រាជធានីភ្នំពេញ ៖ ប្តីប្រពន្ធ២នាក់កំពុងតែជិះកង់ឆ្លងកាត់ទទឹងផ្លូវក៍ស្រាប់តែបុរស២នាក់បានបើកម៉ូតូយ៉ាងលឿនបានជ្រុលទៅបុក ចំពាក់កណ្តាលពេញទំហឹង បណ្តាលឲ្យប្តីប្រពន្ធ២នាក់រងរបួសធ្ងន់ ចំណែកអ្នកជិះម៉ូតូរងរបួសស្រាល ហេតុការណ៍នេះដែរបានកើតឡើងនៅវេលាម៉ោង៩និង២០នាទីយប់ថ្ងៃទី២៤ ខែតុលា ឆ្នាំ២០១៧ ទល់មុខនឹងក្លឹបកំសាន្ត ស៊ីធី ភូមិដំណាក់ធំ សង្កាត់ស្ទឹងមានជ័យ២ ខណ្ឌមានជ័យ ។
ប្រភពព័ត៌មានពីកន្លែងកើតបានឲ្យដឹងថា មុនពេលកើតហេតុ ប្តីប្រពន្ធ២នាក់បានជិះកង់ឆ្លងកាត់ទទឹងផ្លូវ ពីជើងទៅត្បូង ខណៈកំពុងតែជិះឆ្លងដល់ពាក់កណ្តាលផ្លូវ ក៏ស្រាប់តែមានក្មេងស្ទាវ២នាក់ មិនដឹងថាប្រញាប់ទៅណានោះទេ គឺបានជិះម៉ូតូមួយគ្រឿង ពណ៌ស ស្លាកលេខ ១FH-០៦៧៨ ធ្វើដំណើរតាមផ្លូវ ២១៧ ពីលិចទៅកើតលឿនដូចហោះ ហើយពេលនោះមិនបានចាប់ហ្វ្រាំងនោះទេ បានបើកម៉ូតទៅបុកកង់ដែលកំពុងឆ្លងកាត់ទទឹងផ្លូវ ចំពាក់កណ្តាល បណ្តាលឲ្យបុរសជាប្តីរងរបួសសន្លប់ស្តូកស្តឹង ចំណែកប្រពន្ធរបួសបែកក្បាលហូរឈាមពេញផ្លូវសន្លប់ស្តូកស្តឹងដែរ ហើយភ្លាមនោះអ្នកទាំងពីរត្រូវបានរថយន្តសង្គ្រោះដឹកយកទៅសង្គ្រោះ ចំណែកកង់រង់ការខូចខាតវៀចមួយកំណាត់ខាងក្រោយ ។ ដោយឡែកខាងម៉ូតូបង្កវិញរងការខូចខាតខ្ទេចផ្នែកខាងមុខ ចំនែកមនុស្សរងរបួសរលាត់ដៃរលាត់ជើងស្រាលជាងប្តីប្រពន្ធពីរនាក់ ហើយមិនបានទៅមន្ទីរពេទ្យនោះទេ ។
ក្រោយកើតហេតុ សមត្ថកិច្ចជំនាញបានទៅដល់កន្លែងកើតហេតុធ្វើការវាស់វែងយកកង់និងម៉ូតូទៅរក្សារទុកនៅអធិការដ្ឋានខណ្ឌមានជ័យ ដើម្បីរង់ចាំធ្វើការដោះស្រាយតាមច្បាប់ ៕
ចែករំលែកព័តមាននេះ