ខេត្តបន្ទាយមានជ័យ ៖ កម្លាំងនគរបាលការិយាល័យព្រហ្មទណ្ឌកំរិតស្រាល នៃស្នងការដ្ឋាននគរបាលខេត្តបន្ទាយមានជ័យ នៅថ្ងៃទី២៤ ខែតុលា ឆ្នាំ២០១៧ នេះ បានរៀចំសំណុំរឿងបញ្ជូនខ្លួនក្រុមក្មេងទំនើងចំនួន៣នាក់ ដែលបានប្រើហិង្សាដោយចេតនា មានស្ថានទម្ងន់ទោស ទៅសាលាដំបូងខេត្តបន្ទាយមានជ័យ ដើម្បីចាត់ការតាមនីតិវិធី ។
លោកវរសេនីយ៍ទោ ខែម សុភណ័ នាយការិយាល័យនគរបាល ព្រហ្មទណ្ឌកំរិតស្រាល បានឲ្យដឹងថា ៖ ក្រុមក្មេងទំនើងដៃដល់ទាំង៣នាក់ ដែលត្រូវបានបង្ក្រាបចាប់ឃាត់ខ្លួន មានឈ្មោះ ១.លួម ម៉ស់ ២.ឆេម កូស៊ី ៣.យិត ហង់ មានទីលំនៅភូមិពន្លៃ ឃុំពន្លៃ ស្រុកភ្នំស្រុក ខេត្តបន្ទាយមានជ័យ និងដកហូតបានវត្ថុតាងដាវសាម៉ូរ៉ៃមួយដើម, ស្នាប់ដៃមួយ ។
លោកនាយការិយាល័យ បានបន្តថា ៖ នៅវេលាម៉ោង០៧និង៣០នាទីយប់ ថ្ងៃទី២១ ខែតុលា ឆ្នាំ២០១៧ ខណៈពេលនៅវត្តសុទ្ធារាមថ្មគោល ស្ថិតភូមិថ្មគោល ឃុំផ្គាំ ស្រុកស្វាយចេក ខេត្តបន្ទាយមានជ័យ ធ្វើកម្មវិធីបុណ្យកឋិនទាន នាយប់កើតហេតុមានរាំធុងបាស ក៏ស្រាប់តែក្រុមក្មេងទំនើង៣នាក់នេះ និងបក្ខពួកគេ២នាក់ទៀត ។ ម្នាក់ឈ្មោះ ធូប តូម៉ន ភេទប្រុស អាយុ១៩ឆ្នាំ និងម្នាក់ទៀតឈ្មោះ ចាន់ រី ភេទប្រុស អាយុ១៩ឆ្នាំ នៅភូមិពន្លៃ ឃុំពន្លៃ ស្រុកភ្នំស្រុក ខេត្តបន្ទាយមានជ័យ និងបក្ខពួកមួយចំនួនទៀតក្ដាប់ឈ្មោះមិនបាន (រត់គេចខ្លួន) ។ បានជិះម៉ូតូទៅធ្វើសកម្មភាពកាប់ និងវាយទៅលើក្រុមក្មេងម្ខាងទៀត បណ្ដាលឲ្យរងរបួសធ្ងន់ ។
លោកឧត្តមសេនីយ៍ត្រី សិទ្ធ ឡោះ ស្នងការរង ទទួលផែននគរបាលព្រហ្មទណ្ឌ បានបញ្ជាក់ថា ៖ ក្រុមក្មេងទំនើងទាំង៣នាក់ ដែលចាប់ឃាត់ខ្លួននេះ នៅចំពោះមុខសមត្ថកិច្ចបានសារភាពថា ពួកខ្លួនមានគ្នីគ្នាចំនួន៦នាក់ ប្រដាប់ដោយកាំបិត ពូថៅ ចបកាប់ និងដំបង ពិតជាបានធ្វើសកម្មភាពដេញកាប់ និងវាយទៅលើក្រុមក្មេងនៅភូមិថ្មគោល បណ្តាលឲ្យរងរបួស និងខូចខាតធុងបាស កៅអីក្នុងវត្តថ្មគោល ប្រាកដមែន ។
លោកស្នងការរង បានបន្តថា ៖ តាមសម្ដីប្រជាពលរដ្ឋនៅភូមិថ្មគោល ក៏ដូចជាភូមិពន្លៃ បានប្រាប់សមត្ថកិច្ចថា ក្រុមក្មេងទាំងនេះ គឺជាក្មេងជើងកាងក្នុងភូមិពន្លៃ ប្រជាពលរដ្ឋមានការភ័យខ្លាចចំពោះក្រុមក្មេងនេះណាស់ ក្រោយពីបានធ្វើការចាប់ឃាត់នេះ ប្រជាពលរដ្ឋគាត់មានការអបអរសាទរក្រៃលែង និងបានសំណូមពរដល់សមត្ថកិច្ចបន្តឲ្យស្រាវជ្រាវចាប់ពួករត់គេចខ្លួនឲ្យអស់ ដើម្បីឲ្យតុលាការចាត់ការពួកវាតាមច្បាប់ឲ្យបានយូរ ៕
ចែករំលែកព័តមាននេះ