រាជធានីភ្នំពេញ ៖ នាយនគរបាលមានឋានន្តរសក្តិអនុសេនីយ៍ត្រី(សក្តិមួយ)ម្នាក់ ត្រូវបានកម្លាំងអាវុធហត្ថចាប់វាយខ្នោះ ក្រោយពីជិះរថយន្តស៊េរីទំនើបម៉ាកឡិចស៊ីស មួយគ្រឿង មិនដឹងជាមកពីណាបានឈប់រថយន្តរួចដកកាំភ្លើងខ្លីម៉ាកឡុកមួយដើមពីចង្កេះ បាញ់រះទៅលើរថយន្តរបស់ខ្លួនចំនួន៤គ្រាប់ បង្កឱ្យមានការភ្ញាក់ផ្អើលយ៉ាងខ្លាំង ។…
រាជធានីភ្នំពេញ ៖ នាយនគរបាលមានឋានន្តរសក្តិអនុសេនីយ៍ត្រី(សក្តិមួយ)ម្នាក់ ត្រូវបានកម្លាំងអាវុធហត្ថចាប់វាយខ្នោះ ក្រោយពីជិះរថយន្តស៊េរីទំនើបម៉ាកឡិចស៊ីស មួយគ្រឿង មិនដឹងជាមកពីណាបានឈប់រថយន្តរួចដកកាំភ្លើងខ្លីម៉ាកឡុកមួយដើមពីចង្កេះ បាញ់រះទៅលើរថយន្តរបស់ខ្លួនចំនួន៤គ្រាប់ បង្កឱ្យមានការភ្ញាក់ផ្អើលយ៉ាងខ្លាំង ។ ហេតុការណ៍នេះដែរបានបង្កឱ្យមានការភ្ញាក់ផ្អើលនៅវេលាម៉ោង១និង២០នាទីរំលងអធ្រាត្រឈានចូលថ្ងៃទី២៤ តុលា នៅចំណុចផ្លូវលេខ៧៥ កែងនឹងផ្លូវលេខ៨៤ (ទល់មុខសណ្ឋាគារហូលីដេ) ក្នុងសង្កាត់ស្រះចក ខណ្ឌដូនពេញ ។
តាមប្រភពព័ត៌មានពីមន្ត្រីអាវុធហត្ថម្នាក់បានប្រាប់ឱ្យដឹងថា បុរសជាខ្មាន់កាំភ្លើងដែលបានឃាត់ខ្លួនមានឈ្មោះ ឡេង ធារ៉ា អាយុប្រមាណជាង២០ឆ្នាំ បម្រើការងារនៅក្នុងក្របខណ្ឌនគរបាល មានឋានន្តសក្តិថ្នាក់អនុសេនីយ៍ត្រី ។ មុនពេលកើតហេតុ គេបានឃើញបុរសខាងលើជិះរថយន្តស៊េរីទំនើបម៉ាកឡិចស៊ីស LS450 ពណ៌ខ្មៅ ពាក់ស្លាកលេខភ្នំពេញ ២N-៣៥៧៩ មួយគ្រឿង ។ មិនមាននរណាម្នាក់បានដឹងថា មកពីទីណាឡើយ ។ ពេលមកដល់កន្លែងកើតហេតុ ក៏បានឈប់រថយន្តនិងដកកាំភ្លើងខ្លីម៉ាកឡុកមួយដើមពីចង្កេះ បាញ់រះ៤គ្រាប់ទៅលើរថយន្តរបស់ខ្លួនដែលជិះនោះ បណ្តាលឱ្យត្រូវកញ្ចក់បែក។
តាមប្រភពដដែលបានប្រាប់បន្តទៀតថា ក្រោយពីមានស្នូរផ្ទុះអាវុធជាច្រើនគ្រាប់កក្រើកទាំងកណ្តាលអធ្រាត្រនោះ ក៏ធ្វើឱ្យមានការភ្ញាក់ផ្អើលយ៉ាងខ្លាំង ទៅដល់កម្លាំងកងរាជអាវុធហត្ថខណ្ឌដូនពេញជាច្រើននាក់ ចុះមកដល់ និងចាប់ឃាត់ខ្លួនបុរសរូបនេះភ្លាមផងដែរ ។ ពេលដែលចាប់ខ្លួនបុរសជាខ្មាន់កាំភ្លើងរូបនោះ កម្លាំងរបស់លោកក៏បានធ្វើការដកហូតបានអាវុធខ្លីម៉ាកឡុក១ដើម និងបង់ចំនួន២ និងគ្រាប់ជាច្រើន ។
មូលហេតុដែលបណ្តាលឱ្យគាត់បាញ់ទៅលើរថយន្តរបស់ខ្លួននេះ កើតឡើងដោយសារតែគាត់មានជម្លោះជាមួយនឹងប្រពន្ធ ដែលកំពុងធ្វើការងារនៅក្នុងសណ្ឋាគារហូលីដេនោះ ។ គេមិនដឹងថា ការមានជម្លោះជាមួយប្រពន្ធនេះ មានរឿងរ៉ាវបែបណាខ្លះនោះទេ ។ ប៉ុន្តែក៏មានលេចឮថា គាត់សារភាពថារាលកៃ ។ឯសមត្ថកិច្ចថា វាមិនដែលរាលកៃដល់ទៅ៣-៤គ្រាប់ទេ ។
ក្រោយពេលកើតហេតុ នាយនគរបាលក៏ត្រូវបាននាំខ្លួនទៅធ្វើការសាកសួរ និងធ្វើកំណត់ហេតុនៅមូលដ្ឋានកងរាជអាវុធហត្ថខណ្ឌដូនពេញ ដើម្បីបញ្ជូនទៅកាន់បញ្ជាការដ្ឋានកងរាជអាវុធហត្ថរាជធានីភ្នំពេញ ចាត់ការទៅតាមផ្លូវច្បាប់ជាបន្ត ៕
ចែករំលែកព័តមាននេះ