនៅតាមសាលារៀន ជាពិសេសតំបន់គោលដៅ នៃខេត្តទាំង១១ អនុវត្តន៍លើប្រជាពលរដ្ឋជាង១៤ម៉ឺនគ្រួសារ ។ លោកបន្តទៀតថានៅឆ្នាំ២០២៥ ប្រជាពលរដ្ឋមានបង្គន់អនាម័យគ្រប់ៗគ្រួសាររហូតដល់ជនបទ ។
ក្នុងករណីនេះដែរតំណាងក្រសួងអប់រំយុវជននិងកីឡា ក៏បានមានប្រសាសន៍តបថា ទូទាំងប្រទេសមានបង្គន់ គឺបញ្ហា ការប្រើប្រាស់ទឹកច្រើន ចំណែកថវិកាសេវាទឹក ក្រសួងផ្តល់ឲ្យតិចទើបនាយកសាលាបង្ខំចិត្តបិទទ្វាបង្គន់ដោយសារតែចំណាយលើសេវាទឹកភ្លើងច្រើនដំណោះស្រាយសំណូមពរក្រសួងហិរញ្ញវត្ថុផ្តល់ថវិកា ឲ្យបានច្រើនលើសេវាទឹកនិងភ្លើងអគ្គីសនី ៕
ចែករំលែកព័តមាននេះ