ខេត្តបាត់ដំបង ៖ សេចក្តីរាយការណ៍បឋមឱ្យដឹងថា យុវជនម្នាក់បានចង.កសម្លាប់ខ្លួនលើដើមឈើមួយកន្លែង ស្ថិតនៅខាងក្រោយយានដ្ឋានជួសជុលរថយន្ត ដែលជាកន្លែងធ្វើការរបស់ខ្លួន បង្កការភ្ញាក់ផ្អើល កាលពីវេលាម៉ោង១០យប់ថ្ងៃទី២៣ តុលា ក្នុងភូមិអណ្តូងចេញ សង្កាត់អូរចា ក្រុងបាត់ដំបង ។
សេចក្តីរាយការណ៍បន្តថា ជនរងគ្រោះខាងលើ មានឈ្មោះអ៊ាន ភារ៉ាត់ អាយុ២២ឆ្នាំ ជាជាងជួសជុលរថយន្ត ស្នាក់នៅក្នុងភូមិកើតហេតុខាងលើ ។ ប្រភពបន្តថា ក្រោយពេលកើតហេតុ ត្រូវបានថៅកែយានដ្ឋាននេះ សម្រេចកាត់ខ្សែទម្លាក់សាកសពចុះមកដី ដោយខ្លួនឯង និងបានជួលរថយន្តសាមុយដឹកសាកសពទៅកាន់វត្តសាមគ្គីរស្មី ហៅវត្តទួលដូនប៉ុក ស្ថិតក្នុងភូមិអញ្ចាញ សង្កាត់អូរចារួចហើយ ក្រោយមកទើបរាយការណ៍មកសមត្ថកិច្ច ។
ទាក់ទិនករណីនេះ ត្រូវបានមិត្តរួមការងារឱ្យដឹងដែរថា ជនរងគ្រោះអាចចង.កខ្លួនឯងតាំងពីវេលាម៉ោង៨យប់ឯណោះ គ្រាន់តែគ្មានអ្នកចាប់អារម្មណ៍ ។ លុះនៅវេលា១០យប់ថ្ងៃដដែល ដោយសារអត់ឃើញជនរងគ្រោះនៅក្នុងយានដ្ឋាន ទើបនាំគ្នាដើររក ស្រាប់តែប្រទះឃើញតែម្តង ។
ប្រភពពីមិត្តរួមការងារបន្តទៀតថា ជនរងគ្រោះជាមនុស្សមិនសូវចេះនិយាយស្តីនោះទេ ទោះបីជាមានរឿងអ្វីក៏ដោយ ។ ប៉ុន្តែត្រូវគេដឹងថា គាត់មានសង្សារនៅជិតកន្លែងកើតហេតុ ។ ហើយករណីដែលគាត់សម្លាប់ខ្លួនឯងនេះ ក៏អាចកើតចេញពីវិបត្តិស្នេហាផងដែរ ព្រោះធ្លាប់ឮថា អត់មានលុយរៀបការនោះទេ ។
យ៉ាងណាក៏ដោយ មកទល់នៅព្រឹកថ្ងៃទី២៤ តុលា នេះ សមត្ថកិច្ចជំនាញ កំពុងធ្វើការពិនិត្យធ្វើកោសល្យវិច្ច័យលើសាកសពនៅក្នុងវត្តខាងលើ ។
ចែករំលែកព័តមាននេះ